ജിദ്ദ: ഖമീസ് മുൈഷത്തിനടുത്ത ബീഷയില്‍ ഹൃദയാഘാതം മൂലം മരണപ്പെട്ട ഉത്തര്‍പ്രദേശ് ജോന്‍പൂര്‍ സ്വദേശി കലീം അഹ്‌മദിന്റെ (55) മൃതദേഹം ഐസിഎഫ് വെല്‍ഫെയര്‍ പ്രവര്‍ത്തകരുടെ സഹായത്തോടെ മറവ് ചെയ്തു. ഒക്ടോബര്‍ 5-ന് മരണപ്പെട്ട ഇദ്ദേഹത്തിന്റെ മൃതദേഹം 22 ദിവസമായി മോര്‍ച്ചറിയില്‍ സൂക്ഷിച്ചിരിക്കുകയായിരുന്നു. മൃതദേഹത്തെക്കുറിച്ച് അറിയിപ്പ് ലഭിച്ചതിനെ തുടര്‍ന്ന് ഐസിഎഫ് വെല്‍ഫെയര്‍ & സര്‍വീസ് ഭാരവാഹികള്‍ നിയമപരമായ ഇടപെടലുകള്‍ നടത്തുകയും അതിന്റെ ഫലമായി നടപടികള്‍ വേഗത്തിലാക്കാനും, കഴിഞ്ഞ ദിവസം തസ്ലീസ് ബലദിയ മഖ്ബറയില്‍ അന്ത്യകര്‍മ്മങ്ങള്‍ നടത്താനും സാധിച്ചു. അന്ത്യകര്‍മങ്ങളില്‍ ഐ സി എഫ് നേതാക്കളും പ്രവര്‍ത്തകരും, ബന്ധുമിത്രാദികളും പങ്കെടുത്തു.

എക്‌സിറ്റില്‍ പോയ ശേഷം പുതിയ വിസയില്‍ മൂന്ന് വര്‍ഷം മുമ്പാണ് കലീം അഹ്‌മദ് സൗദിയില്‍ തിരിച്ചെത്തിയത്. ഡ്രൈവറായി ജോലി ചെയ്തുവരികയായിരുന്നു. നസീമയാണ് ഭാര്യ. മക്കള്‍: ഉമ്മുകുത്സൂം, സീനത്ത്, മുഹമ്മദ് കഫീല്‍.

ഖമീസ് മുൈഷത്തില്‍ ഹഖീം അഷ്റഫി, നിയാസ് സികെ, മുജീബ് കര്‍ണാടക, ഷക്കീല്‍ യുപി എന്നിവരും, ജിദ്ദയില്‍ എംബസി നിയമ കാര്യങ്ങള്‍ ഏകോപിപ്പിച്ച് ഐസിഎഫ് വെസ്റ്റ് വെല്‍ഫെയര്‍ & സര്‍വീസ് സെക്രട്ടറി അബുമിസ്ബാഹ് ഐക്കരപ്പടി, ജിദ്ദ റീജിയണല്‍ വെല്‍ഫെയര്‍ & സര്‍വീസ് സെക്രട്ടറി ഹനീഫ ബെര്‍ക്ക, മുഹമ്മദ് സഖാഫി ഉഗ്രപുരം എന്നിവരും പ്രവര്‍ത്തനങ്ങള്‍ക്ക് നേതൃത്വം നല്‍കി.