റിയാദ്: ജനറല്‍ എന്റര്‍ടെയ്ന്‍മെന്റ് അതോറിറ്റി ബോര്‍ഡ് ഓഫ് ഡയറക്ടേഴ്സ് ചെയര്‍മാന്‍ കൂടിയായ ഉപദേഷ്ടാവ് തുര്‍ക്കി ബിന്‍ അബ്ദുല്‍ മൊഹ്സെന്‍ അല്‍-ഷൈഖ്, 'റിംഗ് V: നൈറ്റ് ഓഫ് ദി സമുറായി' ബോക്‌സിംഗ് മത്സരത്തിന്റെ ടിക്കറ്റുകള്‍ പുറത്തിറക്കി.

പ്രമുഖ ജാപ്പനീസ് താരം നവോയ ഇനൂവെയും മെക്‌സിക്കോയുടെ അലന്‍ പിക്കാസോയും തമ്മിലുള്ള ഈ മത്സരം 2025 ഡിസംബര്‍ 27-ന് ബോളെവാര്‍ഡ് സിറ്റിയിലെ എമിറേറ്റ്സ് എന്‍.ബി.ഡി ബാങ്കിന്റെ മുഹമ്മദ് അബ്ദു അരീനയില്‍ നടക്കും.

തലസ്ഥാനമായ ടോക്കിയോയില്‍ അടുത്തിടെ നടന്ന പത്രസമ്മേളനത്തില്‍ ജാപ്പനീസ് ബോക്സിംഗ് താരങ്ങളുടെ വന്‍ പങ്കാളിത്തം ഉണ്ടായിരുന്നു. ലോകമെമ്പാടുമുള്ള ബോക്സിംഗ് ആരാധകരുടെ വലിയ ശ്രദ്ധ ആകര്‍ഷിച്ച ഈ പരിപാടിയുടെ ടിക്കറ്റ് പ്രഖ്യാപനം വലിയ ആവേശത്തോടെയാണ് ആരാധകര്‍ ഏറ്റെടുത്തത്.

റിയാദ് സീസണിലെ ഏറ്റവും ശക്തമായ ബോക്‌സിംഗ് മത്സരങ്ങളില്‍ ഒന്നാണ് ഈ 'സമുറായി നൈറ്റ്'. ഇതില്‍ ഓരോ പോരാട്ടത്തിലും ഒരു ജാപ്പനീസ് താരത്തിനെതിരെ ലോകത്തിന്റെ വിവിധ രാജ്യങ്ങളില്‍ നിന്നുള്ള എതിരാളികള്‍ മത്സരിക്കുന്നു.

പ്രധാന പോരാട്ടം: ജപ്പാന്റെ നവോയ ഇനൂവെ- മെക്‌സിക്കോയുടെ അലന്‍ പിക്കാസോ.

മറ്റ് ശ്രദ്ധേയ പോരാട്ടങ്ങള്‍:

ജപ്പാന്റെ ജുന്റോ നകതാനി vs മെക്‌സിക്കോയുടെ സെബാസ്റ്റ്യന്‍ ഹെര്‍ണാണ്ടസ്.

ജപ്പാന്റെ കെന്‍ഷിറോ തെരാജി vs മെക്‌സിക്കോയുടെ വില്ലിബാള്‍ഡ് ഗാര്‍സിയ.

ജപ്പാന്റെ തൈഗ ഈമാനാഗ vs ക്യൂബയുടെ അര്‍മാന്‍ഡോ മാര്‍ട്ടിനെസ്.

ജപ്പാന്റെ ഹയാറ്റോ സുത്സുമി vs ബ്രിട്ടന്റെ ജെയിംസ് ഡിക്കന്‍സ്.

ജപ്പാന്റെ റിറ്റോ സുത്സുമി vs മെക്‌സിക്കോയുടെ ലിയോപാര്‍ഡോ ക്വിന്റാന.

പൊതുജനങ്ങള്‍ക്ക് വെബ്ബുക്ക് ആപ്പ് വഴി ടിക്കറ്റുകള്‍ വാങ്ങാവുന്നതാണ്.