റിയാദ്: കേന്ദ്ര ടൂറിസം, സാംസ്‌കാരിക മന്ത്രി ഗജേന്ദ്ര സിംഗ് ഷെഖാവത്തിന്റെ സൗദി അറേബ്യന്‍ സന്ദര്‍ശനം ശ്രദ്ധേയമാകുന്നു. യു.എന്‍.ഡബ്ല്യു.ടി.ഒ പരിപാടിയില്‍ പങ്കെടുക്കുന്നതിന്റെ ഭാഗമായി റിയാദിലെത്തിയ മന്ത്രിക്ക്, ഇന്ത്യന്‍ പ്രവാസി സമൂഹം സ്‌നേഹോഷ്മള സ്വീകരണം നല്‍കി.
ഇന്ത്യന്‍ എംബസിയുടെ ആഭിമുഖ്യത്തില്‍ റിയാദില്‍ നടന്ന സ്വീകരണച്ചടങ്ങില്‍ മന്ത്രിക്ക് വന്‍ വരവേല്‍പാണ് ലഭിച്ചത്. റിയാദ് ഹില്‍ട്ടണ്‍ ഹോട്ടലില്‍
വെച്ചായിരുന്നു ഇന്ത്യന്‍ സമൂഹവുമായുള്ള കൂടിക്കാഴ്ച.
ഇന്ത്യന്‍ പ്രവാസികളെ ഭാരതത്തിന്റെ സാംസ്‌കാരിക അംബാസഡര്‍മാര്‍ എന്ന് മന്ത്രി വിശേഷിപ്പിച്ചു. വിദേശ മണ്ണില്‍ രാജ്യത്തിന്റെ സംസ്‌കാരത്തെയും പാരമ്പര്യത്തെയും പ്രതിനിധീകരിക്കുന്നതില്‍ പ്രവാസികള്‍ വഹിക്കുന്ന പങ്കിനെ അദ്ദേഹം അഭിനന്ദിച്ചു. വിദേശത്തുള്ള ഇന്ത്യന്‍ പ്രവാസികളുടെ ക്ഷേമം ഉറപ്പുവരുത്തുന്നതിനായി കേന്ദ്ര സര്‍ക്കാര്‍ നടത്തുന്ന ശ്രമങ്ങളെക്കുറിച്ചും മന്ത്രി എടുത്തു പറഞ്ഞു.
'വിദേശ മണ്ണില്‍ രാജസ്ഥാന്റെ മണ്ണിന്റെ ഗന്ധം ലഭിക്കുന്നത് ഭാഗ്യമാണ്. ഇവിടുത്തെ ഇന്ത്യക്കാരെ കണ്ടുമുട്ടിയപ്പോള്‍ വിദേശത്തും രാജ്യത്തിന്റെ അനുഭവം ലഭിച്ചു- മന്ത്രി പറഞ്ഞു.
സൗദി ടൂറിസം മന്ത്രി അഹമ്മദ് അല്‍ ഖത്തീബ് യു.എന്‍.ഡബ്ല്യു.ടി.ഒ പരിപാടിയില്‍ പങ്കെടുക്കുന്ന ടൂറിസം മന്ത്രിമാര്‍ക്കായി ഒരുക്കിയ അത്താഴ വിരുന്നിലും ഗജേന്ദ്ര സിംഗ് ഷെഖാവത്ത് പങ്കെടുത്തു.
ഊഷ്മളമായ ആതിഥ്യത്തിന് മന്ത്രി നന്ദി അറിയിച്ചു. ആഗോള ടൂറിസം സഹകരണം കൂടുതല്‍ മുന്നോട്ട് കൊണ്ടുപോകുന്നതിനെക്കുറിച്ചുള്ള അര്‍ഥവത്തായ ചര്‍ച്ചകളില്‍ ഏര്‍പ്പെടാന്‍ അവസരം ലഭിച്ചതില്‍ അദ്ദേഹം സന്തോഷം പ്രകടിപ്പിച്ചു. സൗദി സന്ദര്‍ശനം ഇരു രാജ്യങ്ങളും തമ്മിലുള്ള ടൂറിസം, സാംസ്‌കാരിക ബന്ധം ശക്തിപ്പെടുത്തുന്നതിനും ആഗോളതലത്തില്‍ ഇന്ത്യയുടെ ടൂറിസം സാധ്യതകള്‍ വര്‍ദ്ധിപ്പിക്കുന്നതിനും കൂടുതല്‍ സഹായകമാകും എന്നാണ് വിലയിരുത്തല്‍.
