മക്ക: ഇത്തവണത്തെ ഹജ്ജ് കര്‍മ്മങ്ങള്‍ ലോകത്തിന് മുന്നിലെത്തിക്കാന്‍ 150-ലധികം അന്താരാഷ്ട്ര മാധ്യമസ്ഥാപനങ്ങളില്‍ നിന്നായി മൂവായിരത്തിലധികം മാധ്യമപ്രവര്‍ത്തകര്‍ മക്കയിലെത്തി. കിംഗ്ഡംസ് യൂണിഫൈഡ് ഹജ്ജ് മീഡിയ ഓപ്പറേഷന്‍സ് സെന്റര്‍ സംഘടിപ്പിച്ച ആദ്യ വാര്‍ത്താസമ്മേളനത്തില്‍ സെന്റര്‍ ചെയര്‍മാന്‍ സ്വാലിഹ് അല്‍ തുബൈതിയാണ് ഇക്കാര്യം അറിയിച്ചത്.

ഹജ്ജ് സീസണുമായി ബന്ധപ്പെട്ട് വിവിധ ഭാഷകളിലായി 6,400-ലധികം മീഡിയ മെറ്റീരിയലുകള്‍ സെന്റര്‍ ഇതിനകം പുറത്തിറക്കിയിട്ടുണ്ട്. ലോകമെമ്പാടുമുള്ള മാധ്യമങ്ങളിലൂടെ ഏകദേശം 11 ബില്യണ്‍ കാഴ്ചക്കാരിലേക്ക് ഹജ്ജ് വാര്‍ത്തകള്‍ എത്തിയതായും അദ്ദേഹം വ്യക്തമാക്കി. മാധ്യമപ്രവര്‍ത്തകര്‍ക്ക് തത്സമയ സംപ്രേഷണത്തിനും റിപ്പോര്‍ട്ടിംഗിനുമായി മക്ക ചേംബര്‍ എക്‌സിബിഷന്‍ സെന്ററില്‍ ഹജ്ജ് മീഡിയ ഹബ്ബ് സജ്ജീകരിച്ചിട്ടുണ്ട്. ഇവിടെ 1,500-ലധികം ഇന്ററാക്ടീവ് സ്‌ക്രീനുകളിലൂടെ ഹജ്ജ് പദ്ധതികളുടെ വിവരങ്ങള്‍ ലഭ്യമാണ്. ഹജ്ജ് റിപ്പോര്‍ട്ടിംഗിന്റെ നിലവാരം ഉയര്‍ത്തുന്നതിനായി സൗദി മീഡിയ അക്കാദമി വിവിധ പരിശീലന പരിപാടികളും വര്‍ക്ക്‌ഷോപ്പുകളും സംഘടിപ്പിച്ചിരുന്നു.

തീര്‍ത്ഥാടകരെ സഹായിക്കാന്‍ 1,11,000 ഉദ്യോഗസ്ഥരെയാണ് വിന്യസിച്ചിരിക്കുന്നത്്. കഴിഞ്ഞ വര്‍ഷം 91 ശതമാനം തീര്‍ത്ഥാടകരും സേവനങ്ങളില്‍ സംതൃപ്തി രേഖപ്പെടുത്തിയത് മുന്‍നിര്‍ത്തി കൂടുതല്‍ മികച്ച സൗകര്യങ്ങളാണ് ഇത്തവണ ഒരുക്കിയിരിക്കുന്നത്. 5,700 കിലോമീറ്ററിലധികം ദൈര്‍ഘ്യമുള്ള പൈപ്പ് ലൈനുകള്‍ വഴി ജലവിതരണം ഉറപ്പാക്കും. പ്രതിദിനം 10,000 ടണ്‍ മാലിന്യം നീക്കം ചെയ്യാനുള്ള വിപുലമായ ക്രമീകരണങ്ങളും ഒരുക്കിയിട്ടുണ്ട്.