മസ്‌കത്ത്: ഒമാനിലെ സര്‍കാര്‍ മേഖലയിലെ ഉന്നത വിദ്യാഭ്യാസ സ്ഥാപനമായ സുല്‍ത്താന്‍ ഖാബൂസ് യൂണിവേഴ്സിറ്റി കേരളത്തിലെ മലബാര്‍ എജ്യൂസിറ്റിയുമായി സഹകരിച്ച് അക്കാദമിക വിനിമയ പദ്ധതികള്‍ നടപ്പാക്കുമെന്ന് മലബാര്‍ എഡ്യൂസിറ്റി ചെയമാന്‍ ഡോ. ഹുസൈന്‍ മടവൂര്‍ അറിയിച്ചു. സുല്‍ത്താന്‍ ഖാബൂസ് യൂണിവേഴ്സിറ്റി ഡെപ്യൂട്ടി വൈസ് ചാന്‍സലര്‍ പ്രൊഫസര്‍ ഹുസൈന്‍ അലി അല്‍ഖരൂസി , സുല്‍ത്താന്‍ ഖാബൂസ് ഹൈ സെന്റര്‍ ഫോര്‍ കള്‍ച്ചര്‍ ആന്റ് സയന്‍സ് ചെയര്‍മാന്‍ പ്രൊഫ. ഹബീബ് ബിന്‍ മുഹമ്മദ് ആല്‍ റിയാമി തുടങ്ങിയവരുമായി ഡോ ഹുസൈന്‍ മടവൂര്‍ യൂണിവേഴ്സിറ്റി ആസ്ഥാനത്ത് നടത്തിയ കൂടിക്കാഴ്ചയിലാണ് ഇക്കാര്യത്തില്‍ ധാരണയായത്.
2025 / 2026 അദ്ധ്യയന വര്‍ഷത്തില്‍ പദ്ധതി ആരംഭിക്കും. അറബി ഭാഷയില്‍ ബിരുദം നേടിയ ഇന്ത്യന്‍ വിദ്യാര്‍ത്ഥികള്‍ക്ക് ആധുനിക അറബി ഭാഷയില്‍ സംസാരവും എഴുത്തും പരിശീലിപ്പിക്കുന്ന ഹ്രസ്വകാല കോഴ്‌സുകളിലേക്ക് പ്രവേശനം നല്‍കും. ആധുനിക അറബി ഭാഷ പരിജ്ഞാനമുള്ളവര്‍ക്ക് ആഗോള തലത്തില്‍ വലിയ തൊഴില്‍ സാധ്യതയാണുള്ളത്. ഇതിന്റെ തുടര്‍ച്ചയായി ഒമാന്‍ വിദ്യാര്‍ഥികള്‍ക്ക് ഇംഗ്ലീഷ്, ഇന്ത്യന്‍ കള്‍ച്ചര്‍ വിഷയങ്ങളില്‍ ഇന്ത്യന്‍ യൂണിവേഴ്‌സിറ്റികളില്‍ പരിശീലനം നല്‍കാനും പദ്ധതിയുണ്ടെന്ന് ഹുസൈന്‍ മടവൂര്‍ പറഞ്ഞു.
Related News
