ഇസ്ലാമാബാദ്: മുന്‍ പ്രധാനമന്ത്രി ഇമ്രാന്‍ ഖാന്റെ പാകിസ്ഥാന്‍ തെഹ്രീകെ ഇന്‍സാഫ് പാര്‍ട്ടി (പി.ടി.ഐ) യുമായി ദിവസങ്ങളായി നിലനിന്ന തര്‍ക്കങ്ങള്‍ക്കൊടുവില്‍, ഖൈബര്‍ പഖ്തൂണ്‍ഖ്വ പ്രവിശ്യയില്‍ പ്രധാനമന്ത്രി ഷെഹ്ബാസ് ഷെരീഫ് സര്‍ക്കാര്‍ അടിയന്തരാവസ്ഥയും ഗവര്‍ണര്‍ ഭരണവും ഏര്‍പ്പെടുത്തി. ഇതോടെ പ്രവിശ്യയിലെ പി.ടി.ഐ സര്‍ക്കാരും അധികാരത്തില്‍ നിന്ന് പുറത്തായി. ഭീകരവാദം രൂക്ഷമായതും ഭരണഘടനാപരമായ ഭരണം തകര്‍ന്നതും ചൂണ്ടിക്കാട്ടി പാകിസ്ഥാന്‍ ഭരണഘടനയിലെ 232, 234 അനുച്ഛേദങ്ങള്‍ പ്രകാരം പ്രസിഡന്റ് ആസിഫ് അലി സര്‍ദാരി ഈ നടപടിക്ക് അംഗീകാരം നല്‍കുകയായിരുന്നു.
ഈ തീരുമാനം ഇസ്ലാമാബാദിലെ കേന്ദ്ര സര്‍ക്കാരും ഇമ്രാന്‍ ഖാന്റെ പാര്‍ട്ടിയും തമ്മിലുള്ള ഏറ്റുമുട്ടല്‍ കൂടുതല്‍ രൂക്ഷമാക്കിയിട്ടുണ്ട്. നിയമം കൈയിലെടുക്കുന്ന പ്രതിഷേധക്കാര്‍ക്കെതിരെ പ്രവിശ്യാ ഗവര്‍ണര്‍ മുന്നറിയിപ്പ് നല്‍കി. അതേസമയം, അടിയന്തരാവസ്ഥ പ്രഖ്യാപിച്ചതിന് പിന്നാലെ മുഖ്യമന്ത്രി സുഹൈല്‍ അഫ്രീദിയെയും പാര്‍ട്ടി പ്രവിശ്യാ പ്രസിഡന്റ് ജുനൈദ് അക്ബറിനെയും അറസ്റ്റ് ചെയ്തതായി പി.ടി.ഐ നേതാക്കള്‍ ആരോപിച്ചു.
പാകിസ്ഥാന്‍ സൈനിക മേധാവി അസിം മുനീറിന്റെ പിന്തുണയോടെ പ്രവര്‍ത്തിക്കുന്ന ഷെഹ്ബാസ് ഷെരീഫ് സര്‍ക്കാര്‍, ഭീകരവാദത്തെ ചെറുക്കുന്നതില്‍ ഖൈബര്‍ പഖ്തൂണ്‍ഖ്വയിലെ പി.ടി.ഐ സര്‍ക്കാര്‍ പരാജയപ്പെട്ടുവെന്ന് ആരോപിച്ചു. 'ആരെങ്കിലും നിയമം കയ്യിലെടുത്താല്‍ ഇരുമ്പുമുഷ്ടി ഉപയോഗിച്ച് നേരിടും,' ഗവര്‍ണര്‍ ഫൈസല്‍ കരീം കുന്ദി വീഡിയോ സന്ദേശത്തില്‍ മുന്നറിയിപ്പ് നല്‍കി.
തടവിലിട്ടിരിക്കുന്ന പാര്‍ട്ടി സ്ഥാപകന്‍ ഇമ്രാന്‍ ഖാന്റെ മോചനം ആവശ്യപ്പെട്ട് മുഖ്യമന്ത്രി സുഹൈല്‍ അഫ്രീദിയുടെ നേതൃത്വത്തില്‍ പി.ടി.ഐ 'ലോങ് മാര്‍ച്ച്' സംഘടിപ്പിച്ചു വരുന്നതിനിടെയാണ് രാഷ്ട്രീയമായി ഏറെ പ്രാധാന്യമുള്ള ഈ അടിയന്തരാവസ്ഥ പ്രഖ്യാപനം. പ്രതിഷേധം ശക്തമാകുകയും പ്രക്ഷോഭകര്‍ ഇസ്ലാമാബാദിലേക്ക് കടക്കുന്നത് തടയാന്‍ അധികൃതര്‍ തയ്യാറെടുക്കുകയും ചെയ്ത ഘട്ടത്തിലാണ് ഈ നടപടി. ഇസ്ലാമാബാദില്‍ നിന്ന് 94 കിലോമീറ്റര്‍ അകലെയുള്ള സ്വാബി ഇന്റര്‍ചേഞ്ചിലേക്ക് പ്രതിഷേധക്കാര്‍ നീങ്ങുകയാണെന്ന് ശനിയാഴ്ച റിപ്പോര്‍ട്ടുകള്‍ വന്നിരുന്നു.
കേന്ദ്ര സര്‍ക്കാരിന്റെ തീരുമാനത്തെ തള്ളിക്കളഞ്ഞ പി.ടി.ഐ ചെയര്‍മാന്‍ ഗോഹര്‍ അലി ഖാന്‍, ഇത് 'തീര്‍ത്തും ആശങ്കാജനകവും ജനാധിപത്യവിരുദ്ധവുമായ ഗുരുതരമായ രാഷ്ട്രീയ തെറ്റാണ്' എന്ന് വിശേഷിപ്പിച്ചു. ഈ നീക്കം മേഖലയില്‍ സമാധാനം കൊണ്ടുവരുന്നതിന് പകരം കേന്ദ്രവും പ്രവിശ്യയും തമ്മിലുള്ള ഏറ്റുമുട്ടല്‍ വര്‍ദ്ധിപ്പിക്കുമെന്ന് അദ്ദേഹം മുന്നറിയിപ്പ് നല്‍കി.
.jpg)
Related News
