മദീന: ഇന്ത്യന്‍ ഉംറ തീര്‍ഥആടകര്‍ സഞ്ചരിച്ച ബസ് കത്തി 42 പേര്‍ മരിച്ചു. മരിച്ചവരെല്ലാം ഹൈദരാബാദില്‍നിന്നുള്ളവരാണെന്നാണ് വിവരം. മക്കയില്‍ നിന്നും പുറപ്പെട്ട ഉംറ ബസ് ടാങ്കറുമായി കൂട്ടിയിടിച്ച് കത്തുകയായിരുന്നു. 43 ഹൈദരാബാദ് സ്വദേശികളാണ് ബസിലുണ്ടായിരുന്നത്. മരിച്ചവരില്‍ 20 സ്ത്രീകളും 11 പേര്‍ പത്ത് വയസ്സിന് താഴെയുള്ള കുട്ടികളുമാണ്. ബസ് ഡീസല്‍ ടാങ്കറുമായി കൂട്ടിയിടിച്ചതോടെ തല്‍ക്ഷണം തീപിടിക്കുകയായിരുന്നു. അപകടത്തില്‍ ഒരാള്‍ അത്ഭുതകരമായി രക്ഷപ്പെട്ടു. 25കാരന്‍ അബ്ദുല്‍ ശുഐബ് മുഹമ്മദ് ആണ് രക്ഷപ്പെട്ടത്. ഇദ്ദേഹത്തെ ആശുപത്രിയിലേക്ക് മാറ്റി.

സൗദി സമയം രാത്രി 11 മണിയോടെയാണ് അപകടം. ഉംറക്കു ശേഷം മക്കയില്‍നിന്ന മദീന സന്ദര്‍ശനത്തിനു പോകുന്ന വഴിയാണ് ബസ് അപകടത്തില്‍പെട്ടത്. ബദ്‌റിനും മദീനക്കും ഇടയില്‍ മുഫറഹാത്ത് എന്ന സ്ഥലത്ത് വെച്ചാണ് അപകടം നടന്നത്. സിവില്‍ ഡിഫന്‍സ് എത്തി തീയണച്ചെങ്കിലും ആരെയും തിരിച്ചറിയാവുന്ന വിധത്തിലല്ല മൃതദേഹങ്ങള്‍. തീര്‍ഥാടകരുടെ വിസയും യാത്രയും ക്രമീകരിച്ച ഏജന്‍സികള്‍ മന്ത്രാലവുമായി ഏകോപനം നടത്തി നടപടികള്‍ പൂര്‍ത്തിയാക്കും.