റിയാദ്: ഇസ്ലാമിക് കള്‍ച്ചറല്‍ ഫൗണ്ടേഷന്‍ (ICF) ന്റെ ആഭിമുഖ്യത്തിലുള്ള 'രിസാലത്തുല്‍ ഇസ്ലാം മദ്രസ ഫെസ്റ്റ് 2025' വിപുലമായ പരിപാടികളോടെ നവംബര്‍ 21 ന് അല്‍ വനാസ ഇസ്തിറാഹയില്‍ നടക്കുമെന്ന് ഐ സി എഫ് റിയാദ് അറിയിച്ചു. മദ്രസ വിദ്യാര്‍ത്ഥികളുടെ പാഠ്യേതര കഴിവുകള്‍ പ്രോത്സാഹിപ്പിക്കുന്നതിന്റെ ഭാഗമായി വിദ്യാര്‍ത്ഥികള്‍ പങ്കെടുക്കുന്ന വൈവിധ്യമാര്‍ന്ന കലാമത്സരങ്ങളാണ് ഫെസ്റ്റിലെ പ്രധാന ആകര്‍ഷണം.
അഞ്ഞൂറിലധികം വിദ്യാര്‍ത്ഥികള്‍ മത്സരാര്‍ത്ഥികളായി വിവിധ വേദികളില്‍ മാറ്റുരയ്ക്കും. മദ്രസ ഫെസ്റ്റിന്റെ പോസ്റ്റര്‍ പ്രകാശനം നവംബര്‍ ഏഴിന് റിയാദ് മോഡേണ്‍ ഇന്റര്‍നാഷണല്‍ സ്‌കൂളില്‍ നടന്നു. ഫെസ്റ്റിന്റെ വിജയത്തിനായി അബ്ദുസ്സലാം വടകര (ചെയര്‍മാന്‍), മുജീബ് റഹ്‌മാന്‍ പള്ളിശ്ശേരി (കണ്‍വീനര്‍), ഇബ്രാഹിം കുട്ടി അഞ്ചല്‍ (ഫൈനാന്‍സ് സെക്രട്ടറി) എന്നിവരുടെ നേതൃത്വത്തില്‍ വിപുലമായ സ്വാഗത സംഘം നിലവില്‍ വന്നു. പോസ്റ്റര്‍ പ്രകാശന ചടങ്ങില്‍ അബ്ദുറഹ്‌മാന്‍ സഖാഫി അധ്യക്ഷത വഹിച്ചു. അഷ്‌റഫ് ഓച്ചിറ ഉദ്ഘാടനം നിര്‍വ്വഹിച്ചു. സെയ്‌നുദ്ദീന്‍ കുനിയില്‍ വിഷയാവതരണം നടത്തി. അബ്ദുസ്സലാം വടകര, മുജീബ് റഹ്‌മാന്‍ പള്ളിശ്ശേരി, ഇബ്രാഹിം കരീം, ഇബ്രാഹിം കുട്ടി അഞ്ചല്‍ എന്നിവര്‍ സംസാരിച്ചു.
Related News
