ദുബായ്: ടെസ്ലയുടെ അത്യാധുനിക ഡ്രൈവിംഗ് സാങ്കേതികവിദ്യ യുഎഇ നിരത്തുകളിലേക്ക് എത്തുന്നു. അടുത്ത വര്‍ഷം ജനുവരിയോടെ ടെസ്ലയുടെ അഡ്വാന്‍സ്ഡ് ഡ്രൈവര്‍ അസിസ്റ്റന്‍സ് സിസ്റ്റം (ADAS) യുഎഇയില്‍ ലഭ്യമാകുമെന്ന് സിഇഒ ഇലോണ്‍ മസ്‌ക് അറിയിച്ചു. ഡ്രൈവിംഗ് അനുഭവത്തില്‍ വിപ്ലവകരമായ മാറ്റങ്ങള്‍ ലക്ഷ്യമിടുന്ന ഈ നീക്കം ഗള്‍ഫ് മേഖലയിലെ ടെസ്ല ആരാധകര്‍ക്ക് വലിയ ആവേശമാണ് പകരുന്നത്.
പൂര്‍ണ്ണമായും ഡ്രൈവറില്ലാത്ത സംവിധാനമല്ല ഇപ്പോള്‍ അവതരിപ്പിക്കുന്നത്. മറിച്ച്, ഡ്രൈവറുടെ ജോലി ലഘൂകരിക്കുന്ന നൂതന ഫീച്ചറുകളാണ് ഇതില്‍ ഉള്‍പ്പെടുന്നത്. ഇതിന്റെ പ്രധാന സവിശേഷതകള്‍ ഇവയാണ്: വളവുകളിലും മറ്റും കാര്‍ സ്വയം സ്റ്റിയറിംഗ് നിയന്ത്രിക്കും. ഹൈവേകളില്‍ സുരക്ഷിതമായി ലെയ്‌നുകള്‍ മാറാന്‍ വാഹനം സ്വയം തീരുമാനമെടുക്കും. അപകടസാധ്യത മുന്‍കൂട്ടി കണ്ട് കൃത്യസമയത്ത് ബ്രേക്ക് പ്രയോഗിക്കുകയും ഏറ്റവും സങ്കീര്‍ണ്ണമായ ഇടങ്ങളില്‍ പോലും അനായാസം പാര്‍ക്ക് ചെയ്യാന്‍ വാഹനം സഹായിക്കുകയും ചെയ്യും.
വാഹനം സ്വയം നിയന്ത്രിക്കുമെങ്കിലും സുരക്ഷാ കാരണങ്ങളാല്‍ ഡ്രൈവര്‍ നിര്‍ബന്ധമായും സീറ്റില്‍ ഉണ്ടായിരിക്കണം എന്ന് ടെസ്ല കര്‍ശന നിര്‍ദ്ദേശം നല്‍കുന്നു. സിസ്റ്റം പ്രവര്‍ത്തിക്കുമ്പോഴും ഡ്രൈവര്‍ റോഡില്‍ ശ്രദ്ധ കേന്ദ്രീകരിക്കുകയും ഏത് നിമിഷവും നിയന്ത്രണം ഏറ്റെടുക്കാന്‍ തയ്യാറായിരിക്കുകയും വേണം. മനുഷ്യസഹായമില്ലാതെ വാഹനം ഓടുന്ന 'റോബോ ടാക്‌സി' പോലെയുള്ള സംവിധാനങ്ങളിലേക്കുള്ള ആദ്യപടിയായാണ് ഇതിനെ വിലയിരുത്തുന്നത്.
ദുബായ് ഉള്‍പ്പെടെയുള്ള യുഎഇ നഗരങ്ങള്‍ സ്മാര്‍ട്ട് ട്രാന്‍സ്പോര്‍ട്ടേഷന്‍ ലക്ഷ്യമിടുന്ന സാഹചര്യത്തില്‍ ടെസ്ലയുടെ ഈ ചുവടുവെപ്പ് നിര്‍ണ്ണായകമാണ്. 2030-ഓടെ ഗതാഗതത്തിന്റെ 25 ശതമാനം സ്വയം നിയന്ത്രിത വാഹനങ്ങളാക്കി മാറ്റാനുള്ള ദുബായുടെ പദ്ധതികള്‍ക്ക് ഇത് കരുത്തുപകരും. നിലവില്‍ യുഎഇയില്‍ ടെസ്ല കാറുകള്‍ക്ക് വലിയ സ്വീകാര്യതയുണ്ട്, പുതിയ അപ്ഡേറ്റ് വരുന്നതോടെ ഡിമാന്‍ഡ് ഇനിയും വര്‍ദ്ധിക്കാനാണ് സാധ്യത.
.jpg)
Related News
