കാസര്‍ഗോഡ്: തൃക്കരിപ്പൂര്‍ വെള്ളാപ് സ്വദേശിയും മുഹമ്മദ് അലിനഫീസ ദമ്പതികളുടെ മകനുമായ കെ.എം. മുഹമ്മദ് നബീല്‍ സാമൂഹിക സേവനം, ചാരിറ്റി, കരിയര്‍ കൗണ്‍സിലിംഗ് മേഖലകളിലെ സമഗ്ര സംഭാവനകള്‍ പരിഗണിച്ച് ഹോണററി ഡോക്ടറേറ്റ് നേടി. അമേരിക്കയിലെ ഫ്‌ലോറിഡ ആസ്ഥാനമായി പ്രവര്‍ത്തിക്കുന്ന ഡേസ്പ്രിംഗ് ഇന്റര്‍നാഷണല്‍ യൂണിവേഴ്‌സിറ്റിയാണ് നബീലിന് കരിയര്‍ കൗണ്‍സിലിംഗില്‍ ഹോണററി ഡോക്ടറേറ്റ് സമ്മാനിച്ചത്. മധുരയിലെ പ്രസിഡന്‍സി ഹാളില്‍ നടന്ന കോണ്‍വെക്കേഷന്‍ ചടങ്ങില്‍ യൂണിവേഴ്‌സിറ്റി ചാന്‍സ്‌ലര്‍ ഡോ. ആമോസ് ജെയിംസ് പുരസ്‌കാരം ഔദ്യോഗികമായി സമ്മാനിച്ചു.

വിദ്യാര്‍ത്ഥികള്‍ക്കും യുവജനങ്ങള്‍ക്കും ശരിയായ കരിയര്‍ മാര്‍ഗനിര്‍ദേശവും കൗണ്‍സിലിംഗ് പിന്തുണയും നല്‍കുന്നതിനോടൊപ്പം സാമൂഹിക സേവന, ചാരിറ്റി പ്രവര്‍ത്തനങ്ങളിലൂടെയും സമൂഹത്തിന് നല്‍കിയ നിരന്തര സംഭാവനകളാണ് ഈ അംഗീകാരത്തിന് ആധാരം. സാമൂഹിക സേവന രംഗത്തെ പ്രവര്‍ത്തനങ്ങള്‍ പരിഗണിച്ച് ദേശീയ വികസന ഏജന്‍സിയായ ഭാരത് സേവക് സമാജ് (Bharat Sevak Samaj - BSS) നല്‍കുന്ന BSS അവാര്‍ഡിനും കെ.എം. മുഹമ്മദ് നബീല്‍ അര്‍ഹനായിട്ടുണ്ട്.