ബീജിംഗ്: ദക്ഷിണ കൊറിയന് പ്രസിഡന്റ് ലീ ജെ മ്യൂങ്ങും ചൈനീസ് പ്രസിഡന്റ് ഷി ജിന്പിങ്ങും ഒന്നിച്ചുള്ള ഒരു അപൂര്വ്വ സെല്ഫി ചിത്രമാണ് ഇപ്പോള് സോഷ്യല് മീഡിയയില് വൈറലാകുന്നത്. ചൈനീസ് സന്ദര്ശനത്തിനിടെ ഷി ജിന്പിങ് തന്നെ സമ്മാനിച്ച ഷവോമി സ്മാര്ട്ട്ഫോണ് ഉപയോഗിച്ചാണ് ലീ ജെ മ്യൂങ് ഈ ചിത്രം പകര്ത്തിയത് എന്നതാണ് ഇതിലെ കൗതുകം.
തിങ്കളാഴ്ച ബീജിംഗില് നടന്ന ഔദ്യോഗിക വിരുന്നിന് ശേഷമാണ് ലീ ജെ മ്യൂങ് ഈ ചിത്രം പകര്ത്തിയത്. ഷി ജിന്പിങ്, അദ്ദേഹത്തിന്റെ ഭാര്യ പെങ് ലിയുവാന്, ദക്ഷിണ കൊറിയന് പ്രഥമ വനിത കിം ഹെ-ക്യുങ് എന്നിവര്ക്കൊപ്പം ചിരിച്ചുനില്ക്കുന്ന ചിത്രം ലീ തന്റെ എക്സ് ഹാന്ഡിലില് പങ്കുവെച്ചു.
'ഗിയോങ്ജുവില് വെച്ച് എനിക്ക് സമ്മാനമായി ലഭിച്ച ഷവോമി ഫോണില് പ്രസിഡന്റ് ഷി ജിന്പിങ്ങിനും അദ്ദേഹത്തിന്റെ ഭാര്യയ്ക്കുമൊപ്പം എടുത്ത സെല്ഫി. അവര്ക്ക് നന്ദി, എനിക്ക് ജീവിതത്തിലെ ഏറ്റവും മികച്ച ചിത്രം ലഭിച്ചു,' അദ്ദേഹം കുറിച്ചു.
കഴിഞ്ഞ നവംബറില് ദക്ഷിണ കൊറിയയില് നടന്ന എപെക് ഉച്ചകോടിക്കിടെയാണ് ഷി ജിന്പിങ് ഈ ഫോണ് ലീക്ക് സമ്മാനിച്ചത്. അന്ന് ഈ ഫോണിലെ ആശയവിനിമയം സുരക്ഷിതമാണോ എന്ന് ലീ ചോദിച്ചപ്പോള്, ഇതില് വല്ല 'ബാക്ക്ഡോറും' (രഹസ്യമായി വിവരങ്ങള് ചോര്ത്താനുള്ള വഴി) ഉണ്ടോ എന്ന് പരിശോധിച്ചോളൂ എന്ന് ഷി തമാശയായി മറുപടി നല്കിയിരുന്നു. ചൈനീസ് നേതാവില്നിന്ന് ഇത്തരമൊരു തമാശ ആരും പ്രതീക്ഷിച്ചിരുന്നില്ല. ഷി ജിന്പിങ് തമാശ പറയുന്നതില് മിടുക്കനാണെന്നാണ് ലീ പിന്നീട് പ്രതികരിച്ചത്.
വര്ഷങ്ങളായി തണുത്തുറഞ്ഞു കിടക്കുന്ന ദക്ഷിണ കൊറിയ-ചൈന ബന്ധം മെച്ചപ്പെടുത്തുന്നതിന്റെ ഭാഗമായാണ് ലീയുടെ ഈ സന്ദര്ശനം. തൊണ്ണൂറ് മിനിറ്റ് നീണ്ട കൂടിക്കാഴ്ചയില്, സങ്കീര്ണ്ണമായ ആഗോള സാഹചര്യങ്ങളില് ശരിയായ തന്ത്രപരമായ തീരുമാനങ്ങള് എടുക്കാന് ഷി ജിന്പിങ് ദക്ഷിണ കൊറിയയോട് ആഹ്വാനം ചെയ്തു.
അമേരിക്ക, വെനസ്വേലന് പ്രസിഡന്റ് നിക്കോളാസ് മദുറോയെ പിടികൂടി ന്യൂയോര്ക്കില് എത്തിച്ച സംഭവത്തില് ചൈനയും ഉത്തരകൊറിയയും പ്രതിഷേധം അറിയിച്ചതിന് പിന്നാലെയാണ് ഈ സന്ദര്ശനം എന്നത് ശ്രദ്ധേയമാണ്. ഇതിനിടെ ഒരു സോഷ്യല് മീഡിയ ഉപയോക്താവ് 'മദുറോയും ഇതേ ഫോണാണ് ഉപയോഗിച്ചിരുന്നതെന്ന് നിങ്ങള്ക്കറിയാമോ?' എന്ന് ചിത്രത്തിന് താഴെ പരിഹാസരൂപേണ കമന്റ് ചെയ്യുകയും ചെയ്തു.
Related News
