ദുബായ്: യു.എ.ഇയില്‍ ഇന്നു അര്‍ധരാത്രി മുതല്‍ ഇന്ധന വിലയില്‍ കുറവ്. നവംബര്‍ മാസത്തെ വില നിരക്ക് പ്രഖ്യാപിച്ചപ്പോഴാണ് പെട്രോള്‍, ഡീസല്‍ നിരക്കില്‍ കുറവ് രേഖപ്പെടുത്തിയത്. കഴിഞ്ഞ മാസം നേരിയ വര്‍ധവ് രേഖപ്പെടുത്തിയ ശേഷമാണ് കുറവുണ്ടായിരിക്കുന്നത്.

സൂപ്പര്‍ 98 പെട്രോളിന് 2.63 ദിര്‍ഹമാണ് പുതിയ നിരക്ക്. കഴിഞ്ഞ മാസമിത് 2.77ദിര്‍ഹമായിരുന്നു. 2.66 ദിര്‍ഹമായിരുന്ന സ്‌പെഷ്യല്‍ 95 പെട്രോള്‍ വില് 2.51 ദിര്‍ഹമായും 2.58 ദിര്‍ഹമായിരുന്ന ഇപ്ലസ് 91 പെട്രോള്‍ നിരക്ക് 2.44 ദിര്‍ഹമായും കുറഞ്ഞിട്ടുണ്ട്. ഡീസലിന് പുതിയ നിരക്ക് 2.67ദിര്‍ഹമാണ്. ഒക്ടോബറില്‍ നിരക്ക് 2.71ദിര്‍ഹമായിരുന്നു.

വെള്ളിയാഴ്ച അര്‍ധരാത്രി 12 മണി മുതല്‍ പുതുക്കിയ വില പ്രാബല്യത്തില്‍ വരും. ആഗോള വിപണിയിലെ ക്രൂഡ് ഓയില്‍ വിലയിലെ മാറ്റങ്ങള്‍ അനുസരിച്ചാണ് യു.എ.ഇയിലും ഇന്ധന വില നിര്‍ണയ സമിതി ഓരോ മാസവും ഇന്ധനവില പുതുക്കി നിശ്ചയിക്കുന്നത്. നിരക്ക് മാറ്റം ടാക്‌സി നിരക്കിലും മറ്റും പ്രതിഫലിക്കും.
നിരക്ക് കുറഞ്ഞത് പ്രവാസികളടക്കമുള്ളവര്‍ക്ക് ആശ്വാസകരമാണ്. ആഗോള തലത്തില്‍ ഏറ്റവും കുറഞ്ഞ ഇന്ധന വിലയുള്ള 25 രാജ്യങ്ങളില്‍ ഒന്നാണ് യു.എ.ഇ. 2015 മുതലാണ് അന്താരാഷ്ട്ര വിപണി വിലയെ അടിസ്ഥാനമാക്കി രാജ്യത്തും ഇന്ധന വില പുതുക്കുന്ന രീതി ആരംഭിച്ചത്.