ദോഹ: കലയും സാംസ്‌കാരിക തനിമയും ഒത്തു ചേര്‍ന്ന് ഖത്തര്‍ മ്യൂസിയംസ് (QM) ഈ ഡിസംബറില്‍ സമൂഹത്തിനായി നിരവധി ആഘോഷ പരിപാടികള്‍ ഒരുക്കുന്നു. ഫോട്ടോവോക്, ആര്‍ട്ട് വര്‍ക്ഷോപ്പ്, പ്രദര്‍ശനങ്ങള്‍, പരിശീലന ക്ലാസുകള്‍ തുടങ്ങി എല്ലാ പ്രായക്കാര്‍ക്കും അനുയോജ്യമായ പരിപാടികളാണ് സംഘടിപ്പിക്കുന്നത്.

ഡിസംബര്‍ 17 മുതല്‍ 22 വരെ, ആര്‍ട്ട് മില്‍ മ്യൂസിയവും അല്‍റിവാക്കും ചേര്‍ന്ന് 'ലൈഫ് ഈസ് ആര്‍ക്കിടെക്ച്ചര്‍' പ്രദര്‍ശനത്തിന് പ്രത്യേക ഗൈഡഡ് ടൂറുകള്‍ നടത്തും. പ്രശസ്ത ആര്‍ക്കിടെക്റ്റ് ഐ.എം. പേയിയുടെ കൃതികളും ശില്‍പകലാ ശൈലിയും വിദഗ്ധര്‍ വിശദീകരിക്കും. ഡിസംബര്‍ 9 വരെ കതാറ ഗാലറിയില്‍ ' ഫ്രെയിം ബൈ ഫ്രെയിം'' എന്ന സ്റ്റോറിടെല്ലിംഗ് വര്‍ക്ഷോപ്പ് നടക്കും. സിനിമാറ്റിക് ശൈലികളും വര്‍ണ്ണങ്ങളുടെ ഉപയോഗവും പഠിപ്പിക്കുന്ന ഈ പരിപാടി വിദ്യാര്‍ത്ഥികള്‍ക്ക് ഏറെ ഉപകാരപ്പെടും.

ഡിസംബര്‍ 5ന്, ദേശീയ മ്യൂസിയം ഓഫ് ഖത്തറിന്റെ 50-ാം വാര്‍ഷികാഘോഷങ്ങളുടെ ഭാഗമായി പ്രത്യേക ഫോട്ടോവോക് നടക്കും. ഖത്തരി ഫോട്ടോഗ്രാഫര്‍ മറിയം അല്‍ ഹേല്‍ നയിക്കുന്ന പരിപാടിയില്‍ മ്യൂസിയത്തിന്റെ പഴയ കൊട്ടാരവും ആധുനിക രൂപകല്‍പ്പനയും ക്യാമറയില്‍ പകര്‍ത്താന്‍ അവസരം ലഭിക്കും. ഡിസംബര്‍ 7ന്, ഖത്തര്‍ അര്‍ജന്റീന 2025 സാംസ്‌കാരിക വര്‍ഷത്തിന്റെ ഭാഗമായി അര്‍ജന്റീനയുടെ സമുദ്ര ചരിത്രം അവതരിപ്പിക്കുന്ന പ്രത്യേക പ്രഭാഷണവും നടക്കും. മത്താഫ് മ്യൂസിയത്തില്‍, ഡിസംബര്‍ മുഴുവന്‍ എല്ലാ ഞായറും ചൊവ്വയും ചിത്രകാരന്‍ ഇസ്മായില്‍ അസ്സാമിനൊപ്പം പോര്‍ട്രെയിറ്റ് വര്‍ക്ഷോപ്പ് നടത്തും. പെന്‍സില്‍, ചാര്‍ക്കോള്‍, പെയിന്റ് എന്നിവ ഉപയോഗിച്ചുള്ള പരിശീലനമാണ് നല്‍കുന്നത്. ഡിസംബര്‍ 13ന്, ടസ്വീര്‍ ഫെസ്റ്റിവലിന്റെയും ഖത്തര്‍ ഓട്ടോ മ്യൂസിയത്തിന്റെയും സഹകരണത്തില്‍ മവാതര്‍ സീലൈന്‍ സ്‌പോര്‍ട്‌സ് ക്ലബ്ബില്‍ പ്രത്യേക ഫോട്ടോവോക് നടക്കും. സ്റ്റണ്ട് കാറുകളും മോഡിഫൈഡ് എസ്.യു.വികളും ക്യാമറയില്‍ പകര്‍ത്താനുള്ള മികച്ച അവസരമാണിത്. അതേസമയം, M7യില്‍ നടക്കുന്ന പരിപാടിയില്‍ ഫാഷന്‍ ഡിസൈന്‍, ദൃശ്യവത്കരണം, കലാസൃഷ്ടികള്‍ എന്നിവയില്‍ പരിശീലനം നല്‍കും. കലയും പൈതൃകവും ജനങ്ങളിലേക്ക് കൂടുതല്‍ അടുത്തെത്തിക്കുകയാണ് ഖത്തര്‍ മ്യൂസിയംസിന്റെ ലക്ഷ്യം.