റിയാദ്: രാജ്യത്തെ വിവിധ പൊതുമേഖലാ സ്ഥാപനങ്ങള്‍ക്കായി സമഗ്രവും തന്ത്രപരവുമായ നിര്‍ദ്ദേശങ്ങള്‍ മുന്നോട്ടുവെച്ച് സൗദി ശൂറാ കൗണ്‍സില്‍. ജനങ്ങളുടെ സുരക്ഷ, സാമ്പത്തിക വൈവിധ്യവല്‍ക്കരണം, അത്യാധുനിക സാങ്കേതിക വിദ്യകളുടെ സംയോജനം എന്നിവയ്ക്ക് മുന്‍ഗണന നല്‍കുന്നതാണ് പുതിയ തീരുമാനങ്ങള്‍.
ഹൈവേകളില്‍ വെളിച്ചം; റോഡ് സുരക്ഷ ഉറപ്പാക്കും
രാജ്യത്തെ വിവിധ പ്രദേശങ്ങളെ ബന്ധിപ്പിക്കുന്ന പ്രധാന ഹൈവേകളില്‍ ലൈറ്റിംഗ് പോസ്റ്റുകള്‍ സ്ഥാപിച്ച് റോഡ് സുരക്ഷ വര്‍ദ്ധിപ്പിക്കാനും അതുവഴി വാഹനാപകട മരണനിരക്ക് കുറയ്ക്കാനും ജനറല്‍ അതോറിറ്റി ഫോര്‍ റോഡ്സിനോട് ശൂറാ കൗണ്‍സില്‍ ആവശ്യപ്പെട്ടു. വരുമാന സ്രോതസ്സുകള്‍ വൈവിധ്യവല്‍ക്കരിക്കുന്നതിനും സാമ്പത്തിക സുസ്ഥിരത കൈവരിക്കുന്നതിനുമായി റോഡുകളില്‍ പുതിയ നിക്ഷേപ അവസരങ്ങള്‍ കണ്ടെത്താന്‍ പഠനങ്ങള്‍ നടത്തണം. കൂടാതെ, പദ്ധതികള്‍ പരാജയപ്പെടാനുള്ള സാധ്യതകള്‍ മുന്‍കൂട്ടി പ്രവചിക്കാന്‍ സഹായിക്കുന്ന 'ഏര്‍ലി വാണിംഗ്' സൂചകങ്ങളും ഡാറ്റാ അനാലിസിസും ഉള്‍പ്പെടുത്തിയുള്ള പ്രോജക്ട് റിസ്‌ക് മാനേജ്മെന്റ് സിസ്റ്റം വികസിപ്പിക്കാനും നിര്‍ദ്ദേശമുണ്ട്.
വൈദ്യുതി വിപണിയും സാമ്പത്തിക വിപണിയും ശക്തമാക്കും
ഹോള്‍സെയില്‍ വൈദ്യുതി വില്‍പ്പന പ്രോത്സാഹിപ്പിക്കുന്നതിനായി തെര്‍മല്‍, പുനരുപയോഗ ഊര്‍ജ്ജ നിലയങ്ങള്‍ക്കായി ഒരു 'അവൈലബിലിറ്റി ഇന്‍ഡെക്സ്' തയ്യാറാക്കാന്‍ സൗദി ഇലക്ട്രിസിറ്റി റെഗുലേറ്ററി അതോറിറ്റിയോട് കൗണ്‍സില്‍ ആവശ്യപ്പെട്ടു. സര്‍ക്കാര്‍ സ്ഥാപനങ്ങളില്‍ ബാക്കപ്പ് വൈദ്യുതി ഉറപ്പാക്കാനും ജനവാസ മേഖലകളിലെ സബ്‌സ്റ്റേഷനുകളുടെ ബാഹ്യരൂപം മനോഹരമാക്കാനും നിര്‍ദ്ദേശമുണ്ട്.
മൂലധന വിപണി അതോറിറ്റിയോട് കമ്പനികളുടെ സാമ്പത്തിക പ്രസ്താവനകള്‍ മുന്‍കൂട്ടി നിരീക്ഷിക്കാനും നിയമപരമായ പരിശോധന നേരിടുന്ന കമ്പനികളുടെ വ്യാപാരം താല്‍ക്കാലികമായി നിര്‍ത്തിവെക്കാനും ആവശ്യപ്പെട്ടു. നിക്ഷേപകരുടെ സംരക്ഷണം ഉറപ്പാക്കാന്‍ ഐപിഒ വില നിര്‍ണ്ണയ രീതികള്‍ പുനഃപരിശോധിക്കണം. സപ്ലൈ ചെയിന്‍ ഫിനാന്‍സിംഗിനും കമ്മോഡിറ്റി പ്രൈസിംഗിനുമായി ഫിന്‍ടെക് പരീക്ഷണ ലൈസന്‍സുകളും പ്രത്യേക ട്രേഡിംഗ് പ്ലാറ്റ്‌ഫോമുകളും വ്യാപിപ്പിക്കാനും കൗണ്‍സില്‍ ശുപാര്‍ശ ചെയ്തു. അതോടൊപ്പം, ലോജിസ്റ്റിക്സ് മേഖലയുടെ വികസനത്തിനായി സൗദി പോസ്റ്റ് കോര്‍പ്പറേഷന്‍ അപ്ഡേറ്റ് ചെയ്ത ഡാറ്റാബേസ് നിര്‍മ്മിക്കണമെന്നും ഫ്രാഞ്ചൈസി മോഡലുകള്‍ വികസിപ്പിക്കണമെന്നും ആവശ്യപ്പെട്ടു.
കാലാവസ്ഥാ വ്യതിയാന പഠനത്തിന് നിര്‍മ്മിത ബുദ്ധി
കാലാവസ്ഥാ പ്രവചനവും അന്തരീക്ഷ പ്രതിഭാസങ്ങളും കൂടുതല്‍ കൃത്യമായി വിലയിരുത്തുന്നതിന് പരമ്പരാഗത രീതികള്‍ക്കൊപ്പം ആര്‍ട്ടിഫിഷ്യല്‍ ഇന്റലിജന്‍സ് കൂടി സംയോജിപ്പിച്ചുള്ള ഹൈബ്രിഡ് സംവിധാനങ്ങള്‍ സ്വീകരിക്കാന്‍ നാഷണല്‍ സെന്റര്‍ ഫോര്‍ മെറ്റീരിയോളജിയോട് കൗണ്‍സില്‍ ആവശ്യപ്പെട്ടു. ഈ രംഗത്തെ കഴിവുകള്‍ വികസിപ്പിക്കുന്നതിനായി ഒരു പ്രത്യേക പരിശീലന കേന്ദ്രം സ്ഥാപിക്കാനും നിര്‍ദ്ദേശമുണ്ട്. ഖനന മേഖലയിലെ ചെലവുകള്‍ ആഗോള നിലവാരവുമായി താരതമ്യം ചെയ്യാനും നിക്ഷേപ നേട്ടങ്ങളുമായി ബന്ധിപ്പിക്കാനും സൗദി ജിയോളജിക്കല്‍ സര്‍വേയോട് ആവശ്യപ്പെട്ടു.
ചരിത്ര-സാംസ്‌കാരിക-പരിസ്ഥിതി സംരക്ഷണത്തിനും ശൂറാ കൗണ്‍സില്‍ ഊന്നല്‍ നല്‍കി. ചെങ്കടലിലെ പവിഴപ്പുറ്റുകളുടെയും ആമകളുടെയും സംരക്ഷണത്തിനായുള്ള അതോറിറ്റി തീരദേശ വിനോദസഞ്ചാര-വാണിജ്യ ലൈസന്‍സുകള്‍ നല്‍കുമ്പോള്‍ പരിസ്ഥിതി സൗഹൃദ മാനദണ്ഡങ്ങള്‍ കര്‍ശനമാക്കണം. കൂടാതെ, കുതിരപ്പന്തയങ്ങളുടെ ടെലിവിഷന്‍ സംപ്രേക്ഷണ നിലവാരം ഉയര്‍ത്താനും സൗദിയുടെ ചരിത്ര രേഖകള്‍ കിംഗ് അബ്ദുല്‍ അസീസ് ഫൗണ്ടേഷന്‍ വഴി അന്താരാഷ്ട്ര തലത്തില്‍ കൂടുതല്‍ ലഭ്യമാക്കാനും ശൂറാ കൗണ്‍സില്‍ നിര്‍ദ്ദേശിച്ചു.
Related News
