ധാക്ക- 2026 ലെ ടി20 ലോകകപ്പിലെ തങ്ങളുടെ മത്സരങ്ങള്‍ ഇന്ത്യക്ക് പുറത്തേക്ക് മാറ്റണമെന്ന ബംഗ്ലാദേശ് ക്രിക്കറ്റ് ബോര്‍ഡിന്റെ ആവശ്യം അന്താരാഷ്ട്ര ക്രിക്കറ്റ് കൗണ്‍സില്‍ തള്ളി. ഇഎസ്പിഎന്‍ ക്രിക്ഇന്‍ഫോ റിപ്പോര്‍ട്ട് പ്രകാരം, നിശ്ചയിച്ച പ്രകാരം ഇന്ത്യയില്‍ കളിക്കുകയോ അല്ലെങ്കില്‍ പോയിന്റുകള്‍ വിട്ടുകൊടുക്കുകയോ ചെയ്യണമെന്ന് ഐസിസി ബംഗ്ലാദേശിനെ അറിയിച്ചു. ഇന്ത്യയിലേക്ക് യാത്ര ചെയ്ത് മത്സരങ്ങളില്‍ പങ്കെടുക്കുക, അല്ലെങ്കില്‍ ടൂര്‍ണമെന്റില്‍ നിന്ന് പിന്മാറുക എന്നീ രണ്ട് ഓപ്ഷനുകളാണ് ഇപ്പോള്‍ ബംഗ്ലാദേശിന് മുന്നിലുള്ളത്.

കഴിഞ്ഞ മാസം ബിസിസിഐ പുറത്തുവിട്ട ഷെഡ്യൂള്‍ പ്രകാരം ഗ്രൂപ്പ് സിയിലുള്ള ബംഗ്ലാദേശ് തങ്ങളുടെ ആദ്യ മൂന്ന് മത്സരങ്ങള്‍ കൊല്‍ക്കത്തയിലാണ് കളിക്കേണ്ടത്.

ഫെബ്രുവരി 7: വെസ്റ്റ് ഇന്‍ഡീസിനെതിരെ

ഫെബ്രുവരി 9: യുഎഇക്കെതിരെ

ഫെബ്രുവരി 14: ഇംഗ്ലണ്ടിനെതിരെ

ഫെബ്രുവരി 17: നേപ്പാളിനെതിരെ (മുംബൈ വാംഖഡെ സ്റ്റേഡിയത്തില്‍)

ബംഗ്ലാദേശ് പോകുന്നില്ലെങ്കില്‍ എതിര്‍ ടീമുകള്‍ക്ക് രണ്ട് പോയിന്റ് വീതം ലഭിക്കും. ലോകകപ്പ് ചരിത്രത്തില്‍ ഇതിനുമുമ്പും സുരക്ഷാ-രാഷ്ട്രീയ കാരണങ്ങളാല്‍ ടീമുകള്‍ മത്സരങ്ങള്‍ ബഹിഷ്‌കരിച്ചിട്ടുണ്ട്.

ലോകകപ്പ് ചരിത്രത്തിലെ മുന്‍കാല ബഹിഷ്‌കരണങ്ങള്‍

1. 1996 ലോകകപ്പ്: ശ്രീലങ്ക - ഓസ്ട്രേലിയ : 1996 ലോകകപ്പിന് മൂന്നാഴ്ച മുമ്പ് കൊളംബോയിലെ സെന്‍ട്രല്‍ ബാങ്കിന് നേരെ എല്‍ടിടിഇ നടത്തിയ ചാവേര്‍ ആക്രമണത്തില്‍ ആയിരത്തിലധികം ആളുകള്‍ക്ക് പരിക്കേറ്റിരുന്നു. ഈ സുരക്ഷാ ഭീതിയെത്തുടര്‍ന്ന് ഓസ്ട്രേലിയ ശ്രീലങ്കയില്‍ കളിക്കാന്‍ വിസമ്മതിച്ചു. ഇതോടെ ശ്രീലങ്കക്ക് വാക്കോവര്‍ ലഭിച്ചു.

2. 1996 ലോകകപ്പ്: ശ്രീലങ്ക - വെസ്റ്റ് ഇന്‍ഡീസ് : ഇതേ സുരക്ഷാ കാരണങ്ങളാല്‍ വെസ്റ്റ് ഇന്‍ഡീസും ശ്രീലങ്കയില്‍ കളിക്കാന്‍ തയ്യാറായില്ല. രാജ്യം സുരക്ഷിതമാണെന്ന് ഐസിസി സാക്ഷ്യപ്പെടുത്തിയിട്ടും പിന്മാറിയതിന് ഓസ്ട്രേലിയക്കും വെസ്റ്റ് ഇന്‍ഡീസിനും ഐസിസി കനത്ത പിഴ ചുമത്തിയിരുന്നു.

3. 2003 ലോകകപ്പ്: സിംബാബ്വെ - ഇംഗ്ലണ്ട് :റോബര്‍ട്ട് മുഗാബെയുടെ ഭരണത്തിന് കീഴില്‍ സിംബാബ്വെയില്‍ നിലനിന്നിരുന്ന രാഷ്ട്രീയ അസ്ഥിരത കാരണം അവിടെ പോയി കളിക്കരുതെന്ന് അന്നത്തെ ബ്രിട്ടീഷ് പ്രധാനമന്ത്രി ടോണി ബ്ലെയര്‍ ഇംഗ്ലണ്ട് ടീമിനോട് ആവശ്യപ്പെട്ടു. വേദികള്‍ മാറ്റാനുള്ള ഇംഗ്ലണ്ടിന്റെ ആവശ്യം ഐസിസി തള്ളി. മത്സരത്തില്‍നിന്ന് പിന്മാറിയതോടെ സിംബാബ്വെ അടുത്ത റൗണ്ടിലേക്ക് യോഗ്യത നേടുകയും ഇംഗ്ലണ്ട് പുറത്താവുകയും ചെയ്തു.

4. 2003 ലോകകപ്പ്: കെനിയ - ന്യൂസിലന്‍ഡ്: സുരക്ഷാ കാരണങ്ങള്‍ മുന്‍നിര്‍ത്തി കെനിയയിലേക്ക് യാത്ര ചെയ്യാന്‍ ന്യൂസിലന്‍ഡ് ക്രിക്കറ്റ് ബോര്‍ഡ് വിസമ്മതിച്ചു. ഇതോടെ കെനിയക്ക് പോയിന്റുകള്‍ ലഭിച്ചു.