റിയാദ്: പ്രവാസി പരിചയ് 2025ന്റെ സമാപന ദിനത്തില്‍, ഭഗവദ് ഗീതയുടെ നിത്യസന്ദേശത്തെ ആസ്പദമാക്കിയ സംഗീതനാടകം 'ഗീതാ മഹോത്സവം എ മ്യൂസിക്കല്‍' ഇന്ത്യന്‍ എംബസി, സംഘടിപ്പിച്ചു. ചടങ്ങ് വിദേശകാര്യ സഹമന്ത്രി ശ്രി കിര്‍തി വര്‍ധന്‍ സിംഗ് അയച്ച ആശംസാ സന്ദേശ വീഡിയോയോടെ ആരംഭിച്ചു.
വൈദേഹി നൃത്ത വിദ്യാലയത്തിലെ വിദ്യാര്‍ത്ഥിനികള്‍ അവതരിപ്പിച്ച സംഗീതനൃത്താവിഷ്‌കാരം ഭഗവദ് ഗീതയുടെ ആത്മീയ സന്ദേശങ്ങളെ സംഗീതത്തിന്റെയും നൃത്തത്തിന്റെയും സര്‍വ്വദേശീയ ഭാഷയിലൂടെ പ്രേക്ഷകരിലേക്കെത്തിച്ചു.
ഇന്ത്യയുടെ ആഴത്തിലുള്ള സാംസ്‌കാരികവും ആത്മീയവുമായ പൈതൃകവുമായി പ്രവാസി ഇന്ത്യന്‍ സമൂഹത്തെ ബന്ധിപ്പിക്കുന്നതിന്റെ ഭാഗമായി എംബസി നടത്തുന്ന ശ്രമമാണ് ഗീതാ മഹോത്സവം. ''ഗീതയിലെ സമത്വം, ധര്‍മ്മം, നിസ്വാര്‍ത്ഥ കര്‍മ്മം എന്നീ സന്ദേശങ്ങള്‍ ഇന്നും അത്ര തന്നെ പ്രസക്തമാണെന്നും, ഇത്തരം പരിപാടികള്‍ പുതിയ തലമുറയെ അതിന്റെ മഹത്തായ മൂല്യങ്ങളെപ്പറ്റി ചിന്തിക്കാന്‍ പ്രേരിപ്പിക്കുമെന്നും'' ഇന്ത്യന്‍ അംബാസഡര്‍ ഡോ. സുഹൈല്‍ അജാസ് ഖാന്‍ പ്രസ്താവിച്ചു.
ചടങ്ങില്‍ പത്മശ്രീയും സംഗീത നാടക അക്കാദമി അവാര്‍ഡ് ജേതാവുമായ പ്രതിഭ പ്രഹ്ലാദ് പ്രധാന അതിഥിയായി പങ്കെടുത്തു. 2023ല്‍ ഇന്ത്യന്‍ എംബസി ആരംഭിച്ച പ്രവാസി പരിചയ് പരമ്പരയുടെ ഭാഗമായാണ് ഈ പരിപാടി സംഘടിപ്പിച്ചത്. ഇന്ത്യയുടെ സമ്പന്നമായ സാംസ്‌കാരിക പൈതൃകത്തെ സൗദി അറേബ്യയിലെ ഇന്ത്യന്‍ സമൂഹത്തിന്റെ സജീവ പങ്കാളിത്തത്തോടെ അവതരിപ്പിക്കുന്നതിനാണ് ഈ പരമ്പര ലക്ഷ്യമിടുന്നത്.
