റിയാദ്: സൗദി അറേബ്യയിലെ വിമാനത്താവളങ്ങളുടെയും ദേശീയ വിമാനക്കമ്പനികളുടെയും സമയനിഷ്ഠ സംബന്ധിച്ച 2025 സെപ്റ്റംബര്‍ മാസത്തെ റിപ്പോര്‍ട്ട് സിവില്‍ ഏവിയേഷന്‍ പൊതു അതോറിറ്റി പുറത്തിറക്കി.
വിമാനക്കമ്പനികളില്‍, സൗദി അറേബ്യന്‍ എയര്‍ലൈന്‍സ് പുറപ്പെടലില്‍ 86% ഉം, എത്തിച്ചേരലില്‍ 89% ഉം സമയനിഷ്ഠ രേഖപ്പെടുത്തി. ഫ്‌ളൈനാസ് പുറപ്പെടലില്‍ 85% ഉം, എത്തിച്ചേരലില്‍ 84% ഉം നിരക്ക് കൈവരിച്ചപ്പോള്‍, ഫ്‌ളൈഅദീല്‍ പുറപ്പെടലില്‍ 93% ഉം, എത്തിച്ചേരലില്‍ 91% ഉം എന്ന മികച്ച സമയനിഷ്ഠാ നിരക്കോടെ മുന്നിലെത്തി.
ഷെഡ്യൂള്‍ ചെയ്ത സമയത്തില്‍ നിന്ന് 15 മിനിറ്റിനുള്ളില്‍ വിമാനം പുറപ്പെടുകയോ എത്തിച്ചേരുകയോ ചെയ്തതിന്റെ അടിസ്ഥാനത്തിലാണ് ഈ സമയനിഷ്ഠാ റിപ്പോര്‍ട്ട് തയ്യാറാക്കിയിരിക്കുന്നത്. റിപ്പോര്‍ട്ടില്‍ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം, ദമ്മാമിലെ കിംഗ് ഫഹദ് അന്താരാഷ്ട്ര വിമാനത്താവളം, തബൂക്കിലെ പ്രിന്‍സ് സുല്‍ത്താന്‍ ബിന്‍ അബ്ദുല്‍ അസീസ് അന്താരാഷ്ട്ര വിമാനത്താവളം, അല്‍-ഉല അന്താരാഷ്ട്ര വിമാനത്താവളം, അല്‍-ബാഹയിലെ കിംഗ് സൗദ് ബിന്‍ അബ്ദുല്‍ അസീസ് വിമാനത്താവളം എന്നിവ മികച്ച പ്രകടനം കാഴ്ചവെച്ച് റാങ്കിംഗില്‍ മുന്നിലെത്തി.
വിമാനത്താവളങ്ങളെ അഞ്ച് വിഭാഗങ്ങളായി തിരിച്ചാണ് റിപ്പോര്‍ട്ട് തയ്യാറാക്കിയിരിക്കുന്നത്. പ്രതിവര്‍ഷം 15 ദശലക്ഷത്തിലധികം യാത്രക്കാരുള്ള അന്താരാഷ്ട്ര വിമാനത്താവളങ്ങളുടെ വിഭാഗത്തില്‍, റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം 87% സമയനിഷ്ഠാ നിരക്കുമായി ഒന്നാം സ്ഥാനം നേടി. പ്രതിവര്‍ഷം 5 ദശലക്ഷം മുതല്‍ 15 ദശലക്ഷം വരെ യാത്രക്കാരുള്ള അന്താരാഷ്ട്ര വിമാനത്താവളങ്ങളുടെ രണ്ടാമത്തെ വിഭാഗത്തില്‍, ദമ്മാമിലെ കിംഗ് ഫഹദ് അന്താരാഷ്ട്ര വിമാനത്താവളമാണ് 90% നിരക്കോടെ മുന്നിലെത്തിയത്. 2 ദശലക്ഷം മുതല്‍ 5 ദശലക്ഷം വരെ യാത്രക്കാരുള്ള അന്താരാഷ്ട്ര വിമാനത്താവളങ്ങളുടെ മൂന്നാമത്തെ വിഭാഗത്തില്‍, തബൂക്കിലെ പ്രിന്‍സ് സുല്‍ത്താന്‍ ബിന്‍ അബ്ദുല്‍ അസീസ് അന്താരാഷ്ട്ര വിമാനത്താവളം 91% സമയനിഷ്ഠാ നിരക്കോടെ ഒന്നാം സ്ഥാനത്തെത്തി.
പ്രതിവര്‍ഷം രണ്ട് ദശലക്ഷത്തില്‍ താഴെ യാത്രക്കാരുള്ള അന്താരാഷ്ട്ര വിമാനത്താവളങ്ങളുടെ നാലാമത്തെ വിഭാഗത്തില്‍, അല്‍-ഉല അന്താരാഷ്ട്ര വിമാനത്താവളം 97% എന്ന ഉയര്‍ന്ന സമയനിഷ്ഠാ നിരക്ക് രേഖപ്പെടുത്തി ഒന്നാം സ്ഥാനം കരസ്ഥമാക്കി. ആഭ്യന്തര വിമാനത്താവളങ്ങളുടെ അഞ്ചാമത്തെ വിഭാഗത്തില്‍, അല്‍-ബാഹയിലെ കിംഗ് സൗദ് ബിന്‍ അബ്ദുല്‍ അസീസ് വിമാനത്താവളം 100% സമയനിഷ്ഠയോടെ മികച്ച വിജയം നേടി.
Related News
