ന്യൂയോര്‍ക്ക്: അമേരിക്കന്‍ പ്രസിഡന്റ് റൊണാള്‍ഡ് ട്രംപിന്റെ അതിശക്തമായ എതിര്‍പ്പുണ്ടായിട്ടും ചരിത്രം കുറിച്ച് ഇന്ത്യന്‍ വംശജനായ സൊഹ്‌റാന്‍ മംദാനി ന്യൂയോര്‍ക്ക് മേയറായി തെരഞ്ഞെടുക്കപ്പെട്ടു. സ്വതന്ത്ര സ്ഥാനാര്‍ഥി ആന്‍ഡ്രൂ കുമോയെ പരാജയപ്പെടുത്തിയാണ് ഡെമോക്രാറ്റിക് സ്ഥാനാര്‍ഥി മംദാനിയുടെ ചരിത്ര വിജയം. മംദാനി 51.5 ശതമാനം വോട്ടുകള്‍ നേടിയപ്പോള്‍ കുമോക്ക് 39.7 ശതമാനം വോട്ടുകളാണ് ലഭിച്ചത്. ന്യൂയോര്‍ക്ക് നഗരത്തിന്റെ ചരിത്രത്തിലെ ആദ്യ മുസ്ലിം മേയറായറാണ് മംദാനി. ന്യൂയോര്‍ക്ക് മേയറാകുന്ന ആദ്യ ഇന്ത്യന്‍ വംശജനും ഏറ്റവും പ്രായം കുറഞ്ഞയാളുമാണ് 34കാരനായ മംദാനി.

റിപ്പബ്ലിക്കന്‍ സ്ഥാനാര്‍ഥി കര്‍ട്ടിസ് സ്ലീവക്ക് എട്ടു ശതമാനം വോട്ടുകള്‍ മാത്രമാണ് നേടാനായത്. അമേരിക്കയിലെ ഏറ്റവും ജനസാന്ദ്രതയേറിയ നഗരമായ ന്യൂയോര്‍ക്കിന്റെ മേയറെ തെരഞ്ഞെടുക്കുന്ന വോട്ടെടുപ്പില്‍ 85 ലക്ഷത്തോളം നഗരവാസികളാണ് വോട്ട് ചെയ്തത്. ബ്രൂക്‌ലിന്‍, ക്വീന്‍സ്, മാന്‍ഹാട്ടന്‍, ദി ബ്രോണ്‍ക്‌സ്, സ്റ്റേറ്റണ്‍ ഐലന്‍ഡ് എന്നീ അഞ്ചു നഗരങ്ങള്‍ ചേര്‍ന്നാണ് ന്യൂയോര്‍ക്ക് സിറ്റി.

ഇന്ത്യന്‍ വംശജയായ ചലച്ചിത്ര സംവിധായക മീര നയാറുടെയും ഉഗാണ്ടന്‍ അകാദമിക് വിദഗ്ധന്‍ മഹ്‌മൂദ് മംദാനിയുടെയും മകനാണ് മംദാനി. ഡെമോക്രാറ്റിക് സ്ഥാനാര്‍ഥി സൊഹ്‌റാന്‍ മംദാനി ന്യൂയോര്‍ക്ക് മേയറാകുമെന്ന് നേരത്തെ തന്നെ റിപ്പോര്‍ട്ടുകളുണ്ടായിരുന്നു. പുതിയ മേയര്‍ 2026 ജനുവരി ഒന്നിന് സത്യപ്രതിജ്ഞ ചെയ്ത് അധികാരമേല്‍ക്കും.

മംദാനിയുടെ മേയര്‍ തെരഞ്ഞെടുപ്പ് വിജയം അമേരിക്കന്‍ പ്രസിഡന്റ് ഡോണള്‍ഡ് ട്രംപിനു കനത്ത തിരിച്ചടിയായി. മംദാനിയുടെ സ്ഥാനാര്‍ഥിത്വത്തിനെതിരെ ട്രംപ് പരസ്യമായി രംഗത്തുവന്നിരുന്നു. 'ന്യൂയോര്‍ക്ക് സിറ്റി മേയര്‍ തെരഞ്ഞെടുപ്പില്‍ കമ്യൂണിസ്റ്റ് സ്ഥാനാര്‍ഥി സൊഹ്റാന്‍ മംദാനി വിജയിച്ചാല്‍, എന്റെ പ്രിയപ്പെട്ട ആദ്യ ഭവനത്തിന് ആവശ്യമായ ഏറ്റവും കുറഞ്ഞ തുകയല്ലാതെ ഫെഡറല്‍ ഫണ്ടുകള്‍ സംഭാവന ചെയ്യുകയില്ലെന്നായിരുന്നു ട്രംപിന്റെ ഭീഷണി. 'ഒരു 'കമ്യൂണിസ്റ്റിലൂടെ ഈ മഹാ നഗരത്തിന് ഒരിക്കലും വിജയ സാധ്യതയില്ല. അതിജീവനത്തിന് പോലും കഴിയില്ല. മഹാദുരന്തമായിരിക്കും ന്യൂയോര്‍ക്കിനെ കാത്തിരിക്കുന്നത് -ട്രംപ് ട്രൂത്ത് സോഷ്യലില്‍ എഴുതി. മുന്‍ ഗവര്‍ണര്‍ ആന്‍ഡ്രൂ കുമോക്കാണ് ട്രംപ് മേയര്‍ സ്ഥാനത്തേക്ക് ഔദ്യോഗികമായി പിന്തുണ നല്‍കിയിരുന്നത്.