ഇസ്ലാമാബാദ്: പാകിസ്ഥാനില്‍ വിദേശ മാധ്യമപ്രവര്‍ത്തകര്‍ക്കായി പ്രാദേശിക മാധ്യമപ്രവര്‍ത്തകര്‍ സംഘടിപ്പിച്ച അനൗദ്യോഗിക ഒത്തുചേരല്‍ വലിയ രാഷ്ട്രീയ വിവാദത്തിന് തിരികൊളുത്തി. ഇസ്ലാമാബാദ് പ്രസ് ക്ലബ്ബില്‍ നടന്ന ചടങ്ങ് ഷെഹ്ബാസ് ഷെരീഫ് സര്‍ക്കാരിനും സൈനിക മേധാവി അസിം മുനീറിനും എതിരെ വിമര്‍ശനം ഉന്നയിക്കാനുള്ള വേദിയായി മാറിയതാണ് വിവാദത്തിന് കാരണം. അമേരിക്ക-ഇറാന്‍ സമാധാന ചര്‍ച്ചകള്‍ റിപ്പോര്‍ട്ട് ചെയ്യാനെത്തിയ വിദേശ മാധ്യമപ്രവര്‍ത്തകരെയാണ് ഒരു സംഘം പാകിസ്ഥാന്‍ ജേണലിസ്റ്റുകള്‍ വിരുന്നിനായി ക്ഷണിച്ചത്.
എന്നാല്‍, ചടങ്ങ് പാക് സര്‍ക്കാരിനെതിരായ രാഷ്ട്രീയ പ്രചാരണത്തിന് ഉപയോഗിച്ചതായി പങ്കെടുത്ത വിദേശ മാധ്യമപ്രവര്‍ത്തകര്‍ ആരോപിച്ചു. തങ്ങള്‍ 'ചതിക്കപ്പെട്ടെന്നും' രാഷ്ട്രീയ ആവശ്യങ്ങള്‍ക്കായി 'ഉപയോഗിക്കപ്പെട്ടെന്നും' ന്യൂയോര്‍ക്ക് പോസ്റ്റ് റിപ്പോര്‍ട്ടര്‍ കാറ്റ്ലിന്‍ ഡോണ്‍ബോസ് പറഞ്ഞു. പ്രമുഖ പാക് മാധ്യമപ്രവര്‍ത്തകരായ മതിയുല്ല ജാന്‍, അസദ് അലി ടൂര്‍ എന്നിവര്‍ പാകിസ്ഥാനിലെ മാധ്യമസ്വാതന്ത്ര്യത്തെക്കുറിച്ചും പീഡനങ്ങളെക്കുറിച്ചും സംസാരിക്കാന്‍ ഈ വേദി ഉപയോഗിച്ചു. വിദേശ മാധ്യമപ്രവര്‍ത്തകരുടെ ചിത്രം സര്‍ക്കാരിനെതിരായ പ്രസ്താവനകള്‍ക്കൊപ്പം പ്രചരിപ്പിച്ചതും പ്രതിഷേധത്തിന് കാരണമായി.
ചടങ്ങില്‍ വിതരണം ചെയ്ത ഷീല്‍ഡില്‍ ഇന്ത്യന്‍ പതാകയുടെ ചിത്രം ഉണ്ടായിരുന്നുവെന്നും റിപ്പോര്‍ട്ടുകളുണ്ട്. നാഷണല്‍ പ്രസ് ക്ലബ്ബിന്റെ ഔദ്യോഗിക പരിപാടിയാണെന്ന തോന്നിപ്പിക്കും വിധം ലോഗോ ഉപയോഗിച്ചതിനെയും വിദേശ റിപ്പോര്‍ട്ടര്‍മാര്‍ ചോദ്യം ചെയ്തു. തങ്ങള്‍ അതിഥികളായി എത്തിയ ഒരു രാജ്യത്തെ സര്‍ക്കാരിനെ വിമര്‍ശിക്കുന്ന തരത്തില്‍ തങ്ങളുടെ ചിത്രങ്ങള്‍ പ്രചരിപ്പിച്ചത് അംഗീകരിക്കാനാവില്ലെന്ന് ഡോണ്‍ബോസ് വ്യക്തമാക്കി. അതേസമയം, പാകിസ്ഥാനിലെ മാധ്യമപ്രവര്‍ത്തകര്‍ നേരിടുന്ന ഭീകരമായ അടിച്ചമര്‍ത്തലുകള്‍ തുറന്നുകാട്ടാനാണ് ശ്രമിച്ചതെന്ന് പ്രാദേശിക മാധ്യമപ്രവര്‍ത്തകര്‍ വാദിച്ചു.
സംഭവം വിവാദമായതിന് പിന്നാലെ പ്രമുഖ പാക് മാധ്യമപ്രവര്‍ത്തകന്‍ മതിയുല്ല ജാന്‍ 'നിയോ ന്യൂസ് ടിവി'യില്‍ നിന്നും രാജിവച്ചു. സര്‍ക്കാര്‍ സമ്മര്‍ദ്ദത്തെത്തുടര്‍ന്നാണ് നടപടിയെന്ന് ആരോപണമുണ്ട്. മുന്‍പും സമാനമായ സാഹചര്യങ്ങള്‍ തനിക്ക് നേരിടേണ്ടി വന്നിട്ടുണ്ടെന്ന് മതിയുല്ല ജാന്‍ പ്രതികരിച്ചു. വിദേശ മാധ്യമപ്രവര്‍ത്തകയുടെ സോഷ്യല്‍ മീഡിയ പോസ്റ്റുകളാണ് മതിയുല്ലയുടെ ജോലി നഷ്ടപ്പെടാന്‍ കാരണമായതെന്ന് സഹപ്രവര്‍ത്തകര്‍ കുറ്റപ്പെടുത്തി. ഷെരീഫ്-മുനീര്‍ ഭരണത്തിന് കീഴില്‍ പാകിസ്ഥാന്‍ മാധ്യമരംഗത്ത് നിലനില്‍ക്കുന്ന കടുത്ത ഭിന്നതയാണ് ഈ സംഭവം പുറത്തുകൊണ്ടുവരുന്നത്.
.jpg)
Related News
