മലപ്പുറം: കോട്ടക്കലിലെ വ്യാപാര സ്ഥാപനത്തില്‍ വന്‍ തീ പിടുത്തം. കടയ്ക്കുള്ളില്‍ കുടുങ്ങിയ മൂന്ന് പേരെ രക്ഷപ്പെടുത്തി. പരിക്കേറ്റ ഇവരെ ആശുപത്രിയില്‍ പ്രവേശിപ്പിച്ചു. പരിക്ക് സാരമുള്ളതല്ല. ഫയര്‍ ഫോഴ്‌സ് തീവ്രയത്‌നം നടത്തി തീ നിയന്ത്രണവിധേയമാക്കി. ഇന്ന് പുലര്‍ച്ചെ അഞ്ചര മണിയോടെയായിരുന്നു തീപിടുത്തം ഉണ്ടായത്. മഹാലാഭമേള എന്ന പേരില്‍ 200 രൂപയ്ക്ക് എല്ലാ സാധനങ്ങളും വില്‍ക്കുന്ന കടയ്ക്കാണ് തീപിടിച്ചത്.

മറ്റ് സ്ഥാപനങ്ങളിലേക്ക് തീ പടരാതിരുന്നത് വന്‍ ദുരന്തം ഒഴിവാക്കി. തീ പിടിച്ച വ്യാപാര സ്ഥാപനം പൂര്‍ണമായി കത്തി നശിച്ചു. വ്യാപാര സ്ഥാപനത്തിന് പിന്‍വശത്താണ് തീ ആളി പടര്‍ന്നത്. നാല് ഫയര്‍ഫോഴ്‌സ് യുണീറ്റുകളെത്തിയാണ് തീ നിയന്ത്രണവിധേയമാക്കിയത്. അതുവഴി സഞ്ചരിച്ച യാത്രക്കാരനാണ് തീപിടുത്തം ശ്രദ്ധയില്‍പ്പെട്ടത്. പിന്നീട് നാട്ടുകാരെയും ഫയര്‍ഫോഴ്സിനെയും വിവരം അറിയിക്കുകയായിരുന്നു.