ദമാം: കിഴക്കന്‍ പ്രവിശ്യയുടെ വിനോദസഞ്ചാര മേഖലയില്‍ വിപ്ലവം സൃഷ്ടിക്കാന്‍ ഒരുങ്ങുന്ന ദമാം ഗ്ലോബല്‍ സിറ്റിയുടെ ആദ്യഘട്ടം നവംബര്‍ അവസാനത്തോടെ സന്ദര്‍ശകര്‍ക്കായി തുറക്കും. ദമ്മാമിനെ ഒരു പ്രധാന ആഗോള വിനോദസഞ്ചാര കേന്ദ്രമായി വളര്‍ത്താന്‍ ലക്ഷ്യമിടുന്ന ഈ മെഗാ പദ്ധതി, ആറ് ലക്ഷം ചതുരശ്ര മീറ്ററിലധികം വിസ്തൃതിയിലാണ് സ്ഥാപിക്കുന്നതെന്ന് കിഴക്കന്‍ പ്രവിശ്യ മുനിസിപ്പാലിറ്റി വക്താവ് ഫൈസല്‍ അല്‍ സഹ്‌റാനി അറിയിച്ചു.
വിനോദത്തിനും നിക്ഷേപത്തിനും ഒരുപോലെ പ്രാധാന്യം നല്‍കുന്ന ഈ പദ്ധതി, പ്രാദേശിക സാമ്പത്തിക വികസനത്തിന് വലിയ മുതല്‍ക്കൂട്ടാകും. ആദ്യ ഘട്ടത്തില്‍ ഏകദേശം 200 മില്യണ്‍ റിയാലിന്റെ നിക്ഷേപമാണ് പ്രതീക്ഷിക്കുന്നത്. എല്ലാ ഘട്ടങ്ങളും പൂര്‍ത്തിയാകുമ്പോള്‍ ആകെ നിക്ഷേപം 600 മില്യണ്‍ റിയാലിലധികം കടക്കുമെന്ന്് അദ്ദേഹം പറഞ്ഞു.
ദേശീയ അന്തര്‍ദേശീയ തലത്തിലുള്ള സന്ദര്‍ശകരെയും നിക്ഷേപകരെയും ആകര്‍ഷിക്കാന്‍ ഈ സംരംഭം ലക്ഷ്യമിടുന്നു. ദമ്മാമിനും ഖത്തീഫിനും ഇടയില്‍, അബു ഹദ്രിയ റോഡിന് സമീപം തന്ത്രപ്രധാനമായ സ്ഥലത്താണ് ഗ്ലോബല്‍ സിറ്റി സ്ഥിതി ചെയ്യുന്നത്. ആദ്യ ഘട്ടത്തില്‍ ഇന്ത്യ ഉള്‍പ്പടെ 16 രാജ്യങ്ങളുടെ പവലിയനുകളണ്ടാകും. ഏകദേശം 10,000 ആളുകള്‍ക്ക് ഇരിക്കാന്‍ സൗകര്യമുള്ള തുറന്ന തിയേറ്റര്‍. കൃത്രിമ തടാകത്തില്‍ ഒരുക്കിയ ഒഴുകുന്ന റെസ്റ്റോറന്റ്. ഇലക്ട്രോണിക്, വാട്ടര്‍ ഗെയിമുകള്‍ക്കായുള്ള പ്രത്യേക ഇടങ്ങള്‍ എന്നിവയും ആദ്യ ഘട്ടത്തില്‍ ഉള്‍പ്പെടുന്നു.
Related News
