റിയാദ്: തലസ്ഥാനത്തെ പ്രമുഖ ബ്രിട്ടീഷ് വിദ്യാലയമായ കിങ്സ് കോളേജ് റിയാദ്, തങ്ങളുടെ പുതിയ സെദ്ര (SEDRA) കാമ്പസിന്റെ പ്രവര്‍ത്തനങ്ങള്‍ക്കായുള്ള തയ്യാറെടുപ്പുകള്‍ ഊര്‍ജ്ജിതമാക്കി. പദ്ധതിയെക്കുറിച്ചുള്ള വിവരങ്ങള്‍ രക്ഷിതാക്കള്‍ക്ക് നേരിട്ട് മനസ്സിലാക്കുന്നതിനായി റോഷന്‍ ഫ്രണ്ടില്‍ പുതിയ 'പാരന്റ് എക്‌സ്പീരിയന്‍സ് സെന്റര്‍' പ്രവര്‍ത്തനം ആരംഭിച്ചു.

വിദ്യാലയത്തിന്റെ കാഴ്ചപ്പാടുകള്‍, സൗകര്യങ്ങള്‍, വിദ്യാഭ്യാസ രീതികള്‍ എന്നിവ പരിചയപ്പെടുത്തുന്നതിനായി ഒരുക്കിയ അത്യാധുനികമായ ഒരു ഇടമാണ് ഈ കേന്ദ്രം. സൗദി അറേബ്യയില്‍ ആറ് വര്‍ഷത്തെ മികച്ച പ്രവര്‍ത്തന പാരമ്പര്യമുള്ള കിങ്സ് കോളേജ്, റിയാദിലെ അതിവേഗം വളരുന്ന പ്രദേശങ്ങളിലൊന്നായ സെദ്രയില്‍ തങ്ങളുടെ സേവനം വ്യാപിപ്പിക്കാന്‍ ഒരുങ്ങുകയാണ്. അടുത്ത വര്‍ഷം ഓഗസ്റ്റിലാണ് പുതിയ കാമ്പസ് പ്രവര്‍ത്തനം ആരംഭിക്കുന്നത്.

കോഗ്‌നിറ്റ മിഡില്‍ ഈസ്റ്റ് ആണ് സ്‌കൂളിന്റെ നടത്തിപ്പ് ചുമതല വഹിക്കുന്നത്. ഇംഗ്ലണ്ടിലെ നാഷണല്‍ കരിക്കുലം അടിസ്ഥാനമാക്കിയുള്ള വിദ്യാഭ്യാസം നല്‍കുന്നതിനൊപ്പം തന്നെ, സൗദി സംസ്‌കാരം, ഇസ്ലാമിക പഠനങ്ങള്‍, സാമൂഹിക പഠനങ്ങള്‍ എന്നിവയ്ക്ക് വിദ്യാലയം വലിയ പ്രാധാന്യം നല്‍കുന്നു. സൗദി വിഷന്‍ 2030-ന്റെ ലക്ഷ്യങ്ങളുമായി ഒത്തുപോകുന്ന രീതിയിലാണ് സ്‌കൂളിന്റെ പ്രവര്‍ത്തനം.

36,300 ചതുരശ്ര മീറ്റര്‍ വിസ്തീര്‍ണ്ണത്തില്‍ ഒരുങ്ങുന്ന കാമ്പസില്‍ പ്രീ-സ്‌കൂള്‍ മുതല്‍ ഒമ്പതാം ക്ലാസ് വരെയുള്ള വിദ്യാര്‍ത്ഥികള്‍ക്കാണ് ആദ്യം പ്രവേശനം ലഭിക്കുക. പിന്നീട് വര്‍ഷാവര്‍ഷം ഇത് പന്ത്രണ്ടാം ക്ലാസ് വരെ ഉയര്‍ത്തും. ഐജിസിഎസ്ഇ, എ-ലെവല്‍സ്, ബിടെക് തുടങ്ങിയ കോഴ്‌സുകള്‍ ഇവിടെ ലഭ്യമാകും. നൂതനമായ ശാസ്ത്ര-സാങ്കേതിക ലബോറട്ടറികള്‍, 25 മീറ്റര്‍ നീളമുള്ള നീന്തല്‍ക്കുളം, 300 പേര്‍ക്ക് ഇരിക്കാവുന്ന തിയേറ്റര്‍, സ്‌പോര്‍ട്‌സ് പിച്ച്, പാഡല്‍ കോര്‍ട്ടുകള്‍ തുടങ്ങിയ ലോകോത്തര സൗകര്യങ്ങള്‍ ഈ കാമ്പസിന്റെ പ്രത്യേകതയാണ്.

റോഷന്‍ ഫ്രണ്ടിലെ എന്‍ട്രന്‍സ് 3-ന് സമീപത്തായി സ്ഥിതി ചെയ്യുന്ന പാരന്റ് എക്‌സ്പീരിയന്‍സ് സെന്ററില്‍ രക്ഷിതാക്കള്‍ക്ക് സന്ദര്‍ശനം നടത്താവുന്നതാണ്. സ്‌കൂള്‍ പ്രിന്‍സിപ്പല്‍ ജാക്വലിന്‍ ഡോറനുമായി കൂടിക്കാഴ്ച നടത്താനും, 3D മോഡലുകളിലൂടെ പുതിയ കാമ്പസ് നേരിട്ട് കാണാനും ഇവിടെ അവസരമുണ്ട്.

കൂടാതെ, രക്ഷിതാക്കള്‍ക്കായി 'മര്‍ഹബ മോണിങ്സ്', 'പ്രിന്‍സിപ്പല്‍ ആഫ്റ്റര്‍നൂണ്‍ ടീ' തുടങ്ങിയ കമ്മ്യൂണിറ്റി പരിപാടികളും ഇവിടെ നടക്കും. വെള്ളി ഒഴികെയുള്ള ദിവസങ്ങളില്‍ കേന്ദ്രം തുറന്നുപ്രവര്‍ത്തിക്കും. കൂടുതല്‍ വിവരങ്ങള്‍ക്ക് +966 57 949 0006 എന്ന നമ്പറിലോ edraAdmissions@KingsCollegeRiyadh.com എന്ന ഇമെയില്‍ വിലാസത്തിലോ ബന്ധപ്പെടാവുന്നതാണ്.