തിരുവനന്തപുരം: കേരളത്തിലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ ആദ്യ ഘട്ടത്തിന് ഇനി മണിക്കൂറുകള്‍ മാത്രം. തിരുവനന്തപുരം മുതല്‍ എറണാകുളം വരെയുള്ള ഏഴ് ജില്ലകളിലെ വോട്ടര്‍മാര്‍ നാളെ അവരുടെ ജനപ്രതിനിധികളെ തിരഞ്ഞെടുക്കും. ഇന്നലെ കൊട്ടിക്കലാശം അവസാനിച്ചതോടെ, തെരുവുകളിലെ ആവേശത്തിരമാലകള്‍ അടങ്ങി. ഇന്ന് നിശബ്ദ പ്രചാരണത്തിന്റെ ദിനമാണ്. ഉച്ചഭാഷിണികളുടെ ശബ്ദഘോഷമില്ലാതെ, സ്ഥാനാര്‍ത്ഥികള്‍ നേരിട്ട് വോട്ടര്‍മാരെ കണ്ട് വോട്ടുറപ്പിക്കാനുള്ള തിരക്കിട്ട ഓട്ടത്തിലാണ്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് നാളെ പോളിംഗ് നടക്കുക. 595 തദ്ദേശ സ്ഥാപനങ്ങളിലെ 11,168 വാര്‍ഡുകളിലേക്ക് 36,630 സ്ഥാനാര്‍ഥഇകളാണ് ജനവിധി തേടുന്നത്. 1.32 കോടി വോട്ടര്‍മാര്‍രാണ് ആകെയുള്ള്.

ഈ തെരഞ്ഞെടുപ്പ് ഫലം സംസ്ഥാന രാഷ്ട്രീയത്തിന്റെ ഗതി നിര്‍ണ്ണയിക്കുന്നതില്‍ നിര്‍ണായകമാകും. ഇത്തവണയും നിലവിലെ ആധിപത്യം തുടരാനാകുമെന്ന ഉറച്ച ആത്മവിശ്വാസത്തിലാണ് സിപിഎം. സംസ്ഥാന സര്‍ക്കാരിനെതിരായ ഭരണവിരുദ്ധ വികാരം തങ്ങള്‍ക്ക് അനുകൂലമാകുമെന്നും, കഴിഞ്ഞ തവണത്തെ ചിത്രം മാറ്റിമറിക്കാന്‍ സാധിക്കുമെന്നുമാണ് യുഡിഎഫ് കണക്കുകൂട്ടുന്നത്. തലസ്ഥാന നഗരിയാണ് ബിജെപിയുടെ മുഖ്യ ലക്ഷ്യം. തിരുവനന്തപുരം കോര്‍പ്പറേഷനില്‍ ഭരണം പിടിക്കുകയാണ് ഒന്നാം ഘട്ടത്തില്‍ പാര്‍ട്ടി കണ്ണുവെക്കുന്നത്.

തെരഞ്ഞെടുപ്പിനായുള്ള എല്ലാ സജ്ജീകരണങ്ങളും പൂര്‍ത്തിയായതായി സംസ്ഥാന തെരഞ്ഞെടുപ്പ് കമ്മീഷണര്‍ അറിയിച്ചു. പോളിങ് യന്ത്രങ്ങള്‍ രാവിലെ തന്നെ ബൂത്തുകളിലെത്തിച്ചു തുടങ്ങിയിട്ടുണ്ട്.