കുവൈത്ത് സിറ്റി: മുഖ്യമന്ത്രി പിണറായി വിജയന്‍ രണ്ട് ദിവസത്തെ ഔദ്യോഗിക സന്ദര്‍ശനത്തിനായി കുവൈത്തിലെത്തി. ഇന്ന് പുലര്‍ച്ചെ കുവൈത്തില്‍ എത്തിയ മുഖ്യമന്ത്രിയെ ഇന്ത്യന്‍ എംബസി അധികൃതരും വിവിധ സംഘടനാ നേതാക്കളും പൗരപ്രമുഖരും ചേര്‍ന്ന് സ്വീകരിച്ചു. 28 വര്‍ഷത്തിനു ശേഷം ഇതാദ്യമായാണ് കേരള മുഖ്യമന്ത്രി കുവൈത്തിലെത്തുന്നത്.
മുഖ്യമന്ത്രിയോടൊപ്പം കേരള സാംസ്‌കാരിക മന്ത്രി സജി ചെറിയാനും ചീഫ് സെക്രട്ടറി ഡോ.എ. ജയതിലകും ഉണ്ട്. ഇന്ന് ഔദ്യോഗിക ചടങ്ങുകളില്‍ പങ്കെടുക്കുന്ന മുഖ്യമന്ത്രി നാളെ (വെള്ളിയാഴ്ച) വൈകീട്ട് 4.30ന് മന്‍സൂരിയ അല്‍ അറബി സ്‌പോട്‌സ് ക്ലബ് സ്റ്റേഡിയത്തില്‍ ഒരുക്കുന്ന സ്വീകരണ പരിപാടിയില്‍ കുവൈത്ത് മലയാളികളെ അഭിസംബോധന ചെയ്യും.
ലോക കേരള സഭയും മലയാളം മിഷനും ചേര്‍ന്നാണ് കുവൈത്തില്‍ സ്വീകരണ പരിപാടി സംഘടിപ്പിക്കുന്നത്. പ്രവാസികള്‍ക്കായി സര്‍ക്കാര്‍ ഒരുക്കിയ പദ്ധതികള്‍ വിശദീകരിക്കുക, മലയാളികളെ നേരില്‍ കാണുക എന്നിവയാണ് സന്ദര്‍ശന ലക്ഷ്യം. കുവൈത്തിന്റെ വിവിധ ഭാഗങ്ങളില്‍നിന്ന് സ്റ്റേഡിയത്തിലേക്ക് സൗജന്യ വാഹനസൗകര്യം ഒരുക്കിയിട്ടുണ്ട്. സ്വീകരണത്തോടനുബന്ധിച്ച് മന്‍സൂരിയ അല്‍ അറബി സ്‌പോട്‌സ് ക്ലബ് സ്റ്റേഡിയത്തില്‍ ഗാനസന്ധ്യയും ഒരുക്കിയിട്ടുണ്ട്.
ഗള്‍ഫ് പര്യടനത്തിന്റെ ഭാഗമായി ബഹ്‌റൈന്‍, ഒമാന്‍, ഖത്തര്‍ എന്നിവിടങ്ങളിലെ സന്ദര്‍ശന ശേഷമാണ് മുഖ്യമന്ത്രി കുവൈത്തിലെത്തുന്നത്. വെള്ളിയാഴ്ച രാത്രി കുവൈത്തില്‍നിന്ന് മുഖ്യമന്ത്രി യു.എ.യിലേക്ക് തിരിക്കും. ശനി, ഞായര്‍ ദിവസങ്ങളില്‍ യു.എ.ഇയിലെ വിവിധ പരിപാടികളില്‍ പങ്കെടുക്കും.
Related News
