പൊള്ളാച്ചി: വിനോദയാത്ര നാടിനെ കണ്ണീരിലാഴ്ത്തിയ മഹാദുരന്തമായി മാറി. പൊള്ളാച്ചി-വാല്‍പ്പാറ റോഡിലെ 13-ാം ഹെയര്‍പിന്‍ വളവില്‍ വിനോദസഞ്ചാരികള്‍ സഞ്ചരിച്ച മിനി വാന്‍ കൊക്കയിലേക്ക് മറിഞ്ഞ് എട്ട് മലയാളികള്‍ മരിച്ചു. മലപ്പുറം പാങ്ങ് പള്ളിപ്പറമ്പ് ജി.എല്‍.പി സ്‌കൂളിലെ അധ്യാപകരും കുടുംബാംഗങ്ങളുമാണ് അപകടത്തില്‍പ്പെട്ടത്. മരിച്ചവരില്‍ ഏഴ് സ്ത്രീകളും ഒരു പുരുഷനും ഉള്‍പ്പെടുന്നു.

ഇന്ന് വൈകിട്ടോടെയായിരുന്നു സംഭവം. നിയന്ത്രണം വിട്ട മിനി വാന്‍ മറ്റൊരു വാഹനവുമായി കൂട്ടിയിടിച്ച ശേഷം സംരക്ഷണ ഭിത്തി തകര്‍ത്ത് 800 അടി താഴ്ചയുള്ള കൊക്കയിലേക്ക് മറിയുകയായിരുന്നു. 40-ഓളം ഹെയര്‍പിന്‍ വളവുകളുള്ള ഈ മലമ്പാതയിലെ അപകടസാധ്യതയേറിയ വളവുകളില്‍ ഒന്നാണ് പതിമൂന്നാം വളവ്. ഡ്രൈവര്‍ക്ക് വാഹനത്തിന്റെ നിയന്ത്രണം നഷ്ടപ്പെട്ടതാണ് അപകടകാരണമെന്നാണ് പ്രാഥമിക വിലയിരുത്തല്‍.

മലപ്പുറം കോളത്തൂര്‍ പോലീസ് പരിധിയില്‍ നിന്നും ഇന്ന് പുലര്‍ച്ചെ 3 മണിക്കാണ് 13 പേരടങ്ങുന്ന സംഘം വിനോദയാത്ര പുറപ്പെട്ടത്. പള്ളിപ്പറമ്പ് സ്‌കൂളിലെ 12 അധ്യാപകരും അവരുടെ കുടുംബാംഗങ്ങളും സംഘത്തിലുണ്ടായിരുന്നു. ഒരു ദിവസത്തെ സന്ദര്‍ശനം കഴിഞ്ഞ് ഇന്ന് രാത്രിയോടെ നാട്ടില്‍ തിരിച്ചെത്താനിരിക്കെയാണ് വിധി ദുരന്തത്തിന്റെ രൂപത്തില്‍ എത്തിയത്.

അപകടം നടന്ന ഉടന്‍ തന്നെ നാട്ടുകാരും തമിഴ്നാട് പോലീസും അഗ്‌നിരക്ഷാസേനയും സ്ഥലത്തെത്തി രക്ഷാപ്രവര്‍ത്തനം ആരംഭിച്ചു. പൂര്‍ണ്ണമായും തകര്‍ന്ന നിലയിലായിരുന്നു വാഹനം. പരിക്കേറ്റ അഞ്ചുപേരുടെ നില അതീവ ഗുരുതരമായി തുടരുകയാണ്. ഇതില്‍ മൂന്ന് കുട്ടികളും ഉള്‍പ്പെടുന്നു. അബോധാവസ്ഥയിലായ ഇവരെ പൊള്ളാച്ചി ജില്ലാ ആശുപത്രിയില്‍ പ്രവേശിപ്പിച്ചു.

ഡ്രൈവറടക്കം 13 പേരാണ് വാഹനത്തിലുണ്ടായിരുന്നത്. മറ്റൊരു വാഹനവുമായി കൂട്ടിയിടിച്ചാണ് അപകടം. ചാലക്കുടി -അതിരപ്പിള്ളി - മലക്കപ്പാറ വഴിയാണ് സംഘം വാല്‍പ്പാറയിലെത്തിയത്. പെരിന്തല്‍മണ്ണ സ്വദേശിയുടെ ഉടമസ്ഥതയിലുള്ളതാണ് വാഹനം. മൃതദേഹങ്ങള്‍: പോസ്റ്റ്മോര്‍ട്ടം നടപടികള്‍ക്കായി പൊള്ളാച്ചി ജനറല്‍ ആശുപത്രിയിലേക്ക് മാറ്റി. സംഭവത്തില്‍ തമിഴ്നാട് പോലീസ് അന്വേഷണം ആരംഭിച്ചിട്ടുണ്ട്.