ജിദ്ദ: കലാലയം സാംസ്‌കാരിക വേദി ജിദ്ദ നോര്‍ത്ത് സോണ്‍ പ്രവാസി സാഹിത്യോത്സവ് സമാപിച്ചു. അഞ്ചു സെക്ടറുകള്‍ തമ്മില്‍ മാറ്റുരച്ച സാഹിത്യോത്സവില്‍ 84 ഇനങ്ങളിലായി 500-ഓളം പ്രതിഭകള്‍ പങ്കെടുത്തു. 11 വേദികളിലായി നടന്ന മത്സരങ്ങളില്‍ 149 പോയിന്റുകള്‍ കരസ്ഥമാക്കി അനാക്കിഷ് സെക്ടര്‍ ഒന്നാം സ്ഥാനവും 121 പോയിന്റുകള്‍ നേടി ഹിറാ സെക്ടര്‍ രണ്ടാം സ്ഥാനവും 97 പോയിന്റുകള്‍ നേടി സാമിര്‍ സെക്ടര്‍ മൂന്നാം സ്ഥാനവും കരസ്ഥമാക്കി.

15 ാ മത് എഡിഷന്‍ പ്രവാസി സാഹിത്യോത്സവ് കലാ പ്രതിഭയായി ഹംദാനിയ സെക്ടറിലെ ഷാഫിയെയും സര്‍ഗ്ഗ പ്രതിഭയായി അനാക്കിഷ് സെക്ടറിലെ ഇഹ്സാന്‍ അഹ്‌മദ് നവാസിനെയും തിരഞ്ഞെടുത്തു. വനിത വിഭാഗത്തില്‍ ഹിറാ സെക്ടറിലെ മുഫീദ ജിബിനെ സര്‍ഗ്ഗ പ്രതിഭയായി തിരഞ്ഞെടുത്തു.

കാമ്പസ് വിഭാഗത്തില്‍ അഹ്ദാബ് ഇന്റര്‍നാഷണല്‍ സ്‌കൂള്‍ 77 പോയിന്റുകള്‍ നേടി ഒന്നാം സ്ഥാനം കരസ്ഥമാക്കി. മഹദ് അല്‍ ഉലൂം ഇന്റര്‍നാഷണല്‍ സ്‌കൂള്‍ രണ്ടാം സ്ഥാനവും നോവല്‍ ഇന്റര്‍നാഷണല്‍ സ്‌കൂള്‍ മൂന്നാം സ്ഥാനവും കരസ്ഥമാക്കി. നോവല്‍ ഇന്റര്‍നാഷണല്‍ സ്‌കൂളിലെ അഹ്സാന്‍ അനസിനെ ക്യാമ്പസ് വിഭാഗത്തില്‍ കലാ പ്രതിഭയായി തിരഞ്ഞെടുത്തു.

രാവിലെ 9 മണിക്ക് ആരംഭിച്ച മത്സരപരിപാടികള്‍ ഐ സി എഫ് നാഷണല്‍ സെക്രട്ടറി മുജീബ് എ ആര്‍ നഗര്‍ ഉദ്ഘാടനം ചെയ്തു. സംഘാടക സമിതി ചെയര്‍മാന്‍ മുഹ്‌സിന്‍ സഖാഫിയുടെ അധ്യക്ഷതയില്‍ സഈദ് സഖാഫി പ്രാര്‍ത്ഥന നടത്തി. സോണ്‍ സെക്രട്ടറിമാരായ ഫസല്‍ ഇര്‍ഫാനി സ്വാഗതവും സലിം പറഞ്ചേരി നന്ദിയും പറഞ്ഞു.

വൈകിട്ട് നടന്ന സാംസ്‌കാരിക സംഗമം ആര്‍ എസ് സി ജിദ്ദ നോര്‍ത്ത് ചെയര്‍മാന്‍ അബ്ദുല്‍ വാഹിദ് സഖാഫിയുടെ അധ്യക്ഷതയില്‍ എഴുത്തുകാരനും ജേണലിസ്റ്റുമായ അഷ്റഫ് തൂണേരി ഉദ്ഘാടനം ചെയ്തു. സംഗമത്തില്‍ കെഎംസിസി ജിദ്ദ ജനറല്‍ സെക്രട്ടറി വി. പി. മുസ്തഫ, ജിദ്ദ നവോദയ യുവജന വേദി കണ്‍വീനര്‍ ലാലു വേങ്ങൂര്‍, ഒ ഐ സി സി ജിദ്ദ വെസ്റ്റേണ്‍ റീജിയന്‍ കമ്മിറ്റി ജനറല്‍ സെക്രട്ടറി അസ്ഹബ് വര്‍ക്കല, ഐ സി എഫ് ജിദ്ദ റീജിയന്‍ കമ്മിറ്റി ജനറല്‍ സെക്രട്ടറി സൈനുല്‍ ആബിദീന്‍ തങ്ങള്‍, ആര്‍ എസ് സി സൗദി വെസ്റ്റ് സെക്രട്ടറി റഫീഖ് കൂട്ടായി, ജിദ്ദ മര്‍കസ് സെക്രട്ടറി അബ്ദുന്നാസര്‍ അന്‍വരി, ജിദ്ദ മീഡിയ ഫോറം എക്‌സിക്യൂട്ടീവ് മെമ്പര്‍ കബീര്‍ കൊണ്ടോട്ടി എന്നിവര്‍ സംസാരിച്ചു. ആര്‍ എസ് സി ജിദ്ദ നോര്‍ത്ത് സെക്രട്ടറിമാരായ അബൂബക്കര്‍ സിദ്ധീഖ് ഫാളിലി സ്വാഗതവും ഷാഫി ബിന്‍ ശാദുലി കീനോട്ടും അവതരിപ്പിച്ചു. ജനറല്‍ സെക്രട്ടറി സംഷാദ് നന്ദി പറഞ്ഞു. സോണ്‍ സാഹിത്യോത്സവ് വിജയികള്‍ ജനുവരി 23 ന് മക്കയില്‍ നടക്കുന്ന നാഷനല്‍ സാഹിത്യോത്സവില്‍ ജിദ്ദ നോര്‍ത്തിനെ പ്രതിനിധീകരിച്ച് പങ്കെടുക്കും.