തിരുവനന്തപുരം: ലോകമെമ്പാടുമുള്ള പ്രവാസി കേരളീയര്‍ക്കായി നോര്‍ക്ക റൂട്ട്‌സ് ഏര്‍പ്പെടുത്തിയിട്ടുള്ള വിവിധ സേവനങ്ങളെക്കുറിച്ച് അവബോധം സൃഷ്ടിക്കുന്നതിനായി ജൂണ്‍ 15 മുതല്‍ ജൂലൈ 15 വരെ 'പ്രചാരണ മാസാചരണം' സംഘടിപ്പിക്കുന്നു. 'കരുതല്‍, സുരക്ഷ, അംഗീകാരം' എന്ന പ്രമേയത്തിലൂന്നിയാണ് ഇത്തവണത്തെ പ്രവര്‍ത്തനങ്ങള്‍.

വിദേശത്ത് ജോലി ചെയ്യുന്നവര്‍ക്കും താമസിക്കുന്നവര്‍ക്കുമായുള്ള പ്രവാസി ഐഡി കാര്‍ഡ്, വിദേശത്ത് പഠിക്കുന്ന വിദ്യാര്‍ത്ഥികള്‍ക്കായുള്ള സ്റ്റുഡന്റ് ഐഡി കാര്‍ഡ്, ഇന്ത്യയിലെ മറ്റ് സംസ്ഥാനങ്ങളില്‍ താമസിക്കുന്നവര്‍ക്കായുള്ള എന്‍.ആര്‍.കെ ഐഡി കാര്‍ഡ്, ഗുരുതര രോഗങ്ങള്‍ക്കുള്ള പ്രവാസി രക്ഷ ഇന്‍ഷുറന്‍സ് എന്നിവയെക്കുറിച്ചുള്ള അറിവ് പ്രവാസികളിലേക്ക് എത്തിക്കുകയാണ് ഈ മാസാചരണത്തിന്റെ പ്രധാന ലക്ഷ്യം.

ഐഡി കാര്‍ഡുകള്‍ പുതുക്കുന്നതിനും സംശയങ്ങള്‍ ദൂരീകരിക്കുന്നതിനും ഈ കാലയളവ് പ്രവാസികള്‍ക്ക് പ്രയോജനപ്പെടുത്താവുന്നതാണെന്ന് നോര്‍ക്ക റൂട്ട്‌സ് അധികൃതര്‍ അറിയിച്ചു. പ്രവാസികളെ കണ്ടെത്തുന്നതിനും അത്യാവശ്യഘട്ടങ്ങളില്‍ സര്‍ക്കാര്‍ ഇടപെടലുകള്‍ സുഗമമാക്കുന്നതിനും ഈ കാര്‍ഡുകള്‍ വലിയ പങ്കുവഹിക്കുന്നു.

ഇന്‍ഷുറന്‍സ് പരിരക്ഷ ഇപ്രകാരം:
ഐഡി കാര്‍ഡ് സേവനങ്ങള്‍: 408 രൂപയുടെ ഒറ്റത്തവണ പ്രീമിയത്തിലൂടെ അപകട മരണത്തിന് അഞ്ച് ലക്ഷം രൂപയും, അംഗവൈകല്യങ്ങള്‍ക്ക് രണ്ട് ലക്ഷം രൂപ വരെയും ഇന്‍ഷുറന്‍സ് പരിരക്ഷ ലഭിക്കും. ഇതിന് മൂന്ന് വര്‍ഷത്തെ കാലാവധിയാണുള്ളത്.

പ്രവാസി രക്ഷ ഇന്‍ഷുറന്‍സ്: 661 രൂപയുടെ ഒറ്റത്തവണ പ്രീമിയത്തിലൂടെ ഗുരുതര രോഗങ്ങള്‍ക്ക് ഒരു ലക്ഷം രൂപ വരെയും, അപകട മരണത്തിന് മൂന്ന് ലക്ഷം രൂപയും, അംഗവൈകല്യങ്ങള്‍ക്ക് ഒരു ലക്ഷം രൂപ വരെയും പരിരക്ഷ ലഭിക്കും. ഇതിന് ഒരു വര്‍ഷമാണ് കാലാവധി.

നോര്‍ക്ക കെയര്‍, നോര്‍ക്ക കെയര്‍ പ്ലസ് തുടങ്ങിയ ആരോഗ്യ ഇന്‍ഷുറന്‍സ് പദ്ധതികളില്‍ എന്റോള്‍ ചെയ്യുന്നതിന് നോര്‍ക്ക ഐഡി കാര്‍ഡ് നിര്‍ബന്ധമാണ്. സേവനങ്ങള്‍ക്കായി www.norkaroots.kerala.gov.in എന്ന വെബ്‌സൈറ്റ് സന്ദര്‍ശിക്കാവുന്നതാണ്.

കൂടുതല്‍ വിവരങ്ങള്‍ക്ക് നോര്‍ക്കയുടെ 24 മണിക്കൂര്‍ പ്രവര്‍ത്തിക്കുന്ന ഗ്ലോബല്‍ കോണ്‍ടാക്ട് സെന്ററുമായി ബന്ധപ്പെടാം. ഇന്ത്യയില്‍ നിന്നും 1800 425 3939 എന്ന ടോള്‍ ഫ്രീ നമ്പറിലും, വിദേശത്തുനിന്നും +91-8802012345 എന്ന നമ്പറിലും (മിസ്ഡ് കോള്‍ സര്‍വീസ്) ബന്ധപ്പെടാവുന്നതാണെന്ന് അധികൃതര്‍ അറിയിച്ചു.