റിയാദ്: സൗദി അറേബ്യയിലെ കര, കടല്‍, വ്യോമ കവാടങ്ങളില്‍ യാത്രാ നടപടിക്രമങ്ങള്‍ ലളിതമാക്കുന്നതിനായി 'സ്മാര്‍ട്ട് പാസ്' ഉടന്‍ ആരംഭിക്കുമെന്ന് സൗദി പാസ്പോര്‍ട്ട് ഡയറക്ടര്‍ ജനറല്‍ മേജര്‍ ജനറല്‍ സാലിഹ് അല്‍ മുറബ്ബ അറിയിച്ചു. റിയാദില്‍ നടന്ന 'ഡിജിറ്റല്‍ ഗവണ്‍മെന്റ് 2025' ഫോറത്തിലായിരുന്നു അദ്ദേഹത്തിന്റെ വെളിപ്പെടുത്തല്‍.
സ്മാര്‍ട്ട് ക്യാമറകള്‍ ഉപയോഗിച്ചായിരിക്കും ഐഡന്റിറ്റി പരിശോധന. ഈ ക്യാമറകള്‍ക്ക് ഒരേസമയം 35 ആളുകളുടെ ഐഡന്റിറ്റി പരിശോധിക്കാന്‍ കഴിയും.
പാസ്പോര്‍ട്ട് കണ്‍ട്രോള്‍ ഓഫീസര്‍മാരെ നേരിട്ട് സമീപിക്കാതെ തന്നെ യാത്രക്കാര്‍ക്ക് നടപടിക്രമങ്ങള്‍ പൂര്‍ത്തിയാക്കാന്‍ ഇത് സഹായകമാകും.
പുതിയ ഡിജിറ്റല്‍ പ്ലാറ്റ്ഫോമുകളില്‍ സ്വയം നാടുകടത്തല്‍ പ്ലാറ്റ്ഫോം ആണ് മറ്റൊരു പരിഷ്‌കാരം. നിയമം ലംഘിച്ച് രാജ്യത്ത് തങ്ങുന്ന വിദേശികളെ നാടുകടത്തുന്നതിനായി ഉടന്‍ ഈ ഡിജിറ്റല്‍ പ്ലാറ്റ്ഫോം നിലവില്‍ വരും. സുരക്ഷാ, സാങ്കേതിക, പ്രവര്‍ത്തന വശങ്ങള്‍ അന്തിമമാക്കിയാലുടന്‍ ഇത് ആരംഭിക്കും. നിയമലംഘകര്‍ക്ക് അവരുടെ യാത്രാ നടപടിക്രമങ്ങള്‍ പൂര്‍ത്തിയാക്കി രാജ്യം വിടാന്‍ ഇത് എളുപ്പമാക്കും.
ടെര്‍മിനലുകളിലെ ആളുകളുടെ ചലനം നിരീക്ഷിക്കുന്നതിനും പാസ്പോര്‍ട്ട് കൗണ്ടറുകളിലെ കാത്തിരിപ്പ് സമയം കണക്കാക്കുന്നതിനും ഡിജിറ്റല്‍ ട്വിന്നിങ് സംവിധാനം സഹായിക്കും. യാത്രക്കാരുടെ സേവനങ്ങളിലുള്ള സംതൃപ്തി നിരീക്ഷിക്കുന്നതിനും ഈ സാങ്കേതികവിദ്യ ഉപയോഗിക്കും. കഴിഞ്ഞ ഹജ്ജ് സീസണില്‍ ഈ സാങ്കേതികവിദ്യ വിജയകരമായി പരീക്ഷിച്ചിരുന്നു.
നിലവില്‍ 'അബ്ഷിര്‍' പ്ലാറ്റ്ഫോമില്‍ ഡിജിറ്റല്‍ പാസ്പോര്‍ട്ട് ലഭ്യമാണ്. ഇത് മറ്റ് രാജ്യങ്ങളുമായി സഹകരിച്ച് വിപുലീകരിക്കുന്നതിനുള്ള അന്താരാഷ്ട്ര കരാറുകള്‍ ഒപ്പിടുന്നതിനുള്ള പ്രവര്‍ത്തനങ്ങള്‍ നടന്നുവരുന്നതായി സാലിഹ് അല്‍ മുറബ്ബ പറഞ്ഞു.
ഡിപ്പാര്‍ച്ചര്‍ ലോഞ്ചുകളില്‍ പാസ്പോര്‍ട്ട് നിയന്ത്രണത്തിലൂടെ കടന്നുപോകേണ്ടതിന്റെ ആവശ്യം ഇല്ലാതാക്കും. സ്മാര്‍ട്ട് ഉപകരണങ്ങളും ഡിജിറ്റല്‍ ക്യാമറകളും ഉപയോഗിച്ച് ബോര്‍ഡിങ് നടപടിക്രമങ്ങളും വെരിഫിക്കേഷനും ഓട്ടോമേറ്റ് ചെയ്യും. രാജ്യങ്ങള്‍ തമ്മിലുള്ള ഏകീകൃത ഗേറ്റ്വേ വഴി യാത്രക്കാരുടെ ഡാറ്റ സുരക്ഷിതമായി കൈമാറ്റം ചെയ്യുന്നതിനുള്ള പദ്ധതികളും ആസൂത്രണം ചെയ്യുന്നുണ്ടെന്ന് അദ്ദേഹം പറഞ്ഞു.
Related News
