റിയാദ്: പ്രാദേശിക, പ്രാദേശികാന്തര, അന്തര്‍ദ്ദേശീയ തലങ്ങളില്‍ മിടുക്കരായ വിദ്യാര്‍ത്ഥികളെ വാര്‍ത്തെടുക്കുന്നതിനായി സമര്‍പ്പിക്കപ്പെട്ട ലാഭേച്ഛയില്ലാതെ പ്രവര്‍ത്തിക്കുന്ന സ്ഥാപനമാണ് 'മൗഹിബ' (King Abdulaziz and His Companions Foundation for Giftedness and Creativity). യുവപ്രതിഭകളെ പ്രോത്സാഹിപ്പിക്കുന്നതിലും സര്‍ഗ്ഗാത്മകത വളര്‍ത്തുന്നതിലും ഈ ഫൗണ്ടേഷന്‍ നിര്‍ണ്ണായക പങ്കാണ് വഹിക്കുന്നത്.

2025-ല്‍ വിവിധ രാജ്യങ്ങളിലായി നടന്ന 26 ഒളിമ്പ്യാഡുകളിലും 'ഇന്റര്‍നാഷണല്‍ സയന്‍സ് ആന്‍ഡ് എന്‍ജിനീയറിങ് ഫെയറിലും' (ISEF) പങ്കെടുത്ത് സൗദിയിലെ പ്രതിഭകളായ വിദ്യാര്‍ത്ഥികള്‍ 129 അന്താരാഷ്ട്ര പുരസ്‌കാരങ്ങള്‍ നേടിയതായി മൗഹിബ അറിയിച്ചു.

വിദ്യാഭ്യാസ മന്ത്രാലയവുമായി സഹകരിച്ച് നടത്തിയ ഈ മുന്നേറ്റത്തിലൂടെ ആഗോള ഐ.എസ്.ഇ.എഫ് (ISEF) മത്സരത്തില്‍ സൗദി അറേബ്യ രണ്ടാം സ്ഥാനം നിലനിര്‍ത്തി. വര്‍ഷാവസാനത്തോടെ ശാസ്ത്ര മത്സരങ്ങളില്‍ 996 അവാര്‍ഡുകളാണ് സൗദി ദേശീയ ടീമുകള്‍ കരസ്ഥമാക്കിയത്.

2025 ഈ വര്‍ഷം മൗഹിബയുടെ വിവിധ പരിപാടികളിലൂടെ 31,000-ത്തിലധികം വിദ്യാര്‍ത്ഥികള്‍ക്ക് അതിന്റെ പ്രയോജനം ലഭിച്ചു. 24 നഗരങ്ങളിലായി 70 അക്കാദമിക്, ശാസ്ത്ര സ്ഥാപനങ്ങളുമായി സഹകരിച്ച് നടപ്പിലാക്കിയ 105 പ്രാദേശിക-അന്തര്‍ദ്ദേശീയ പദ്ധതികളില്‍ 14,000-ത്തിലധികം വിദ്യാര്‍ത്ഥികള്‍ ഗവേഷണങ്ങളില്‍ പങ്കാളികളായി.

പ്രതിഭകളെ കണ്ടെത്തുന്നതിനുള്ള ദേശീയ പ്രോഗ്രാമില്‍ (National Program for Gifted Identification) ഈ വര്‍ഷം രജിസ്റ്റര്‍ ചെയ്തത് 95,000-ത്തിലധികം വിദ്യാര്‍ത്ഥികളാണ്. സയന്‍സ്, മാത്തമാറ്റിക്‌സ് വിഷയങ്ങളില്‍ വിദ്യാര്‍ത്ഥികളുടെ കഴിവ് വര്‍ദ്ധിപ്പിക്കാന്‍ ലക്ഷ്യമിട്ടുള്ള 'മൗഹിബ അഡ്വാന്‍സ്ഡ് പ്രോഗ്രാം', 100 നഗരങ്ങളിലായി 2,770-ലധികം വിദ്യാര്‍ത്ഥികള്‍ക്ക് സഹായകമായി.

ആഗോളതലത്തില്‍ അംഗീകരിക്കപ്പെട്ട ശാസ്ത്രീയ രീതികളിലൂടെ യുവതലമുറയിലെ സര്‍ഗ്ഗാത്മകതയെയും മികവിനെയും പരിപോഷിപ്പിക്കുന്നതില്‍ മൗഹിബ ഒരു സുപ്രധാന പങ്കാണ് നിര്‍വഹിച്ചുകൊണ്ടിരിക്കുന്നത്.