ദുബായ്: യുഎഇ പൗരന്‍മാര്‍ക്ക് ഇന്ത്യയിലേക്ക് ഇനി മുതല്‍ മുന്‍കൂര്‍ വിസയില്ലാതെ എത്താം. കൊച്ചി, കോഴിക്കോട് ഉള്‍പ്പെടെ ഒമ്പത് വിമാനത്താവളങ്ങളില്‍ ഇമറാത്തികള്‍ക്ക് 'ഓണ്‍ അറൈവല്‍ വിസ' സൗകര്യം ലഭ്യമാണ്. 60 ദിവസം വരെ ഇന്ത്യയില്‍ തങ്ങാന്‍ യുഎഇ പൗരന്‍മാര്‍ക്ക് അനുമതി ഓണ്‍ അറൈവല്‍ സമയത്തു ലഭിക്കും. നേരത്തേ മുന്‍കൂറായി അപേക്ഷിച്ചാല്‍ ലഭിക്കുന്ന ഇ-വിസയോ, പേപ്പര്‍വിസയോ കൈവശമുണ്ടെങ്കില്‍ മാത്രമാണ് യുഎഇ പൗരന്‍മാര്‍ക്ക് ഇന്ത്യയിലേക്ക് യാത്ര ചെയ്യാന്‍ കഴിഞ്ഞിരുന്നത്.

ഇന്ത്യയില്‍ ഇറങ്ങിയ ശേഷം Indian Visa Su-Swagatam മൊബൈല്‍ ആപ്ലിക്കേഷനിലോ, https://indianvisaonline.gov.in/earrival/ എന്ന വെബ്സൈറ്റിലോ ഫോറം പൂരിപ്പിച്ച് നല്‍കണം. 2000 രൂപയാണ് വിസാ ഫീസ്. 60 ദിവസം വരെ വിനോദസഞ്ചാരം, സമ്മേളനം, ചികിത്സ, ബിസിനസ് തുടങ്ങിയ ആവശ്യങ്ങള്‍ക്ക് ഇന്ത്യയില്‍ തങ്ങാന്‍ അനുമതി ലഭിക്കും. എന്നാല്‍, യുഎഇ സ്വദേശിയുടെ മുത്തച്ഛനോ, മുത്തശ്ശിയോ പാകിസ്ഥാന്‍ പൗരന്മാരോ, സ്ഥിരതാമസക്കാരോ ആണെങ്കില്‍ ഓണ്‍ എറൈവല്‍ വിസ ലഭിക്കില്ല. അവര്‍ അബുദാബി എംബസി, ദുബായ് ഇന്ത്യന്‍ കോണ്‍സുലേറ്റ് എന്നിവ വഴി പേപ്പര്‍വിസ ലഭിച്ചതിന് ശേഷം മാത്രമേ ഇന്ത്യയിലേക്ക് പുറപ്പെടാന്‍ പാടുള്ളൂ. ഇന്ത്യയിലേക്ക് ആദ്യമായി യാത്രചെയ്യുന്ന യുഎഇ പൗരന്‍മാര്‍ ഓണ്‍ അറൈവല്‍ വിസക്ക് പകരം ഇ വിസക്ക് അപേക്ഷിക്കുന്നതാണ് അഭികാമ്യമെന്ന് ഇന്ത്യന്‍ എംബസി പറഞ്ഞു. പിന്നീടുള്ള യാത്രക്ക് ഓണ്‍ അറൈവല്‍ സൗകര്യം ഉപയോഗിക്കാം.