കുവൈത്ത് സിറ്റി: സന്ദര്‍ശക വിസ അനുവദിക്കുന്ന കാര്യത്തില്‍ ലോകത്തിലെ തന്നെ ഏറ്റവും വേഗതയേറിയ രാജ്യമായി കുവൈത്ത് മാറുന്നു. വിസക്ക് അപേക്ഷിച്ച് അഞ്ച് മിനിറ്റിനുള്ളില്‍ വിസ ലഭിക്കുമെന്ന് ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ശൈഖ് ഫഹദ് യൂസുഫ് സുഊദ് അസ്സബാഹ് അറിയിച്ചു. ഗ്രാന്‍ഡ് ഹയാത്ത് ഹോട്ടലില്‍ നടന്ന 'ഇനിഷ്യേറ്റീവ്സ് ഫോറത്തില്‍' സംസാരിക്കുകയായിരുന്നു മന്ത്രി.
രാജ്യത്തെ പ്രവേശന വിസ വിതരണം ലോകത്തിലെ ഏറ്റവും വേഗതയേറിയ ഒന്നാണെന്ന് മന്ത്രി വ്യക്തമാക്കി. 'കുവൈത്ത് വിസ', 'വിസിറ്റ് കുവൈത്ത്' എന്നീ പ്ലാറ്റ്ഫോമുകള്‍ സംയോജിപ്പിച്ചു.
രാജ്യത്ത് തുടര്‍ച്ചയായ നിയമനിര്‍മാണ വികസനമാണ് നടക്കുന്നത്. ഇത് കുവൈത്തിന്റെ സേവന, സുരക്ഷാ സംവിധാനങ്ങള്‍ മെച്ചപ്പെടുത്താന്‍ സഹായിക്കും. ആഭ്യന്തര മന്ത്രാലയത്തിന്റെ എല്ലാ മേഖലകളെയും ഉള്‍ക്കൊള്ളുന്ന ഈ വികസനത്തിന്റെ ഫലങ്ങള്‍ പൗരന്മാര്‍ക്കും താമസക്കാര്‍ക്കും സന്ദര്‍ശകര്‍ക്കും ഉടന്‍ അനുഭവിക്കാന്‍ കഴിയുമെന്നും മന്ത്രി കൂട്ടിച്ചേര്‍ത്തു.
ജി.സി.സി രാജ്യങ്ങളുടെ സുരക്ഷയും സ്ഥിരതയും നിലനിര്‍ത്തുന്നതിനായി വിവര കൈമാറ്റത്തിനും ഉന്നതതല ഏകോപനത്തിനുമായി ഒരു സംയോജിത സംവിധാനം നിലവിലുണ്ട്. മയക്കുമരുന്ന് കടത്തിനെതിരെ സംയുക്ത സഹകരണത്തിലൂടെ കൈവരിച്ച നേട്ടങ്ങളെ അദ്ദേഹം പ്രത്യേകം പ്രശംസിച്ചു.
Related News
