ജിദ്ദ: വിശുദ്ധ ഹജ്ജ് കര്‍മ്മം പൂര്‍ത്തിയാക്കിയ മലപ്പുറം ജില്ലാ മുസ്ലിം ലീഗ് വൈസ് പ്രസിഡന്റ് കളത്തില്‍ കുഞ്ഞാപ്പു ഹാജിക്ക് ജിദ്ദ വണ്ടൂര്‍ മണ്ഡലം കെഎംസിസി കമ്മിറ്റി ഉജ്ജ്വല സ്വീകരണം നല്‍കി. ഷറഫിയ കെഎംസിസി ഓഡിറ്റോറിയത്തില്‍ നടന്ന പരിപാടി ശറഫുദ്ദീന്‍ ചോക്കാടിന്റെ ഖിറാഅത്തോടെ ആരംഭിച്ചു. വണ്ടൂര്‍ മണ്ഡലം കെഎംസിസി ട്രഷറര്‍ ശംസു ഇല്ലിക്കുത്ത് അധ്യക്ഷത വഹിച്ച ചടങ്ങില്‍, മണ്ഡലം വൈസ് ചെയര്‍മാന്‍ മുഹ്‌ളാര്‍ തങ്ങള്‍ സ്വാഗതം ആശംസിച്ചു. ജിദ്ദ സെന്‍ട്രല്‍ കെഎംസിസി കമ്മിറ്റി സെക്രട്ടറി സാബില്‍ മമ്പാട് പരിപാടി ഉദ്ഘാടനം ചെയ്തു.
ചടങ്ങില്‍ ജിദ്ദ മലപ്പുറം ജില്ലാ കെഎംസിസി ജനറല്‍ സെക്രട്ടറി നാണി ഇസ്ഹാഖ്, ജില്ലാ വൈസ് പ്രസിഡന്റ് അഷ്‌റഫ് മുല്ലപ്പള്ളി, ജില്ലാ സീനിയര്‍ വൈസ് പ്രസിഡന്റ് സലീം മമ്പാട്, ജില്ലാ വൈസ് പ്രസിഡന്റ് അബൂട്ടി നിലമ്പൂര്‍, വണ്ടൂര്‍ മണ്ഡലം കെഎംസിസി വൈസ് ചെയര്‍മാന്‍ യൂസുഫ് കൂരിക്കല്‍ എന്നിവര്‍ മുഖ്യാതിഥികളായി പങ്കെടുത്ത് ആശംസകള്‍ നേര്‍ന്നു.
മണ്ഡലത്തിലെ വിവിധ പഞ്ചായത്തുകളെ പ്രതിനിധീകരിച്ച് ഹസ്സന്‍ (കരുവാരകുണ്ട് വൈസ് പ്രസിഡന്റ്), റഫീഖ് (തുവ്വൂര്‍ വൈസ് പ്രസിഡന്റ്), അനസ് (കാളികാവ് ഓര്‍ഗനൈസിങ് സെക്രട്ടറി), റാഫി (വണ്ടൂര്‍ ജനറല്‍ സെക്രട്ടറി), ശറഫു (ചോക്കാട് ജോയിന്റ് സെക്രട്ടറി), അബ്ദുല്‍ ഇലാഹ് (മമ്പാട് വൈസ് പ്രസിഡന്റ്), ഗഫാര്‍ മട്ടുമ്മല്‍ (കരുവാരകുണ്ട് ഓര്‍ഗനൈസിങ് സെക്രട്ടറി) എന്നിവര്‍ സംസാരിച്ചു. വണ്ടൂര്‍ മണ്ഡലം കെഎംസിസി ഭാരവാഹികള്‍ ചേര്‍ന്ന് ചെയര്‍മാന്‍ യൂസുഫ് കൂരിക്കല്‍ മുഖേന കളത്തില്‍ കുഞ്ഞാപ്പു ഹാജിക്ക് പൊന്നാട അണിയിച്ച് ആദരിച്ചു.
സ്വീകരണത്തിന് നന്ദി പറഞ്ഞുകൊണ്ട് കളത്തില്‍ കുഞ്ഞാപ്പു ഹാജി മറുപടി പ്രസംഗം നടത്തി. പ്രവാസ ലോകത്ത് കെഎംസിസി നടത്തുന്ന കാരുണ്യപ്രവര്‍ത്തനങ്ങള്‍ ഏറെ പ്രശംസനീയമാണെന്ന് അദ്ദേഹം പറഞ്ഞു. മലപ്പുറം ജില്ലയിലും വണ്ടൂര്‍ മണ്ഡലത്തിലും യു.ഡി.എഫ് കൈവരിച്ച ഉജ്ജ്വല വിജയം പ്രവര്‍ത്തകരുടെ കഠിനാധ്വാനത്തിന്റെ ഫലമാണെന്ന് അദ്ദേഹം അനുസ്മരിു. വണ്ടൂര്‍ മണ്ഡലത്തിലെ വികസന ആവശ്യങ്ങളും ജനങ്ങളുടെ പ്രശ്‌നങ്ങളും എം.എല്‍.എയുടെ ശ്രദ്ധയില്‍പ്പെടുത്തി ആവശ്യമായ നടപടികള്‍ സ്വീകരിക്കുമെന്നും വികസന കാര്യങ്ങളില്‍ ശക്തമായ ഇടപെടല്‍ നടത്തുമെന്നും അദ്ദേഹം പ്രവാസികള്‍ക്ക് ഉറപ്പുനല്‍കി. വണ്ടൂര്‍ മണ്ഡലം കെഎംസിസി ഭാരവാഹി ഹാരിസ് ബാബു നന്ദി രേഖപ്പെടുത്തി.
