ദുബായ്: ദുബായിലെ ആല്‍ മക്തൂം അന്താരാഷ്ട്ര വിമാനത്താവളത്തിന്റെ വികസനത്തിനായി 1000 കോടി ഡോളര്‍ മുതല്‍ 1200 കോടി ഡോളര്‍ വരെ നിക്ഷേപം നടത്താന്‍ ആലോചിക്കുന്നതായി എമിറേറ്റ്സ് എയര്‍ലൈന്‍സ് ചെയര്‍മാനും ചീഫ് എക്സിക്യൂട്ടീവുമായ ശൈഖ് അഹമ്മദ് ബിന്‍ സഈദ് ആല്‍ മക്തൂം പ്രഖ്യാപിച്ചു.

വിമാനത്താവളത്തില്‍ നിര്‍മ്മാണത്തിലിരിക്കുന്ന പുതിയ പാസഞ്ചര്‍ ടെര്‍മിനലിലെ എമിറേറ്റ്സ് എയര്‍ലൈന്‍സിന്റെ കേന്ദ്രങ്ങളും അനുബന്ധ സൗകര്യങ്ങളും വികസിപ്പിക്കുന്നതിനാണ് ഈ ഭീമമായ തുക വിനിയോഗിക്കുക. എമിറേറ്റ്സിന്റെ സൗകര്യങ്ങള്‍ക്കൊപ്പം യാത്രികര്‍ക്കായുള്ള മറ്റ് സൗകര്യങ്ങളും വികസന പദ്ധതിയില്‍ ഉള്‍പ്പെടും.

ദുബായ് എയര്‍ഷോ 2025-ല്‍ ആല്‍ മക്തൂം അന്താരാഷ്ട്ര വിമാനത്താവള വിപുലീകരണ പദ്ധതിയിലേക്ക് 350 കോടി ഡോളറിന്റെ നിക്ഷേപം ഇറക്കാന്‍ യു.കെ. എക്സ്പോര്‍ട്ട് ഫിനാന്‍സ് (UKEF) താല്‍പ്പര്യം പ്രകടിപ്പിച്ചുകൊണ്ടുള്ള കത്ത് ലഭിച്ചതിന് പിന്നാലെയാണ് ശൈഖ് അഹമ്മദിന്റെ ഈ സുപ്രധാന പ്രഖ്യാപനം.

പുതിയ പാസഞ്ചര്‍ ടെര്‍മിനലിന്റെ നിര്‍മ്മാണത്തിനായി ദുബായ് സര്‍ക്കാര്‍ 350 കോടി ഡോളറാണ് അനുവദിച്ചിട്ടുള്ളത്. സര്‍ക്കാരിന്റെ ഈ പദ്ധതിക്ക് പുറമെയാണ് എമിറേറ്റ്സിന്റെ 1200 കോടി ഡോളര്‍ വരെയുള്ള നിക്ഷേപം.

പുതിയ ടെര്‍മിനല്‍ 2030-കളില്‍ പ്രതിവര്‍ഷം 15 കോടി യാത്രികര്‍ക്ക് സേവനം നല്‍കാന്‍ കഴിയുമെന്നാണ് ദുബായ് സര്‍ക്കാര്‍ പ്രതീക്ഷിക്കുന്നത്. ഭാവിയില്‍ ഇത് 26 കോടി യാത്രികര്‍ക്കായി വര്‍ധിപ്പിക്കാനും പദ്ധതിയുണ്ട്. ലോകത്തിലെ ഏറ്റവും വലിയ വിമാനത്താവളങ്ങളില്‍ ഒന്നായി ദുബായിയെ മാറ്റാനുള്ള സര്‍ക്കാരിന്റെ ദീര്‍ഘവീക്ഷണമുള്ള പദ്ധതിക്ക് ഊര്‍ജ്ജം പകരുന്നതാണ് എമിറേറ്റ്സിന്റെ ഈ നിക്ഷേപ പ്രഖ്യാപനം.