റിയാദ്: സൗദി അറേബ്യയുടെ ഈത്തപ്പഴ കയറ്റുമതിയില്‍ 2025-ല്‍ സര്‍വ്വകാല റെക്കോര്‍ഡ് നേട്ടം. കഴിഞ്ഞ വര്‍ഷം കയറ്റുമതി മൂല്യം 193.8 കോടി റിയാലിലെത്തിയതായി ഔദ്യോഗിക കണക്കുകള്‍ വ്യക്തമാക്കുന്നു. 2024-നെ അപേക്ഷിച്ച് 14.3 ശതമാനത്തിന്റെ വര്‍ദ്ധനവാണിത്. 2021 മുതലുള്ള കണക്കുകള്‍ പരിശോധിക്കുമ്പോള്‍ കയറ്റുമതിയില്‍ 59.5 ശതമാനത്തിന്റെ വന്‍ കുതിച്ചുചാട്ടമാണ് രാജ്യം കൈവരിച്ചിരിക്കുന്നത്.

സൗദി ഈത്തപ്പഴത്തിന് ആഗോളതലത്തില്‍ വര്‍ദ്ധിച്ചുവരുന്ന ആവശ്യകതയും ഉല്‍പ്പാദന മേഖലയിലെ കാര്യക്ഷമതയുമാണ് ഈ നേട്ടത്തിന് പിന്നിലെന്ന് വിലയിരുത്തപ്പെടുന്നു. സമ്പദ്വ്യവസ്ഥയെ വൈവിധ്യവല്‍ക്കരിക്കാനും ജി.ഡി.പിയില്‍ കാര്‍ഷിക മേഖലയുടെ വിഹിതം വര്‍ദ്ധിപ്പിക്കാനുമുള്ള സൗദി വിഷന്‍ 2030-ന്റെ ലക്ഷ്യങ്ങളിലേക്ക് ഈ നേട്ടം വലിയ സംഭാവനയാണ് നല്‍കുന്നത്.

ഭരണകൂടത്തിന്റെ അകമഴിഞ്ഞ പിന്തുണയും പൊതു-സ്വകാര്യ മേഖലകള്‍ തമ്മിലുള്ള ഫലപ്രദമായ സഹകരണവുമാണ് ഈ വിജയത്തിന് ആധാരമെന്ന് പരിസ്ഥിതി-ജല-കാര്‍ഷിക മന്ത്രിയും നാഷണല്‍ സെന്റര്‍ ഫോര്‍ പാംസ് ആന്‍ഡ് ഡേറ്റ്‌സ് ചെയര്‍മാനുമായ അബ്ദുറഹ്‌മാന്‍ അല്‍ഫദ്ലി പറഞ്ഞു. കയറ്റുമതി പ്രോത്സാഹിപ്പിക്കുന്നതിനായി നടപ്പിലാക്കിയ വിവിധ പദ്ധതികള്‍ വിപണി വ്യാപിപ്പിക്കാന്‍ സഹായിച്ചതായും അദ്ദേഹം കൂട്ടിച്ചേര്‍ത്തു.

നിലവില്‍ 125-ലധികം രാജ്യങ്ങളിലേക്കാണ് സൗദി അറേബ്യ ഈത്തപ്പഴം കയറ്റി അയക്കുന്നത്. 2025-ലെ കണക്കനുസരിച്ച് രാജ്യത്തുടനീളമുള്ള 3.7 കോടിയിലധികം ഈന്തപ്പനകളില്‍ നിന്നായി 19 ലക്ഷം ടണ്ണിലധികം ഉല്‍പ്പാദനമാണ് നടക്കുന്നത്. ഗുണനിലവാരത്തിലും ഉല്‍പ്പാദന അളവിലും പുലര്‍ത്തുന്ന ഈ മേധാവിത്വം ആഗോള വിപണിയില്‍ സൗദി ഈത്തപ്പഴത്തിന് വലിയ മത്സരക്ഷമത നല്‍കുന്നുണ്ട്.