റാബിക്: അഞ്ച് പതിറ്റാണ്ടിന്റെ പ്രവാസ ജീവിതത്തിന് വിരാമമിട്ട് നാട്ടിലേക്ക് മടങ്ങുന്ന, റാബിക് കെഎംസിസി ചെയര്‍മാന്‍ പൊന്നു കുഞ്ഞിക്കോയ തങ്ങള്‍ക്ക് യാത്രയയപ്പ് നല്‍കി. കെഎംസിസി ഓഫീസില്‍ നടന്ന 'സ്‌നേഹയാത്രയയപ്പ്' പരിപാടി, തങ്ങളുടെ വിശാലമായ സ്‌നേഹബന്ധങ്ങളുടെയും നിസ്വാര്‍ത്ഥ സേവനത്തിന്റെയും ആഴം വെളിവാക്കുന്ന അവിസ്മരണീയ നിമിഷങ്ങളായി.
കബീറിന്റെ അധ്യക്ഷതയില്‍ ചേര്‍ന്ന ചടങ്ങ്, തങ്ങളുടെ പ്രാര്‍ത്ഥനയോടെയാണ് ആരംഭിച്ചത്. സെക്രട്ടറി മൊയ്തുപ്പ മേല്‍മുറി സ്വാഗതം ആശംസിച്ചു. കെഎംസിസിയുടെ കരുത്തും തങ്ങളുടെ സേവനവും വിളിച്ചോതി ട്രഷറര്‍ ഹംസ കപ്പൂര്‍ പരിപാടി ഔപചാരികമായി ഉദ്ഘാടനം ചെയ്തു. മത-സാമൂഹ്യ രംഗങ്ങളില്‍ സ്വന്തം വിഷമതകള്‍ പോലും മറന്ന് തങ്ങള്‍ കാഴ്ചവെച്ച നിസ്തുലമായ സേവനത്തെയും, എല്ലാവരെയും ഒറ്റക്കെട്ടായി നയിച്ച മഹദ് വ്യക്തിത്വത്തെയും സ്മരിച്ചുകൊണ്ട് പങ്കെടുത്തവര്‍ എല്ലവരും സംസാരിച്ചു.
സാബര്‍ ഏരിയ കമ്മിറ്റിയുടെ ഉപഹാരം പ്രസിഡന്റ് റഹീമും സെന്‍ട്രല്‍ കമ്മിറ്റിയുടെ ഉപഹാരം ട്രഷറര്‍ ഹംസയും കൈമാറി. തിങ്ങിനിറഞ്ഞ സദസ്സിന്റെ സ്‌നേഹവാത്സല്യം ഏറ്റുവാങ്ങി, ചടങ്ങില്‍ സകീര്‍ നടുത്തൊടി, തൗഹാദ് മേല്‍മുറി, ഉസ്മാന്‍ കാരി, ഷാഫി തൂത, ഹംസ മുക്കം, റഹീം വേങ്ങര എന്നിവര്‍ സംസാരിച്ചു. ഷംസീര്‍ മമ്പാട് നന്ദി പറഞ്ഞു.
അഞ്ച് പതിറ്റാണ്ടുകാലം പ്രവാസ ലോകത്തെ സേവനരംഗത്ത് നിറഞ്ഞുനിന്ന തങ്ങള്‍ക്ക് റാബിക് കെഎംസിസിയുടെ ഏറ്റവും വലിയ ആദരവാണ് നല്‍കിയത്. തങ്ങള്‍ക്കുള്ള ഈ സ്‌നേഹവാത്സല്യം റാബിക് കെഎംസിസിയുടെ ചരിത്രത്തിലെ തിളക്കമുള്ള ഒരധ്യായമായി എന്നും നിലനില്‍ക്കും.
Related News
