റിയാദ്: ആഗോള ടൂറിസം ഭൂപടത്തില്‍ വിസ്മയമായി മാറുന്ന സൗദി അറേബ്യ, കഴിഞ്ഞ വര്‍ഷം ചരിത്രനേട്ടം കൈവരിച്ചു. സ്വദേശികളും വിദേശികളും ഉള്‍പ്പടെ 12.2 കോടിയിലധികം വിനോദസഞ്ചാരികളാണ് കഴിഞ്ഞ വര്‍ഷം രാജ്യം സന്ദര്‍ശിച്ചത്. 2024-നെ അപേക്ഷിച്ച് സന്ദര്‍ശകരുടെ എണ്ണത്തില്‍ 5 ശതമാനം വര്‍ധനവ് രേഖപ്പെടുത്തി. സന്ദര്‍ശകരുടെ എണ്ണത്തില്‍ മാത്രമല്ല, ടൂറിസം വഴിയുള്ള വരുമാനത്തിലും വന്‍ വര്‍ധനവാണുണ്ടായത്.

30,000 കോടി റിയാല്‍ കഴിഞ്ഞ വര്‍ഷം സന്ദര്‍ശകര്‍ ചെലവഴിച്ചു. മുന്‍ വര്‍ഷത്തെ അപേക്ഷിച്ച് 6 ശതമാനം വര്‍ധനവ്.

'വിഷന്‍ 2030' പദ്ധതിയുടെ ഭാഗമായി പ്രതിവര്‍ഷം 15 കോടി സഞ്ചാരികളെ എത്തിക്കുക എന്ന ലക്ഷ്യത്തിലേക്ക് രാജ്യം അതിവേഗം അടുക്കുകയാണെന്ന് ടൂറിസം മന്ത്രാലയം വ്യക്തമാക്കി. 2030-ഓടെ രാജ്യത്തിന്റെ മൊത്ത ആഭ്യന്തര ഉല്‍പ്പാദനത്തിന്റെ (GDP) 10 ശതമാനം ടൂറിസത്തില്‍ നിന്ന് കണ്ടെത്താനാണ് സൗദി ലക്ഷ്യമിടുന്നത്.

ഈ നേട്ടത്തിന് പിന്നില്‍ പ്രധാനമായും മൂന്ന് ഘടകങ്ങളാണുള്ളത്: ടൂറിസം മേഖലയില്‍ സര്‍ക്കാര്‍ നടത്തുന്ന വന്‍തോതിലുള്ള നിക്ഷേപങ്ങള്‍, വിനോദ-സാംസ്‌കാരിക മേഖലകളിലെ പുതിയ ലക്ഷ്യസ്ഥാനങ്ങളുടെ ആവിര്‍ഭാവം, വര്‍ഷം മുഴുവന്‍ നീണ്ടുനില്‍ക്കുന്ന രാജ്യാന്തര പരിപാടികള്‍ക്കും വേദികള്‍ക്കും സൗദി ആതിഥേയത്വം വഹിക്കുന്നത്.