മസ്‌കത്ത്: ദേശീയ ദിനാഘോഷങ്ങളോട് അനുബന്ധിച്ച് വാഹനങ്ങളില്‍ അമിതമായി അലങ്കാരങ്ങള്‍ ചെയ്യുന്നവര്‍ക്ക് റോയല്‍ ഒമാന്‍ പോലീസ് കര്‍ശന സുരക്ഷാ മാര്‍ഗ്ഗനിര്‍ദ്ദേശങ്ങള്‍ പുറത്തിറക്കി. സുരക്ഷാ കാരണങ്ങള്‍ മുന്‍നിര്‍ത്തിയാണ് പുതിയ മുന്നറിയിപ്പ്.
കൊടികളും അലങ്കാരങ്ങളും കെട്ടുന്നതിനായി വാഹനങ്ങളില്‍ വടികള്‍ കെട്ടിവെക്കുന്നത് കര്‍ശനമായി നിരോധിച്ചു. ഇത് അപകടങ്ങള്‍ക്ക് വഴിവെക്കാനുള്ള സാധ്യത കണക്കിലെടുത്താണ് നടപടി. വിന്‍ഡ്ഷീല്‍ഡിലോ സൈഡ് വിന്‍ഡോകളിലോ സ്റ്റിക്കറുകള്‍ ഒട്ടിക്കാന്‍ പാടില്ല. പുറകു വശത്തെ വിന്‍ഡോയില്‍ മാത്രമേ ചിത്രങ്ങള്‍ പതിപ്പിക്കാന്‍ പാടുള്ളൂ. അതു ഡ്രൈവറുടെ കാഴ്ചയെ തടസ്സപ്പെടുത്താത്ത വിധത്തിലായിരിക്കണം. എഞ്ചിന്‍ കവറില്‍ (ബോണറ്റ്) തുണിത്തരങ്ങള്‍ കെട്ടിയിടുന്ന രീതിയിലുള്ള അലങ്കാരങ്ങള്‍ പൂര്‍ണ്ണമായും നിരോധിച്ചിട്ടുണ്ട്. ഒമാന്റെ ഔദ്യോഗിക ചിഹ്നം വാഹന അലങ്കാരമായി ഉപയോഗിക്കുന്നതും നിരോധിച്ചു.
ദേശീയ ദിനാഘോഷത്തിന്റെ അന്തസ്സത്ത പ്രതിഫലിക്കുന്ന ഉചിതമായ ചിത്രങ്ങളും വാക്യങ്ങളുമാണ് സ്റ്റിക്കറുകളില്‍ ഉപയോഗിക്കേണ്ടത്. സുരക്ഷയെ ബാധിക്കുന്ന രീതിയിലുള്ള ഒരു അലങ്കാരങ്ങളും അനുവദിക്കില്ലെന്ന് പോലീസ് മുന്നറിയിപ്പ് നല്‍കി. ദേശീയ ദിനാഘോഷവുമായി ബന്ധപ്പെട്ട ഈ അലങ്കാരങ്ങള്‍ വാഹനങ്ങളില്‍ പ്രദര്‍ശിപ്പിക്കാന്‍ നവംബര്‍ 30 വരെ മാത്രമാണ് അനുമതിയുള്ളത്. ദേശീയ ദിനം നവംബര്‍ 20ന് ആണ്. ദേശീയ ദിനാഘോഷ അവധി നവംബര്‍ 26, 27 തിയതികളിലും.
Related News
