കോട്ടയം: വിരമിച്ച മുതിര്‍ന്ന പോലീസ് ഉദ്യോഗസ്ഥന്‍ ടോമിന്‍ തച്ചങ്കരി, തന്റെ വാഹനത്തില്‍ ഔദ്യോഗിക പദവിയെ സൂചിപ്പിക്കുന്ന നക്ഷത്രങ്ങള്‍ അനധികൃതമായി പ്രദര്‍ശിപ്പിച്ചത് വിവാദത്തിലേക്ക്. നിയമത്തെക്കുറിച്ച് വ്യക്തമായ ധാരണയുള്ള ഒരു മുന്‍ ഡിജിപി തന്നെ ഇത്തരത്തില്‍ നിയമലംഘനം നടത്തിയത് അങ്ങേയറ്റം ഗൗരവകരമായ വിഷയമാണെന്നാണ് റിപ്പോര്‍ട്ടുകള്‍. ഒരു കേസുമായി ബന്ധപ്പെട്ട് കോടതി പരിസരത്ത് പോലീസുകാരുടെ സാന്നിധ്യത്തില്‍ മാധ്യമങ്ങള്‍ ഈ നിയമലംഘനം ചൂണ്ടിക്കാണിച്ചതോടെ ടോമിന്‍ തച്ചങ്കരി ധൃതിയില്‍ ബോര്‍ഡ് മാറ്റാന്‍ ശ്രമിക്കുകയും ചെയ്തു. മുന്‍ ഉദ്യോഗസ്ഥനായ തച്ചങ്കരിക്കെതിരെ അധികൃതര്‍ മാതൃകാപരമായ നിയമനടപടികള്‍ സ്വീകരിക്കുമോ എന്നതാണ് ഇപ്പോള്‍ ഉയരുന്ന പ്രധാന ചോദ്യം.

സേവനത്തില്‍ നിന്ന് വിരമിച്ച് മൂന്നു വര്‍ഷക്കാലവും ഈ ബോര്‍ഡ് വെച്ചുകൊണ്ടാണ് യാത്ര ചെയ്തിരുന്നതെന്നും പലയിടങ്ങളില്‍ വെച്ച് ഇത്തരത്തില്‍ തച്ചങ്കരി നക്ഷത്രമുള്ള കാര്‍ ഉപയോഗിച്ചിരുന്നതായി വിവരം ഉണ്ടായിരുന്നു. മുന്‍ ഡിജിപി ആയതിനാല്‍ ഇത്തരത്തില്‍ നിയമ സംവിധാനങ്ങളെ കുറിച്ചും നിയമ വ്യവസ്ഥയെ കുറിച്ചും ഒക്കെതന്നെ കൃത്യമായി ധാരണയുള്ള ആളാണ് തച്ചങ്കരി. പോലീസുകാര്‍ ഉള്‍പ്പെടെ അവിടെ നിന്നിട്ട് പോലും അതിന്റെ മുന്നിലാണ് കൂസലില്ലാതെ ഇത്തരത്തിലുള്ള നിയമലംഘനം നടന്നത്.