റിയാദ്: 2024 നവംബര്‍ ഒന്നിന് മുമ്പ് സൗദി അറേബ്യയില്‍ ചുമത്തപ്പെട്ട ഗതാഗത നിയമലംഘന പിഴകള്‍ക്കെതിരെ പരാതി സമര്‍പ്പിക്കാന്‍ 15 ദിവസം കൂടി മാത്രമെ അവശേഷിക്കുന്നുള്ളൂവെന്ന് ട്രാന്‍സ്പോര്‍ട്ട് ജനറല്‍ അതോറിറ്റി (TGA) അറിയിച്ചു. നിശ്ചിത സമയപരിധിക്കുള്ളില്‍ പരാതികള്‍ സമര്‍പ്പിക്കാന്‍ വ്യക്തികളോടും സ്ഥാപനങ്ങളോടും അതോറിറ്റി അഭ്യര്‍ത്ഥിച്ചു.
ഗതാഗത മേഖലയിലെ പിഴ നടപടികളില്‍ സുതാര്യത ഉറപ്പാക്കുന്നതിനും നീതിയുക്തമായ പരിശോധനകള്‍ നടപ്പിലാക്കുന്നതിനുമായാണ് ഈ അവസരം നല്‍കുന്നത്. അര്‍ഹരായ ഗുണഭോക്താക്കള്‍ക്ക് തങ്ങളുടെ നിയമപരമായ അവകാശം വിനിയോഗിക്കാനും ഈ നടപടി സഹായിക്കും.
2024 നവംബര്‍ ഒന്നിന് മുമ്പ് രേഖപ്പെടുത്തിയ നിയമലംഘനങ്ങള്‍ക്ക് മാത്രമേ ഈ ഇളവ് ബാധകമാകൂ. ഔദ്യോഗിക വെബ്സൈറ്റ് വഴി മാത്രമായിരിക്കണം പരാതികള്‍ സമര്‍പ്പിക്കേണ്ടത്. പരാതി ലഭിച്ച് എട്ട് പ്രവൃത്തി ദിവസങ്ങള്‍ക്കുള്ളില്‍ തന്നെ ഇതില്‍ തീര്‍പ്പുകല്‍പ്പിക്കുമെന്ന് അതോറിറ്റി അറിയിച്ചു.
ഹെവി ട്രാന്‍സ്പോര്‍ട്ട്, കാര്‍ റെന്റല്‍, ബസ്, ചരക്ക് ഗതാഗതം തുടങ്ങി വിവിധ മേഖലകളിലെ നിയമലംഘനങ്ങള്‍ക്ക് ചുമത്തപ്പെട്ട പിഴകള്‍ക്കെതിരെയാണ് പരാതി നല്‍കാനാവുക. പിഴകള്‍ക്ക് പുറമെ ലൈസന്‍സ് സസ്‌പെന്‍ഷന്‍, വാഹനം പിടിച്ചെടുക്കല്‍ തുടങ്ങിയ ശിക്ഷാനടപടികളും ചില ലംഘനങ്ങള്‍ക്ക് ബാധകമാണ്. നിശ്ചിത സമയപരിധിക്കുള്ളില്‍ തന്നെ നടപടികള്‍ പൂര്‍ത്തിയാക്കാന്‍ ബന്ധപ്പെട്ടവര്‍ ശ്രദ്ധിക്കണമെന്ന് അധികൃതര്‍ ആവര്‍ത്തിച്ചു.
Related News
