കൊച്ചി- നടി ആക്രമിക്കപ്പെട്ട കേസിലെ വിധിയില്‍ പ്രതികരിച്ച് മഞ്ജു വാര്യര്‍. നീതി പൂര്‍ണമായില്ലെന്നും അക്രമം ആസൂത്രണം ചെയ്തവര്‍ പുറത്തുണ്ടെന്നത് ഭയപ്പെടുത്തുന്നുവെന്നും ഇന്‍സ്റ്റഗ്രാമില്‍ പങ്കുവെച്ച പോസ്റ്റില്‍ അവര്‍ പറയുന്നു.
പോസ്റ്റിന്റെ പൂര്‍ണരൂപം:



ബഹുമാനപ്പെട്ട കോടതിയോട് ആദരവുണ്ട്. പക്ഷെ ഇക്കാര്യത്തില്‍ നീതി പൂര്‍ണ്ണമായി നടപ്പായി എന്ന് പറയാന്‍ ആവില്ല. കാരണം കുറ്റം ചെയ്തവര്‍ മാത്രമെ ഇപ്പോള്‍ ശിക്ഷിക്കപ്പെട്ടിട്ടുള്ളു. ഇത് ആസൂത്രണം ചെയ്തവര്‍, അത് ആരായാലും, അവര്‍ പുറത്ത് പകല്‍വെളിച്ചത്തിലുണ്ട് എന്നത് ഭയപ്പെടുത്തുന്ന ഒരു യാഥാര്‍ഥ്യമാണ്. അവര്‍ കൂടി ശിക്ഷിക്കപ്പെട്ടാലേ അതിജീവിച്ചവര്‍ക്കുള്ള നീതി പൂര്‍ണ്ണമാവുകയുള്ളു. പോലീസിലും നിയമസംവിധാനങ്ങളിലും ഞാനിവിടെയുള്ള സമൂഹത്തിനുള്ള വിശ്വസം ദൃഢമാക്കാന്‍ അത് കൂടി കണ്ടെത്തിയേ തീരു. ഇത് അവര്‍ക്ക് വേണ്ടി മാത്രമല്ല. ഈ നാട്ടിലെ ഓരോ പെണ്‍കുട്ടികള്‍ക്കും, ഓരോ സ്ത്രീക്കും, ഓരോ മനുഷ്യര്‍ക്കും കൂടി വേണ്ടിയാണ്. അവര്‍ക്ക് തൊഴിലിടങ്ങളിലും തെരുവുകളിലും ജീവിതത്തിലും ധൈര്യം തലയുയര്‍ത്തിപ്പിടിച്ച് ഭയപ്പാടില്ലാതെ നടക്കാന്‍ കഴിയുന്ന സാഹചര്യം ഉണ്ടാകണം ഉണ്ടായേ തീരു.

അന്നും, ഇന്നും, എന്നും അവര്‍ക്കൊപ്പം

മഞ്ജു വാര്യര്‍