ദുബായ്: ഇറാന്‍ കേന്ദ്രമായി നടന്ന യുദ്ധവും ഹോര്‍മുസ് കടലിടുക്കിലെ ഗതാഗത തടസ്സവും ദുബായിലെ വിനോദസഞ്ചാര-ഭക്ഷണ മേഖലയെ കടുത്ത പ്രതിസന്ധിയിലാക്കി. യുദ്ധത്തെത്തുടര്‍ന്ന് വിമാന ഇന്ധനവില വര്‍ധിച്ചതും ചരക്കുനീക്കം തടസ്സപ്പെട്ടതും ഇറക്കുമതി ചെയ്യുന്ന ഭക്ഷ്യവസ്തുക്കളുടെ വില കുതിച്ചുയരാന്‍ കാരണമായി. ഇതോടെ നഗരത്തിലെ പ്രമുഖ റെസ്റ്റോറന്റുകള്‍ പലതും മെനു പരിഷ്‌കരിക്കാനും ചെലവ് ചുരുക്കല്‍ നടപടികള്‍ സ്വീകരിക്കാനും നിര്‍ബന്ധിതരായിരിക്കുകയാണ്.
ദുബായിലെ പ്രശസ്തമായ 'ലീല മോളിനോ' മെക്‌സിക്കന്‍ റെസ്റ്റോറന്റിലെ ഷെഫ് ഷാ ലാഷ് പറയുന്നതനുസരിച്ച്, മെക്‌സിക്കന്‍ വിഭവങ്ങളിലെ പ്രധാന ചേരുവകളായ അവോക്കാഡോ, ടൊമാറ്റിലോ എന്നിവയുടെ ലഭ്യത കുറഞ്ഞു. ഹോര്‍മുസ് കടലിടുക്ക് വഴിയുള്ള സമുദ്രപാത അടഞ്ഞതോടെ വിമാനമാര്‍ഗ്ഗം സാധനങ്ങള്‍ എത്തിക്കേണ്ടി വരുന്നത് മുപ്പത് ശതമാനത്തിലധികം അധികച്ചെലവ് ഉണ്ടാക്കുന്നുണ്ട്.
പ്രതിസന്ധി മറികടക്കാന്‍ ഉല്‍പ്പാദനം കുറയ്ക്കുകയും ശമ്പളപ്പട്ടികയില്‍ നിയന്ത്രണം ഏര്‍പ്പെടുത്തുകയും ചെയ്തതായി ഷാ ലാഷ് പറഞ്ഞു. റെഡി-ടു-കുക്ക് കിറ്റുകളിലും ഗ്രോസറി ഉല്‍പ്പന്നങ്ങളിലും ശ്രദ്ധ കേന്ദ്രീകരിച്ചാണ് നിലവില്‍ ബിസിനസ് മുന്നോട്ട് കൊണ്ടുപോകുന്നത്.
ഇറക്കുമതി ചെയ്ത കടല്‍ വിഭവങ്ങള്‍ക്കും പച്ചക്കറികള്‍ക്കും വില വര്‍ധിച്ചതോടെ പല ഷെഫുമാരും പ്രാദേശികമായി ലഭ്യമായ ചേരുവകളിലേക്ക് മാറുകയാണ്. ഫ്യൂഷന്‍ റെസ്റ്റോറന്റായ 'ജുന്‍സ്' ഷെഫ് കെല്‍വിന്‍ ച്യൂങ്, പ്രാദേശിക മത്സ്യങ്ങള്‍ ഉപയോഗിച്ചുള്ള കുറഞ്ഞ നിരക്കിലുള്ള ആറ് കോഴ്‌സ് മെനു അവതരിപ്പിച്ചു. വിനോദസഞ്ചാരികളുടെ എണ്ണത്തില്‍ ഉണ്ടായ കുറവ് ബിസിനസ്സിനെ സാരമായി ബാധിച്ചതായും അദ്ദേഹം ചൂണ്ടിക്കാട്ടി.
മോര്‍ഡോര്‍ ഇന്റലിജന്‍സിന്റെ കണക്കനുസരിച്ച്, യുഎഇയിലെ ഭക്ഷണ വിപണി ഈ വര്‍ഷം 11.3 ബില്യണ്‍ ഡോളറിലേക്ക് വളരുമെന്നാണ് പ്രതീക്ഷിച്ചിരുന്നത്. എന്നാല്‍ യുദ്ധം ഈ കണക്കുകൂട്ടലുകള്‍ തെറ്റിച്ചു. ജാനിപ്പര്‍ സ്ട്രാറ്റജി നടത്തിയ സര്‍വേ പ്രകാരം ഭക്ഷണശാലകളിലെ ആവശ്യകതയില്‍ 27 ശതമാനം കുറവുണ്ടായി. വിതരണച്ചെലവില്‍ ശരാശരി 13 ശതമാനം വര്‍ധനവുണ്ടായി. ചില റൂട്ടുകളില്‍ എയര്‍ ഫ്രൈറ്റ് നിരക്ക് 70 ശതമാനം വരെ ഉയര്‍ന്നു.
ഏപ്രില്‍ എട്ടിലെ വെടിനിര്‍ത്തലിന് ശേഷം വിപണി പതുക്കെ സാധാരണ നിലയിലേക്ക് മടങ്ങുന്നുണ്ട്. ടൂറിസം മേഖലയെ ഉത്തേജിപ്പിക്കുന്നതിനായി ദുബായ് എക്കണോമി ആന്‍ഡ് ടൂറിസം ഡിപ്പാര്‍ട്ട്‌മെന്റ് വിവിധ പദ്ധതികള്‍ ആവിഷ്‌കരിച്ചിട്ടുണ്ട്. മെയ് മാസത്തില്‍ നടക്കാനിരിക്കുന്ന 'റെസ്റ്റോറന്റ് വീക്കി'ല്‍ ആകര്‍ഷകമായ ഓഫറുകള്‍ നല്‍കി ഉപഭോക്താക്കളെ തിരികെ എത്തിക്കാനാണ് അധികൃതരുടെ നീക്കം. കടുത്ത വെല്ലുവിളികള്‍ക്കിടയിലും ഐക്കണിക് ഹോട്ടലുകളും പുതിയ റസ്റ്റോറന്റുകളും പ്രവര്‍ത്തനമാരംഭിക്കുന്നത് വിപണിയുടെ ആത്മവിശ്വാസം വര്‍ധിപ്പിക്കുന്നു.
.jpg)
Related News
