മക്ക: ഈ വര്‍ഷത്തെ വിശുദ്ധ ഹജ്ജ് കര്‍മ്മങ്ങള്‍ വിജയകരമായി പൂര്‍ത്തിയാക്കി ഇറാനില്‍ നിന്നുള്ള തീര്‍ഥാടകര്‍ സ്വദേശത്തേക്ക് മടങ്ങാന്‍ ആരംഭിച്ചു. തിങ്കളാഴ്ച മുതലാണ് മടക്കയാത്രാ വിമാന സര്‍വീസുകള്‍ തുടങ്ങിയത്. സൗദി സര്‍ക്കാര്‍ ഒരുക്കിയ വിപുലമായ സൗകര്യങ്ങളിലും മികച്ച സേവനങ്ങളിലും പൂര്‍ണ്ണ തൃപ്തി രേഖപ്പെടുത്തിയാണ് തീര്‍ഥാടകരുടെ മടക്കം.
ഈ വര്‍ഷം ഇറാനില്‍ നിന്ന് ഏകദേശം 30,000 തീര്‍ഥാടകരാണ് ഹജ്ജ് നിര്‍വഹിച്ചതെന്ന് സൗദിയിലെ ഇറാന് സ്ഥാനപതി ഡോ. അലിറെസ ഇനായത്തി അറിയിച്ചു. ഇറാന് അനുവദിച്ച ആകെ ക്വാട്ടയുടെ മൂന്നിലൊന്ന് ഭാഗമാണിത്.
'തിങ്കളാഴ്ച ആരംഭിച്ച വിമാന സര്‍വീസുകള്‍ ഈ മാസാവസാനം വരെ തുടരും. മറ്റ് രാജ്യങ്ങളില്‍ നിന്നുള്ള തീര്‍ഥാടകരെപ്പോലെ തന്നെ ഇറാനിയന്‍ തീര്‍ഥാടകര്‍ക്കും സൗദിയില്‍ വന്‍ വരവേല്‍പ്പും ആതിഥ്യ മര്യാദയുമാണ് ലഭിച്ചത്. സമാധാനപരമായും സുരക്ഷിതമായും ഹജ്ജ് കര്‍മ്മങ്ങള്‍ പൂര്‍ത്തിയാക്കി അവര്‍ ഇപ്പോള്‍ സംതൃപ്തിയോടെ മടങ്ങുകയാണ്.' ഡോ. അലിറെസ ഇനായത്തി (സൗദിയിലെ ഇറാന് സ്ഥാനപതി) പറഞ്ഞു.
തീര്‍ഥാടകര്‍ പൂര്‍ണ്ണമായും വിമാനമാര്‍ഗ്ഗമാണ് സൗദിയിലെത്തിയതെന്നും മടക്കയാത്രയും വ്യോമമാര്‍ഗ്ഗം തന്നെയായിരിക്കുമെന്നും അദ്ദേഹം വ്യക്തമാക്കി. മുന്‍കൂട്ടി നിശ്ചയിച്ച സമയവിവരപ്പട്ടിക പ്രകാരം വിമാന സര്‍വീസുകള്‍ കൃത്യമായി നടക്കുന്നുണ്ടെന്നും അതിനാല്‍ റോഡ് മാര്‍ഗ്ഗമുള്ള യാത്രയുടെ ആവശ്യമില്ലെന്നും അദ്ദേഹം കൂട്ടിച്ചേര്‍ത്തു.
ഈ വര്‍ഷത്തെ ഹജ്ജ് വേളയില്‍ ഇറാനിയന്‍ തീര്‍ഥാടകര്‍ക്കൊപ്പം മുഴുവന്‍ സമയവും സ്ഥാനപതിയും പങ്കുചേര്‍ന്നിരുന്നു. വിശുദ്ധ നഗരങ്ങളായ മക്കയിലും മദീനയിലും പുണ്യസ്ഥലങ്ങളിലും സൗദി ഭരണകൂടം ഒരുക്കിയ അത്യാധുനിക സംവിധാനങ്ങളും വിപുലമായ സൗകര്യങ്ങളും കാരണം തീര്‍ഥാടകര്‍ക്ക് യാതൊരുവിധ ബുദ്ധിമുട്ടുകളും കൂടാതെ, തികച്ചും സമാധാനപരമായ അന്തരീക്ഷത്തില്‍ കര്‍മ്മങ്ങള്‍ പൂര്‍ത്തിയാക്കാന്‍ സാധിച്ചതായും അദ്ദേഹം പ്രത്യേകം പ്രശംസിച്ചു.
Related News
