കുവൈത്ത് സിറ്റി: രണ്ടു ദിവസത്തെ സന്ദര്‍ശനത്തിനായി കുവൈത്തിലെത്തിയ കേരള മുഖ്യമന്ത്രി പിണറായി വിജയന്‍ കുവൈത്ത് ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് യൂസഫ് സൗദ് അസ്സബാഹുമായി അദ്ദേഹം അല്‍ ബയാന്‍ പാലസില്‍ കൂടിക്കാഴ്ച നടത്തി. ചരിത്രപരമായ ഇന്ത്യ-കുവൈത്ത് ബന്ധങ്ങളെക്കുറിച്ചും കുവൈത്തിന്റെ വികസനത്തില്‍ മലയാളികള്‍ ഉള്‍പ്പെടെയുള്ള ഇന്ത്യന്‍ സമൂഹം നല്‍കിയ സേവനങ്ങളെക്കുറിച്ചും കൂടിക്കാഴ്ചയില്‍ പരാമര്‍ശിച്ചു. കേരളീയ സമൂഹത്തിന് കുവൈത്ത് ഭരണകൂടം നല്‍കുന്ന സഹകരണത്തിന് മുഖ്യമന്ത്രി ഉപപ്രധാനമന്ത്രിയോട് നന്ദി അറിയിച്ചു.
കേരളത്തിലെ വിവിധ മേഖലകളിലെ നിക്ഷേപ സാഹചര്യങ്ങള്‍ മുഖ്യമന്ത്രി യോഗത്തില്‍ വിശദീകരിച്ചു. കുവൈത്ത് ധനകാര്യ മന്ത്രിയും കുവൈത്ത് ഇന്‍വെസ്റ്റ്മെന്റ് അതോറിറ്റി (കെ.ഐ.എ) ചെയര്‍മാനുമായ ഡോ. സബീഹ് അല്‍ മുഖൈസിമും കൂടിക്കാഴ്ചയില്‍ സന്നിഹിതനായിരുന്നു.
കെ.ഐ.എ ഡയറക്ടര്‍ ബോര്‍ഡ് പ്രതിനിധിയുമായും മുഖ്യമന്ത്രി പ്രത്യേക കൂടിക്കാഴ്ച നടത്തി. കേരളത്തിലെ നിക്ഷേപം സംബന്ധിച്ച ചര്‍ച്ചകള്‍ക്കായി കുവൈത്തില്‍ നിന്നുള്ള പ്രതിനിധി സംഘം കേരളം സന്ദര്‍ശിക്കുമെന്ന് പ്രതിനിധി മുഖ്യമന്ത്രിയെ അറിയിച്ചു. ചീഫ് സെക്രട്ടറി ഡോ. ജയതിലക് ഐഎഎസ്, ലുലു ഗ്രൂപ്പ് ചെയര്‍മാന്‍ എം.എ. യൂസഫലി എന്നിവരും ചര്‍ച്ചകളില്‍ പങ്കെടുത്തു.
ഇന്നു വൈകുന്നേരം 7 മണിക്ക് കുവൈത്തിലെ മലയാളി സമൂഹത്തെ മുഖ്യമന്ത്രി അഭിസംബോധന ചെയ്യും. മന്‍സൂരിയായിലെ അല്‍ അറബി ഇന്‍ഡോര്‍ സ്റ്റേഡിയത്തില്‍ കുവൈത്തിലെ അറുപതോളം സംഘടനകള്‍ ചേര്‍ന്നാണ് സ്വീകരണം ഒരുക്കിയിട്ടുള്ളത്. 28 വര്‍ഷങ്ങള്‍ക്ക് ശേഷമാണ് ഒരു കേരള മുഖ്യമന്ത്രി കുവൈത്തില്‍ എത്തുന്നത് എന്ന പ്രത്യേകത ഈ സന്ദര്‍ശനത്തിനുണ്ട്.
മുഖ്യമന്ത്രിയുടെ ഈ ഗള്‍ഫ് പര്യടനത്തിന്റെ ഭാഗമായി അദ്ദേഹം ബഹ്റൈന്‍, ഒമാന്‍, ഖത്തര്‍ എന്നീ രാജ്യങ്ങള്‍ സന്ദര്‍ശിച്ചിരുന്നു. കുവൈത്തിലെ പരിപാടികള്‍ക്കു ശേഷം യുഎഇയിലേക്ക് യാത്ര തിരിക്കും.
Related News
