കൊച്ചി: മലബാര്‍ മേഖലയില്‍ തരംഗമായി മാറിയ 'മെക് 7' (മള്‍ട്ടി എക്സസൈസ് കോമ്പിനേഷന്‍) വ്യായാമ സംസ്‌കാരം എറണാകുളത്തേക്കും. പാടിവട്ടം അസീസിയ കണ്‍വെന്‍ഷന്‍ സെന്റര്‍ കേന്ദ്രീകരിച്ചാണ് എറണാകുളത്ത് മെക് പരിശീലനം ആരംഭിച്ചിട്ടുള്ളത്. അസീസിയ കോംപൗണ്ടില്‍ നടന്ന ആദ്യദിന പരിശീലന പരിപാടിയില്‍ 45-ഓളം പേര്‍ പങ്കെടുത്തു.

മെക് 7 എക്സ്റ്റന്റിംഗ് കോര്‍ഡിനേറ്ററായ ടി.പി. ഹാഷിര്‍ അലിയുടെ നേതൃത്വത്തില്‍ കോഴിക്കോട് നിന്നുമെത്തിയ വിദഗ്ധ പരിശീലകരാണ് എറണാകുളത്തെ പരിശീലന പരിപാടിക്ക് തുടക്കമിട്ടത്. കേരള സെന്‍ട്രല്‍ സോണ്‍ ചീഫ് കോര്‍ഡിനേറ്റര്‍ കെ. ജിതേഷ് പരിശീലന ക്ലാസിന്് നേതൃത്വം നല്‍കി. കോഴിക്കോട് സോണ്‍ 4 സൗത്ത് കോര്‍ഡിനേറ്റര്‍ ഒ. റാസിഖ്, കോഴിക്കോട് ബീച്ച് ട്രെയിനര്‍ മുഹമ്മദ് കോയ, മീഡിയ കോര്‍ഡിനേറ്റര്‍ ഒ.പി. ഷെരീഫ് എന്നിവരും പരിശീലന പരിപാടിക്ക് മാര്‍ഗനിര്‍ദേശങ്ങള്‍ നല്‍കി.

ഇന്ത്യന്‍ പാരാമിലിറ്ററി സര്‍വീസില്‍ നിന്ന് വിരമിച്ച മലപ്പുറം കൊണ്ടോട്ടി സ്വദേശി പി. സലാഹുദ്ദീന്‍ നാട്ടുകാരുടെ ജീവിതശൈലീ രോഗങ്ങള്‍ക്ക് പരിഹാരം എന്ന നിലയില്‍ 20 പേരെ ഉള്‍പ്പെടുത്തി തുടങ്ങിയ മെക്7 ക്ലബ്ബ് ഇന്ന് വലിയൊരു വ്യായാമ വിപ്ലവമായി മാറിയിരിക്കുകയാണ്. 21 മിനിറ്റ് മാത്രം നീണ്ടുനില്‍ക്കുന്ന 21 വ്യത്യസ്ത വ്യായാമ മുറകളാണ് ഇതിലുള്ളത്. 'ശരീരത്തിനും മനസ്സിനും നവയൗവനം നല്‍കുക' എന്ന പ്രമേയത്തിലൂന്നി എല്ലാ പ്രായക്കാര്‍ക്കിടയിലും ആരോഗ്യ അവബോധം വളര്‍ത്തുക എന്നതാണ് മെക് 7 ന്റെ ലക്ഷ്യം.

സാധാരണക്കാര്‍ക്ക് ആവേശകരമായ ആരോഗ്യ സംസ്‌കാരം പകര്‍ന്നുനല്‍കുന്ന മെക് 7, വരും ദിവസങ്ങളില്‍ കൊച്ചിയുടെ വിവിധ ഭാഗങ്ങളിലേക്ക് വ്യാപിപ്പിക്കാനാണ് സംഘാടകരുടെ തീരുമാനം. എറണാകുളം അസീസിയ മെക് 7 കൂട്ടായ്മയുടെ ഭാരവാഹികളായി ചെയര്‍മാന്‍: അഡ്വ. അനീഷ്, കോര്‍ഡിനേറ്റര്‍: ബച്ചു, ട്രഷറര്‍: ഫൈസല്‍ എന്നിവരെ തെരഞ്ഞെടുത്തു.