റിയാദ്: സൗദി അറേബ്യയുടെ വിവിധ ഭാഗങ്ങളില്‍ ശക്തമായ മഴ തുടരുന്നു. ഇന്ന് പുലര്‍ച്ചെ മദീനയുടെ വടക്കുകിഴക്കന്‍ ഭാഗങ്ങളിലും, ഖസിം മേഖലയുടെ വടക്കുപടിഞ്ഞാറന്‍ പ്രദേശങ്ങളിലും, ഹായില്‍ മേഖലയുടെ പടിഞ്ഞാറ്, തെക്ക്, വടക്ക് ഭാഗങ്ങളിലും മിതമായതോ കനത്തതോ ആയ മഴ രേഖപ്പെടുത്തി. ഇത് വിവിധയിടങ്ങളിലെ താഴ്വരകളിലും അരുവികളിലും ജലപ്രവാഹത്തിന് കാരണമായി.
മദീനയുടെ വടക്കുകിഴക്കന്‍ പ്രദേശങ്ങളില്‍ കനത്ത മഴയാണ് ലഭിച്ചത്. ശക്തമായ കാറ്റിനോടുകൂടിയ മഴയില്‍ തിരശ്ചീന ദൃശ്യപരത കുറഞ്ഞു. കനത്ത മഴയെത്തുടര്‍ന്ന് ചില അരുവികളും താഴ്വരകളും കരകവിഞ്ഞൊഴുകി. ഖസിം മേഖലയുടെ വടക്കുപടിഞ്ഞാറ് ഭാഗത്ത് നേരിയതോ മിതമായതോ ആയ മഴ അനുഭവപ്പെട്ടു. തുടര്‍ച്ചയായ മഴ കാരണം പല പ്രദേശങ്ങളിലും വെള്ളക്കെട്ടുകള്‍ രൂപപ്പെട്ടു.
ഹായില്‍ മേഖലയുടെ പടിഞ്ഞാറന്‍, തെക്കന്‍ ഭാഗങ്ങളെ മഴ പൂര്‍ണ്ണമായും മൂടി. തീവ്രമായ മഴ ഹൈവേകള്‍ക്ക് സമീപത്തും തെക്ക്-പടിഞ്ഞാറുള്ള ചില ഗ്രാമങ്ങളിലും സ്ഥിതി ചെയ്യുന്ന താഴ്വരകളിലും അരുവികളിലും വെള്ളപ്പൊക്കമുണ്ടാക്കി.
ഹായിലിന്റെ വടക്കന്‍ ഭാഗങ്ങളിലും നഗരത്തിന്റെ വടക്കുകിഴക്കന്‍ പ്രദേശങ്ങളിലും മഴയ്ക്ക് ശമനമില്ല. ആകാശമിപ്പോഴും കാര്‍മേഘാവൃതമാണ്, കൂടുതല്‍ മഴക്ക് സാധ്യതയുണ്ടെന്നും റിപ്പോര്‍ട്ടുകള്‍ സൂചിപ്പിക്കുന്നു.
ഇന്നത്തെ കാലാവസ്ഥാ റിപ്പോര്‍ട്ടില്‍ ദേശീയ കാലാവസ്ഥാ കേന്ദ്രം രാജ്യവ്യാപകമായി മഴ തുടരുമെന്ന് പ്രവചിച്ചിട്ടുണ്ട്.
അസീര്‍, അല്‍-ബാഹ, മക്ക, മദീന, അല്‍-ഖാസിം, ഹായില്‍, വടക്കന്‍ അതിര്‍ത്തികള്‍, കിഴക്കന്‍ പ്രവിശ്യ എന്നിവിടങ്ങളില്‍ മിതമായതോ കനത്തതോ ആയ ഇടിമിന്നലോടുകൂടിയ മഴയ്ക്ക് സാധ്യതയുണ്ട്. ഇത് പെട്ടെന്നുള്ള വെള്ളപ്പൊക്കത്തിനും ആലിപ്പഴ വര്‍ഷത്തിനും പൊടിപടലങ്ങള്‍ ഉയര്‍ത്തുന്ന ശക്തമായ കാറ്റിനും കാരണമായേക്കാം.
റിയാദ്, ജസാന്‍, അല്‍-ജൗഫ് എന്നീ മേഖലകളില്‍ നേരിയതോ മിതമായതോ ആയ മഴയായിരിക്കും ലഭിക്കുക. ഈ പ്രദേശങ്ങളിലും തബൂക്ക് മേഖലയിലും പുലര്‍ച്ചെ സമയങ്ങളില്‍ മൂടല്‍മഞ്ഞ് രൂപപ്പെടാനുള്ള സാധ്യതയുണ്ട്.
പൊതുജനങ്ങള്‍ സുരക്ഷാ നിര്‍ദ്ദേശങ്ങള്‍ പാലിക്കണമെന്നും വെള്ളപ്പൊക്ക സാധ്യതയുള്ള താഴ്വരകളിലൂടെയുള്ള യാത്രകള്‍ ഒഴിവാക്കണമെന്നും അധികൃതര്‍ മുന്നറിയിപ്പ് നല്‍കിയിട്ടുണ്ട്.
Related News
