തിരുവനന്തപുരം: കേരളത്തിന്റെ പുതിയ പ്രതിപക്ഷ നേതാവായി പിണറായി വിജയനെ സി.പി.എം സംസ്ഥാന സമിതി തിരഞ്ഞെടുത്തു. കോണ്‍ഗ്രസ് വി.ഡി. സതീശനെ മുഖ്യമന്ത്രിയായി തിരഞ്ഞെടുത്തതിന് പിന്നാലെയാണ്, പിണറായി വിജയനെ പ്രതിപക്ഷ നിരയെ നയിക്കാന്‍ സി.പി.എം നിയോഗിച്ചത്. വ്യാഴാഴ്ച ചേര്‍ന്ന സംസ്ഥാന സമിതി യോഗത്തില്‍ ഏകകണ്ഠമായാണ് ഈ തീരുമാനമെടുത്തത്.
തുടര്‍ച്ചയായി പത്തു വര്‍ഷം മുഖ്യമന്ത്രിയായിരുന്ന ശേഷമാണ് പിണറായി വിജയന്‍ ആദ്യമായി പ്രതിപക്ഷ നേതാവിന്റെ റോളിലെത്തുന്നത് എന്ന പ്രത്യേകതയുമുണ്ട്. നിയമസഭാ തിരഞ്ഞെടുപ്പില്‍ എല്‍.ഡി.എഫിനും സി.പി.എമ്മിനും കനത്ത തിരിച്ചടി നേരിട്ട സാഹചര്യത്തിലും, പിണറായി തന്നെ മുന്നില്‍ നിന്ന് നയിക്കട്ടെ എന്ന് പാര്‍ട്ടി തീരുമാനിക്കുകയായിരുന്നു.
പി.ബി അംഗവും മുതിര്‍ന്ന നേതാവുമായ പിണറായി സഭയിലുള്ളപ്പോള്‍ മറ്റാരെയും പരിഗണിക്കേണ്ടതില്ലെന്ന പൊതുവികാരം പാര്‍ട്ടിയില്‍ ഉയര്‍ന്നു. വി.ഡി. സതീശന്‍ മുഖ്യമന്ത്രിയായി അധികാരമേല്‍ക്കുന്ന പുതിയ രാഷ്ട്രീയ സാഹചര്യത്തില്‍ പരിചയസമ്പന്നനായ പിണറായി വിജയന്‍ പ്രതിപക്ഷത്തെ നയിക്കുന്നത് കരുത്താകുമെന്നാണ് പാര്‍ട്ടിയുടെ വിലയിരുത്തല്‍.
രണ്ടു തവണ മുഖ്യമന്ത്രിയായിരുന്ന പിണറായി വിജയന്‍ ആദ്യമായാണ് പ്രതിപക്ഷ നേതൃസ്ഥാനം ഏറ്റെടുക്കുന്നത് എന്നത് കേരള രാഷ്ട്രീയത്തിലെ ശ്രദ്ധേയമായ മാറ്റമായി വിലയിരുത്തപ്പെടുന്നു.
Related News
