കുവൈത്ത് സിറ്റി: ഗള്‍ഫ് സഹകരണ കൗണ്‍സില്‍ (ജി.സി.സി.) രാജ്യങ്ങളിലെ യാത്രാനുഭവം സമൂലമായി പരിഷ്‌കരിക്കുന്ന, 'വണ്‍-സ്റ്റോപ്പ്' യാത്രാ സംവിധാനത്തിന് ഔദ്യോഗിക അംഗീകാരം ലഭിച്ചു. ഒന്നിലധികം ചെക്ക് പോയിന്റുകളിലെ പരിശോധനകള്‍ ഒഴിവാക്കി, ഒരു പോയിന്റില്‍ മാത്രം ഇമിഗ്രേഷന്‍, കസ്റ്റംസ്, സുരക്ഷാ നടപടികള്‍ പൂര്‍ത്തിയാക്കാന്‍ സ്വദേശി യാത്രക്കാരെ സഹായിക്കുന്നതാണ് ഈ വിപ്ലവകരമായ പദ്ധതി.
ഈ സംവിധാനം ആദ്യഘട്ടത്തില്‍ പരീക്ഷണാടിസ്ഥാനത്തില്‍ യു.എ.ഇ.യും ബഹ്റൈനും തമ്മില്‍ അടുത്ത മാസം മുതല്‍ നടപ്പാക്കും. കുവൈത്തില്‍ നടന്ന 42-ാമത് ജി.സി.സി. ആഭ്യന്തര മന്ത്രിമാരുടെ യോഗത്തില്‍ വെച്ച് കൗണ്‍സില്‍ സെക്രട്ടറി ജനറല്‍ ജാസിം അല്‍ബുദൈവിയാണ് ഈ സുപ്രധാന തീരുമാനം പ്രഖ്യാപിച്ചത്. പരീക്ഷണം വിജയകരമാവുന്ന പക്ഷം മറ്റ് അംഗരാജ്യങ്ങളായ കുവൈത്ത്, ഒമാന്‍, ഖത്തര്‍, സൗദി അറേബ്യ എന്നിവിടങ്ങളിലേക്കും ഈ സംവിധാനം ഉടന്‍ വ്യാപിപ്പിക്കും.
നിലവിലുള്ളതുപോലെ ഓരോ അതിര്‍ത്തിയിലും പരിശോധനകള്‍ക്കായി കാത്തുനില്‍ക്കേണ്ട ആവശ്യം ഒഴിവാകും. യാത്രയുടെ സമയം ഗണ്യമായി കുറയ്ക്കാന്‍ ഇത് സഹായിക്കും. ബഹ്റൈന്‍, കുവൈത്ത്, ഒമാന്‍, ഖത്തര്‍, സൗദി അറേബ്യ, യു.എ.ഇ. എന്നീ രാജ്യങ്ങളിലെ സ്വദേശി പൗരന്മാര്‍ക്ക് വിമാനത്താവളത്തില്‍നിന്ന് പുറപ്പെടുന്നതിന് മുമ്പ് ഒരു ചെക്ക് പോയിന്റില്‍ മാത്രം പാസ്പോര്ട്ട് പരിശോധനയും സുരക്ഷാ സ്‌ക്രീനിങ്ങും പൂര്‍ത്തിയാക്കാം. യാത്രാ നിയമലംഘനങ്ങള്‍ ട്രാക്ക് ചെയ്യാനും വിവരങ്ങള്‍ പരസ്പരം പങ്കുവെക്കാനുമായി ഒരു ഏകീകൃത ഇലക്ട്രോണിക് പ്ലാറ്റ്ഫോമും സ്ഥാപിക്കും.
യാത്രാ സൗകര്യങ്ങള്‍ വര്‍ദ്ധിപ്പിക്കുന്നതിനൊപ്പം, ടൂറിസം മേഖലയിലും ജി.സി.സി. വലിയ ചുവടുവെപ്പ് നടത്തുകയാണ്. ആറ് ഗള്‍ഫ് രാജ്യങ്ങളിലൂടെയും സഞ്ചരിക്കാന്‍ സാധിക്കുന്ന ഏകീകൃത ടൂറിസ്റ്റ്-വിസ പദ്ധതിയായ 'ജി.സി.സി. ഗ്രാന്‍ഡ് ടൂര്‍സ് വിസ' ഈ വര്‍ഷം മുതല്‍ നടപ്പാക്കും. ഒറ്റ വീസയില്‍ ഈ രാജ്യങ്ങളെല്ലാം സന്ദര്‍ശിക്കാന്‍ വിനോദസഞ്ചാരികള്‍ക്ക് ഇതിലൂടെ സാധിക്കും.
Related News
