വാഷിങ്ടന്‍: അമേരിക്കയില്‍ ഭാര്യയെയും അവരുടെ മൂന്ന് ബന്ധുക്കളെയും വെടിവെച്ച് കൊന്ന ഇന്ത്യക്കാരന്‍ അറസ്റ്റില്‍. വിജയ് കുമാര്‍ (51) ആണ് അറസ്റ്റിലായത്. വിജയ് കുമാറിന്റെ ഭാര്യ മീമു ഡോഗ്ര (43), ഗൗരവ് കുമാര്‍ (33), നിധി ചന്ദര്‍ (37), ഹരീഷ് ചന്ദര്‍ (38) എന്നിവരാണ് കൊല്ലപ്പെട്ടത്. കുടുംബ കലഹത്തെ തുടര്‍ന്നാണ് പ്രതി കൃത്യം നടത്തിയതെന്ന് പൊലീസ് പറഞ്ഞു. കൃത്യം നടക്കുമ്പോള്‍ വിജയ് കുമാറിന്റെ 12 വയസ്സുള്ള കുട്ടിയും പത്തും എട്ടും വയസുള്ള മറ്റു രണ്ടു കിട്ടികളും അലമാരയില്‍ ഒളിച്ചിരുന്നു.

മരിച്ചവരുടെ കുടുംബത്തിന് സാധ്യമായ എല്ലാ സഹായവും നല്‍കുന്നുണ്ടെന്ന് അറ്റ്‌ലാന്റയിലെ ഇന്ത്യന്‍ മിഷന്‍ അറിയിച്ചു. വെള്ളിയാഴ്ച പുലര്‍ച്ചെ 2.30 ഓടെയാണ് സംഭവം പൊലീസില്‍ റിപ്പോര്‍ട്ട് ചെയ്തത്. ബ്രൂക്ക് ഐവി കോര്‍ട്ടിലെ 1000 ബ്ലോക്കിലെ വീട്ടില്‍ പൊലീസ് എത്തിയപ്പോഴേക്കും നാല് പേരും മരിച്ചിരുന്നു. പൊലീസ് നായയുടെ സഹായത്തോടെ നടത്തിയ തിരച്ചിലിലാണ് അടുത്തുള്ള മരങ്ങള്‍ക്കിടയില്‍ ഒളിച്ചിരുന്ന വിജയ് കുമാറിനെ പൊലീസ് കണ്ടെത്തിയത്. വിജയ് കുമാറിന്റെയും മീമു ഡോഗ്രയുടെയും കുട്ടിയാണ് എമര്‍ജന്‍സി നമ്പറില്‍ വിളിച്ച് പോലീസിനെ അറിയിച്ചത്.