ജിദ്ദ: ജിദ്ദയിലെ ലുലു ഹൈപ്പര്‍മാര്‍ക്കറ്റ് ബഗ്ദാദിയയും സ്വരലയ കലാവേദി ജിദ്ദയും ചേര്‍ന്ന് സംഘടിപ്പിച്ച ''ലൈലാലി അല്‍ ഈദ്'' എന്ന കലാ-സാംസ്‌കാരിക മഹോത്സവം ബഗ്ദാദിയ ലുലു ഹൈപ്പര്‍മാര്‍ക്കറ്റില്‍ വര്‍ണാഭമായി നടന്നു. ഈദ് സന്തോഷത്തിന്റെ താളത്തില്‍ കലയും സംഗീതവും സാഹിത്യവും ഒത്തുചേര്‍ന്നപ്പോള്‍ പ്രവാസലോകത്തിന് അത് ഹൃദയസ്പര്‍ശിയായ ഒരു അനുഭവമായി മാറി.
അറബിക്-ഇംഗ്ലീഷ് കഥാരചന, കളറിംഗ്, പെയിന്റിംഗ്, സൂപ്പര്‍ സിംഗിംഗ്, മെഹന്തി മത്സരങ്ങളില്‍ നിരവധി വിദ്യാര്‍ത്ഥികള്‍ ആവേശത്തോടെ പങ്കെടുത്തു. വിവിധ രാജ്യങ്ങളില്‍ നിന്നുള്ള കുട്ടികളുടെ പങ്കാളിത്തം പരിപാടിക്ക് അന്താരാഷ്ട്ര നിലവാരവും വൈവിധ്യവും പകര്‍ന്നു. കുഞ്ഞു പ്രതിഭകള്‍ തങ്ങളുടെ നിറങ്ങളാലും വാക്കുകളാലും ഗാനങ്ങളാലും വേദിയെ സജീവമാക്കി.
പരിപാടിയുടെ വിജയത്തിന് ബാദ്ഷാ, ഷാജി, നാസര്‍ മോങ്ങം, ശ്രീധ ടീച്ചര്‍, മറിയം ടീച്ചര്‍, റാഫി, ഹാരിസ് എന്നിവര്‍ നേതൃത്വം നല്‍കി. മത്സരങ്ങളില്‍ വിജയിച്ച വിദ്യാര്‍ത്ഥികള്‍ക്ക് ലുലു ഹൈപ്പര്‍മാര്‍ക്കറ്റ് വക സമ്മാനങ്ങള്‍ വിതരണം ചെയ്തു. മത്സരങ്ങളുടെ വിധിനിര്‍ണയ ചുമതല ഷാക്കിറ അസീസ്, കുബ്രാ ലത്തീഫ്, സലീന മുസാഫിര്‍ എന്നിവര്‍ നിര്‍വ്വഹിച്ചു. ലുലു ഹൈപ്പര്‍മാര്‍ക്കറ്റ് ബഗ്ദാദിയ മാനേജര്‍മാരായ അന്‍സാരി, അമര്‍നാഥ്, റോഷ്‌ന എന്നിവര്‍ പരിപാടിക്ക് പൂര്‍ണ്ണ പിന്തുണയുമായി സജീവമായി പങ്കെടുത്തു.
തുടര്‍ന്ന് നടന്ന സംഗീത പരിപാടിയില്‍ റൈസ, അബ്ദുള്ള, വസീം, നിസാര്‍ കരുനാഗപ്പള്ളി എന്നിവര്‍ അവതരിപ്പിച്ച ഗാനങ്ങള്‍ വേദിയെ സംഗീതസാന്ദ്രമാക്കി. കല, സംഗീതം, സാഹിത്യം, സൗഹൃദം എന്നിവയുടെ സമന്വയമായി മാറിയ ഈ സാംസ്‌കാരിക സംഗമം പ്രവാസി സമൂഹത്തിന്റെ ഹൃദയങ്ങളില്‍ മറക്കാനാവാത്ത ഒരു ഓര്‍മ്മയായി മാറി.
