ജിദ്ദ: നിലവിലെ യുദ്ധസാഹചര്യങ്ങളെ മുന്‍നിര്‍ത്തി അറബ് രാഷ്ട്രങ്ങളെ മോശമായി ചിത്രീകരിക്കുകയും ഷിയാ വിശ്വാസങ്ങളെ മഹത്വവല്‍ക്കരിക്കുകയും ചെയ്യുന്ന പ്രവണത വിശ്വാസികള്‍ നേരിടുന്ന വലിയ വെല്ലുവിളിയാണെന്ന് ഇസ്ലാഹീ പണ്ഡിതന്‍ അഹ്‌മദ് അനസ് മൗലവി അഭിപ്രായപ്പെട്ടു. ജിദ്ദ ഇന്ത്യന്‍ ഇസ്ലാഹീ സെന്ററില്‍ 'ഫിത്നകളുടെ കാലത്തെ വിശ്വാസിയുടെ നിലപാട്' എന്ന വിഷയത്തില്‍ പ്രഭാഷണം നടത്തുകയായിരുന്നു അദ്ദേഹം.
ഇറാന്‍ ആക്രമിക്കപ്പെട്ടതിനാല്‍ അവര്‍ മര്‍ദിതരാണെന്നും അതിനാല്‍ അവരെ പിന്തുണയ്ക്കണമെന്നുമാണ് ചിലരുടെ വാദം. എന്നാല്‍ ഈ ആക്രമണത്തിന്റെ പേരില്‍ അയല്‍പക്കത്തുള്ള അറബ് രാഷ്ട്രങ്ങളെ പ്രകോപനമില്ലാതെ ആക്രമിക്കുന്ന ഇറാന്‍, ഒരേസമയം മര്‍ദിതനും മര്‍ദകനുമാവുകയാണ്. മക്കയും മദീനയുമടക്കം കീഴടക്കുമെന്നും പ്രവാചക അനുയായികളായ അബൂബക്കര്‍ (റ), ഉമര്‍ (റ) എന്നിവരെ അധിക്ഷേപിക്കുമെന്നും പരസ്യമായി പ്രഖ്യാപിച്ച ഇക്കൂട്ടര്‍ കിട്ടുന്ന അവസരങ്ങളിലെല്ലാം അറബ് രാഷ്ട്രങ്ങളെ ആക്രമിക്കുകയാണെന്ന് അദ്ദേഹം പറഞ്ഞു.
ഫലസ്തീന്‍ ജനതയോട് സ്‌നേഹം പ്രകടിപ്പിക്കുന്നു എന്ന് അവകാശപ്പെടുന്ന ഇറാന്‍, യുദ്ധം നിര്‍ത്താന്‍ ഫലസ്തീന്‍ വിഷയം ഒരു ഉപാധിയായി പോലും മുന്നോട്ടുവെച്ചിട്ടില്ലെന്ന് നാം തിരിച്ചറിയണം. ഇറാക്കില്‍ അമേരിക്കന്‍ താല്‍പ്പര്യങ്ങള്‍ സംരക്ഷിക്കുന്ന പാവ സര്‍ക്കാരിനെ നയിക്കുന്നത് ഷിയാക്കളാണെന്ന വസ്തുത സാമ്രാജ്യത്വ വിരുദ്ധ പോരാട്ടത്തെക്കുറിച്ച് സംസാരിക്കുന്നവര്‍ മറക്കുന്നു. രാജ്യങ്ങളില്‍ ആഭ്യന്തര കലാപമുണ്ടാക്കി അവയെ നശിപ്പിക്കുക എന്ന സാമ്രാജ്യത്വ തന്ത്രത്തിന് ഇറാന്‍ ഇന്ന് ചൂട്ടുപിടിക്കുകയാണ്. വിവേകത്തോടെ കാര്യങ്ങള്‍ കൈകാര്യം ചെയ്യുന്ന അറബ് ഭരണാധികാരികളുടെ തണലില്‍ നിന്നുകൊണ്ടാണ് പലരും ഷിയാഇസത്തെ മഹത്വവല്‍ക്കരിക്കുന്നത്.
ചരിത്രപരമായി പേര്‍ഷ്യന്‍ ജനതയിലൂടെ ഉണ്ടായ മുന്നേറ്റങ്ങള്‍ ചൂണ്ടിക്കാട്ടി ഷിയാ വിശ്വാസമാണ് മികച്ചതെന്ന് പ്രചരിപ്പിക്കുന്നതില്‍ വസ്തുതയില്ല. 1501 വരെ സുന്നി ഭരണത്തിന് കീഴിലായിരുന്ന കാലത്താണ് ഇറാനില്‍ പുരോഗതികളുണ്ടായത്. ഷിയാക്കള്‍ ഭരണം പിടിച്ചതോടെ അവിടുത്തെ പ്രമുഖരായ പണ്ഡിതരും പ്രതിഭകളും നാടുവിടുകയാണുണ്ടായത്. ഇന്നും ലോകം പുരോഗതിക്കും തൊഴിലിനുമായി ആശ്രയിക്കുന്നത് അറബ് നാടുകളെയാണ്. രാഷ്ട്രീയ വിഷയങ്ങളുടെ മറവില്‍ യഥാര്‍ത്ഥ വിശ്വാസത്തില്‍ നിന്ന് വഴിതെറ്റിക്കാനുള്ള ശ്രമങ്ങളില്‍ വീണുപോകരുതെന്നും വസ്തുതകള്‍ സമൂഹത്തെ ബോധ്യപ്പെടുത്തണമെന്നും അദ്ദേഹം ഉണര്‍ത്തി.
പ്രഭാഷണത്തിന് ശേഷം ശ്രോതാക്കളുടെ സംശയങ്ങള്‍ക്ക് മൗലവി മറുപടി നല്‍കി. അബ്ബാസ് ചെമ്പന്‍ അധ്യക്ഷത വഹിച്ച ചടങ്ങില്‍ നൂരിഷ വള്ളിക്കുന്ന് സ്വാഗതവും ഷാഫി ആലപ്പുഴ നന്ദിയും പറഞ്ഞു.
Related News
